Сæйраг æргом — сывæллонджын бинонтæм

0
74

 

Ныййарæджы капиталы тыххæй регионалон закъон нæ республикæйы фидаргонд æрцыд 2012 азы. Фыстой йæ, сывæллоныл æртæ азы-иу куы сæххæст, уæд. Фæлæ алыхуызон финансон къуыхцыты аххосæй 2015 азæй закъон æххæстгонд нал цыд, æмæ уæдæй фæстæмæ, ныййарæджы капиталмæ æнхъæлмæ чи каст, уыцы бинонтæм ацы социалон æххуыс нал хæццæ кодта.

Уавæр цæхгæр аивта, парти «Иугонд Уæрæсе»- йæ республикæйы Парламенты депутатты корпус хъуыддагыл архайын куы райдыдта, уæд. Закъон ногæй кусын цæмæй райдайа æмæ сывæллонджын бинонтæ ацы социалон æххуыс исын райдайой, ууыл куыд архайдтой, уый фæдыл арæзт пресс-конференцийы дзырдтой парти «Иугонд Уæрæсе»-йы Цæгат Ирыстоны регионалон хайады секретар Ортабайты Тимур æмæ республикæйы фæллой æмæ социалон рæзты министр Хуыбиаты Барис.

— Хъуыддагыл архайын райдыдтам 2018 азы кæрон. Ныййарæджы капиталмæ æнхъæлмæгæсæг мадæлтимæ иу æмæ дыууæ хатты нæ фембæлдыстæм, семæ ныхас кодтам. Æхца фыст цы рæстæг нал цыд, уæдæй абонмæ, кæй зæгъын æй хъæуы, уыцы хæс сбирæ. Фæлæ социалон фарстатæм республикæйы разамынд стыр æргом кæй здахы, уымæ гæсгæ нæ партийы депутаттæ, республикæйы разамынд, комкоммæ Битарты Вячеслав, бацархайдтой, гæнæнтæ ссардтой, цæмæй уыцы æхцатæ 2019 азы бюджеты æвæрд æрцæуой, æмæ сæ ныр ныййарджытæн фидын райдыдтам, — загъта Ортабайты Тимур.

Фæллой æмæ социалон рæзты министр Хуыбиаты Барис куыд бамбарын кодта, афтæмæй ацы аз ныййарæджы капиталы æхцатæ райсдзысты, се ‘ртыккаг (цыппæрæм æмæ афтæ дарддæр) сывæллон 2012 азы кæмæн райгуырд æмæ 2014 азмæ ныййарæджы капитал райсыны тыххæй куырдиат бадæттыныл чи бацархайдта, 1726 ахæм бинонтæ. Уыцы нысанæн хардзгонд æрцæудзæн 86 милуан сомы. Бинонтæ се ‘хца райсдзысты ацы азы фыццаг æмбисы. Абонмæ уал уыдонæй 358 бинонтæн се ‘хцатæ сæ къухмæ æрбахæццæ сты. Хъуыддаг къæпхæнгай æххæстгонд цæудзæн дарддæр дæр, цалынмæ æппæт бинонтæ дæр, чи сын æмбæлы, уыцы социалон æххуыс нæ райсой, уæдмæ.

Хуыбиаты Барис куыд бамбарын кодта, афтæмæй, мадæлтæн сæхи фæндонмæ гæсгæ, капиталæй спайда кæныны гæнæнтæ бынтон фæхуымæтæгдæр сты, ома, ныр уыцы æхцатæ схардз кæнæн ис цæрыны уавæртæ фæхуыздæр кæныныл, бинонты кæцыфæнды сывæллоны дæр дзæбæх кæныныл, социалон адаптацийы æмæ инвалид сывæллоны социалон реабилитацийы чи хъæуы, ахæм товартæ æмæ лæггæдтыл, сывæллоны ахуырмæ бацæттæ кæныныл, цæрæнуæттыкоммуналон хæдзарады лæггæдтæн бафидыныл æмæ бинонты æндæр нысаниуæджы хæрдзтыл. «Бинонты цы хъæуы æмæ йæ сывæллонæн ахсджиагдæр цы у, уый ныййарæгæй хуыздæр чи зоны», — бафиппайдта министр.

Ногæй кусын чи райдыдта, регионалон уыцы закъонмæ гæсгæ ныййарæджы капиталы бæрц нæ республикæйы у 50 мин сомы.

Национ проект «Демографи» æмæ Уæрæсейы Президенты Майы указтæ æххæст кæнгæйæ, нæ республикæйы дарддæр дæр æххæстгонд цæудзысты демографион уавæр фæхуыздæр кæныны æмæ сывæллонджын бинонтæн социалон æххуысы мадзæлттæ.

ДЕДЕГКАТЫ Зæлинæ

 

ОСТАВЬТЕ ОТВЕТ

Please enter your comment!
Please enter your name here