Æвзонг уæлахиздзаутæ

0
982

 

18-23 мартъийы Уæрæсейы цыдис бæстæйы æвзонг наукон фæсивæды æппæтуæрæсеон конкурс «Къахдзæф фидæнмæ». Алы регионтæй дзы архайдтой 800 скъоладзауы, Цæгат Ирыстонæй — 5 адæймаджы. Конкурсы сæйраг фыццаг дыууæ бынаты рамбылдтой Дзæуджыхъæуы 26-æм астæуккаг скъолайы ахуырдзаутæ — Сывæллæтты техникон сфæлдыстадон æвзонг ахуыргæндтæ: МАХЪОТЫ Рамазан æмæ Оганес ЕПИСКОПЯН. Уыимæ Махъойы-фырт — иуæндæсæм къласы ахуырдзау ссис æппæтуæрæсеон конкурс «Æххæст уæлахиздзау»-ы рамбулæг. Саккаг ын кодтой Гран-при æмæ майдан.

Конкурсы уæлахиздзауты знон РЦИ-Аланийы ахуырад æмæ наукæйы министры хæдивæг Алыккаты Алан схорзæхджын кодта министрады Кады гæххæттытæй, сæ ахуыргæнджыты æмæ разамонджыты та — Арфæйы гæххæттæй.

— Сæрыстыр стæм уæ æнтыстдзинадæй, нæ зæрдæтæ нын барухс кодтат уæлахизæй æмæ уын министрад зæгъы бузныг. Уæ куысты æмæ ахуыры бæрæггæнæнтæ æвдисæн сты, куыд зæрдиагæй æмæ бæстонæй архайут наукон царды, уымæн. Сымах стут рæсугъд æмæ амондджын фидæны бындур, нæ бæстæйы, нæ чысыл Ирыстоны хъысмæт кæй къухы уыдзæн, ахæм фæлтæр. Æмæ нæ уырны, уыцы фидæны сараппонд уæ зонындзинæдтæ, уæ архайд кæй снывонд кæндзыстут, — загъта министры хæдивæг.

Дзæуджыхъæуы Сывæллæтты техникон сфæлдыстады центры ахуыргæнæг Татьянæ Радченко та куыд радзырдта, афтæмæй конкурс «Къахдзæф фидæнмæ»-йы сæ хъомылгæнинæгтæ архайынц 2001 азæй нырмæ. Æмæ-иу алы аз дæр бацахстой дыккаг кæнæ æртыккаг бынæттæ.

— Ацы аз, конкурсы уæлахизтæ мах баисты. Махъоты Рамазан амбылдта се ‘ппæты дæр. Саккаг ын кодтой сæйраг приз, майдан æмæ æрвыст æрцæудзæн европæйаг конкурсы архайынмæ Румынмæ, Оганес Епископян та — Америкæмæ. Ацы уæлахизтæ сæ къухы æнцонтæй нæ бафтыдысты. Уымæн æмæ алы аз дæр конкурсы хæслæвæрдтæ зынæй-зындæр кæнынц. Мах, техникон центры ахуыргæнджытæ, нæ куыстмæ æрбахуыдтам ЦИПУ-йы физикæ æмæ химийы профессорты, цæмæй сæ уыдон ноджы биноныгдæр цæттæ кæной. Ацы аз нæ конкурсанттæн разамонæг ЦИПУ-йæ уыд Иван Силаев. Университет техникон ифтонггæрзтæй хъæздыг у, æмæ нæ сывæллæттæн хорз фадæттæ вæййы уым сæ наукон ахуыртæ практикон æгъдауæй сфидар кæнынæн, — загъта Татьянæ Радченко.

Æппæтуæрæсеон конкурс «Шаг в будущее»-йы уæлахиздзау Махъоты Рамазан та журналисттæн йæ балцы фæдыл загъта:

— Фæлтæрддзинад дзы райстон. Ацы форуммæ æрбамбырд сты нæ бæстæйы æппæты хуыздæр наукон кусджытæ, æмæ нын семæ фæныхас кæнын, сæ фæлтæрддзинадæй спайда кæнынæн фадат фæци.

Æппæтуæрæсеон конкурсы архайджытæ сæ наукон куыстытæ бацæттæ кодтой алы темæтыл, Махъоты Рамазан йæ зонындзинæдтæ равдыста хими æмæ физикæйæ. Скъолайы фæстæ та ахуырмæ бацæудзæн Мæскуыйы Бауманы номыл техникон институтмæ.

САУТÆТЫ Тамилæ Къам систа ЦÆГÆРАТЫ Дауыт

ОСТАВЬТЕ ОТВЕТ

Please enter your comment!
Please enter your name here