Битарты Вячеслав фембæлд Æрыдоны районы цæрджытимæ

0
28

 

 

Æрыдоны районы фæстаг цалдæр азы хорз рæзы æхсыры æрдыгъд æмæ йæ куыстад. Фæлæ хъæууон цæрджыты тыхсын кæны, фосхизæнтæ сын фаг кæй нæй, уый. Ацы æмæ иннæ тыхстаг фарстытимæ районы цæрджытæ бахатыдысты Цæгат Ирыстоны Сæргълæууæг БИТАРТЫ Вячеславмæ, Къостайыхъæуы сын цы фембæлд уыд, уым.

— Районты цæрджытимæ ахæм фембæлдтытæ æз ахсджиаг хъуыддагыл нымайын. Горæт кæнæ хъæуы цæрджытимæ бынаты бæстон æрдзурæм æппæт тыхстаг фарстытыл дæр, иумæйаг уынаффæтæ рахæссæм, цæмæй адæмы цард хуыздæрæрдæм ива. Мæнæн, куыд республикæйы разамонæгæн, вазыгджын у уæ хъуыдытæ æмæ фæндæттæ базонын, цæмæй мæ дарддæры архайды уыдон хыгъд цæуой. Кæй зæгъын æй хъæуы, республикæйы районты царды бирæ лыггæнинаг фарстытæ ис, уыцы-иу цæфæй сæ нæ алыг кæндзыстæм. Фæлæ сыл куыст кæй цæудзæн, уымæй уын зæрдæ æвæрын. Æз уæ хонын æргом æмæ бæлвырд ныхасмæ, — фембæлды райдайæны фæнысан кодта Цæгат Ирыстоны Сæргълæууæг.

Фембæлды архайдтой æмæ адæмы фарстытæн дзуапдæттæг уыдысты Æрыдоны районы сæргълæууæг Тотраты Владислав, республикон министрадтæ æмæ ведомствæты минæвæрттæ дæр. Фосхизæнты кой кæнгæйæ, Тотраты Владислав куыд фехъусын кодта, афтæмæй Кировыхъæуы администрацийы бæрны бакодтой фосхизæнты 230 гектары. Уымæй уæлдай, бынæттон администраци фосхизæнтæн ноджыдæрма снысан кодта 35 гектары.

Къостайыхъæуы цæрджытæ та боны фæткмæ бахастой Марксы номыл раздæры колхозы зæххыты хъысмæт. Бынæттон адæм фæндон бахастой, цæмæй уыцы зæххытæ ногæй суой сæ иумæйаг исбонад. — Уыцы зæххытæ уæхи мидæг адих кæнут, фæлæ зæххæй пайда кæнын æмæ йыл кусын хъæуы, цæмæй уæ бинонтæн дæр æнцондæр цæрæн уа, цæмæй республикæ дæр хъомысджындæр кæна, — хъæуы цæрджытæн дзуапп радта Битарты Вячеслав.

Районы зынгæ куыст бакæнын хъæуы, цæмæй раивой хъæууон цæрæн бынæтты донуадзæн хæтæлтæ, цалцæггонд æрцæуой фæндæгтæ. Цæгат Ирыстоны Сæргълæууæг куыд загъта, афтæмæй йæ амынддзинадмæ гæсгæ Æрыдоны районы 2019 азы бюджеты сæрмагонд фæрæзтæ нысангонд æрцыдысты хъæууон донуадзæн хæтæлты рацарæзты проекттæ бацæттæ кæнынæн. — Абон, æвæццæгæн, иу хъæу дæр нæй, донуадзæн хæтæлтæ ивинаг кæм не сты. Профилон министрад ныртæккæ уыцы фарстайы фæдыл цæттæ кæны сæрмагонд республикон проект. Уыцы проект æрвыст æрцæудзæн федералон ведомствæтæм, уымæн æмæ йын бахъæудзæн зынгæ фæрæзтæ. Къоста æмæ Кировы хъæуты фæндæгты уавæрыл куы дзурæм, уæд уал фыццаг къæпхæны ацы аз уыцы цæрæн бынæтты ахуырадон кусæндæтты алыварс фæндæгтæ сцалцæг кæндзыстæм, — бафиппайдта Битарты Вячеслав.

Йæ ныхасмæ гæсгæ, сæрмагонд федералон программæйы æххуысæй уыцы бынæтты арæзт æрцæудзысты сывæллæтты хъазæн æмæ спортивон фæзтæ дæр.

Бынæттон цæрджытæ рахъаст кодтой, Æрыдоны Центрон рынчындоны ныртæккæ цалцæггæнæн куыстытæ кæй цæуы, уый аххосæй медицинон лæггæдтæ иуцасдæр къуыхцытимæ кæй исынц, уымæй дæр. Районы цæрджыты ныхасмæ гæсгæ, ныртæккæ сæм æппæты æввахсдæр ахæм медицинон кусæндон у Рахизфарсы районы Центрон рынчындон. Фæлæ уырдæм тыхст рынчынты нæ райсынц. Уыцы æууæл хынцгæйæ, бынæттон адæм курынц, цæмæй фарстамæ ногæй каст æрцæуа. Республикæйы Хицауады Сæрдары хæдивæг — æнæниздзинад хъахъхъæнынады министр Годжыцаты Тамерлан куыд фехъусын кодта, афтæмæй хæстæгдæр рæстæг ивддзинæдтæ хаст æрцæудзæн «тагъд æххуысы» хæдтулгæты маршрутмæ.

Хъæууон адæм республикæйы разамынды æргом аздæхтой бирæ æндæр фарстытæм дæр. Уыдоны нымæцы: æгуыстдзинад, транспортон лæггæдтæ æмæ афтæ дарддæр. Къоста æмæ Кировы хъæуты цæрджытæн фадат уыд сæ куырдиæттæ гæххæттыл фыстæй бадæттынæн дæр. Республикæйы Сæргълæууæджы æмæ Хицауады Администрацийы æппæт фарстатæ дæр бабиноныг кæндзысты æмæ сæ барвитдзысты профилон ведомствæтæм, цæмæй гæнæн æмæ амалæй лыггонд æрцæуой.

РЦИ-Аланийы Сæргълæууæджы пресс-службæ

ОСТАВЬТЕ ОТВЕТ

Please enter your comment!
Please enter your name here