Къадзты Зитæ рамбылдта бронзæ майдан

0
35

 

Мæскуыйы мас-рестлингæй (ивазæнтæй) цыдысты Олимпаг хъæзтыты уæлахиздзау Роман Дмитриевы номарæн турниры ерыстæ

 

Спорты ацы хуыз æппæты парахатдæр у Сыбыры адæмты ‘хсæн. Æнæ ахæм ерыстæй Якутийы, Бурятийы, Тывайы иу бæрæгбон дæр нæ ацæуы. А фæстаг азты мас-рестлинг парахатæй-парахатдæр кæны дунейы алы бæстæты. Арæзт дзы цæуынц стыр ерыстæ æмæ чемпионаттæ. «Ивазæнтæ» нæ республикæйы фæсивæды зæрдæмæ дæр фæцыдысты, æмæ дзы сæ хъару æвдисынц куыд нæ лæппутæ, афтæ чызджытæ дæр. Мæскуыйы ерысты йæхи хъомысджынæй равдыста тренер Цгъойты Тамерланы хъомылгæнинаг Къадзты Зитæ. Сылгоймæгты ерысты Зитæ фæуæлахиз цыппар ныхмæлæууæгыл, хæрд та фæци æрдæгкæронбæттæны æмæ бацахста 3-аг бынат.

 

Уæгъдибар хъæбысхæст, джиу-джитсу æмæ шахмæттæй ерыстæ

Ацы къуыри Ирыстоны спортивон цард уыдзæн хъæздыг алыхуызон ерыстæй. Уæгъдибар хъæбысхæсты фарсхæцджытæ 5-7 апрелы æвдисæн уыдзысты, Хъуылаты Бадзийы номыл спортивон галуаны чи цæудзæн, уыцы Уæрæсейы фæсивæды (21 азы онг) чемпионатæн. Дзæуджыхъæуы гауызыл сæ хъару æмæ арæхстдзинад æвдисдзысты нæ бæстæйы ацы кары тыхджындæр богæлттæ

Уымæй уæлдай ма ацы ран апрелы уæгъдибар хъæбысхæстæй арæзт æрцæудзæн æппæтуæрæсеон турнир æвзонг (2007- 2009 азты гуырд) богæлттæн. Ерыстæй богæлттæ ссардзысты Уæрæсейы сгуыхт тренер Дедегкаты Хъазыбеджы рухс ном.

6-7 апрелы спортивон комплекс «Динамо»-йы джиу-джитсуйæ цæудзысты Хетæгкаты Хъазыбеджы номарæн турниры ерыстæ æрыгæтты ‘хсæн. Турниры Ирыстоны лæппутæ æмæ чызджытæй уæлдай сæ хъару æвдисдзысты Краснодары, Калугæйы æмæ Хъырымы æрыгон спортсментæ. Æдæппæт ерысты архайдзысты 250 адæймаджы. Шахмæтты спорт йæ зæрдæмæ хæстæг кæмæн у, уыдонæн дæр хорз фадат уыдзæн Цæгат Кавказы федералон зылды тыхджындæр шахматистты архайдмæ дæс боны дæргъы РЦИ-Аланийы Национ наукон библиотекæйы бакæсынмæ. Ерыстæ фыццаг цæудзысты шахмæтты классикон хъазты хуызæй. Ома, дыууæ ныхмæлæууæгæн дæр лæвæрд цæуы иу ахъазтæн фæйнæ 90 минуты.

Ерысты 1-3-аг бынæттæ цы нæлгоймæгтæ æмæ сылгоймæгтæ бацахсой, уыдон балцæгтæ райсдзысты Уæрæсейы «Уæлдæр лигæ»-йы чемпионаты архайынмæ. Чемпионаты фæстаг бон, 14 апрелы, нæлгоймæгтæ æмæ сылгоймæгтæ ерыс кæндзысты «Цырд шахмæттæй». Шахмæттæй хъазты ацы хуыз къаддæр цымыдисаг нæу. Ам дыууæ ныхмæлæууæгæн дæр æнæхъæн парти рамбулынæн лæвæрд цæуы æрмæстдæр фæйнæ 5 минуты. Уыцы чысыл рæстæг равдисын хъæуы стыр дæсныдзинад æмæ цырд зонд.

Ерыстæ аразæг сты Уæрæсейы Шахмæтты федераци, Цæгат Кавказы федералон зылды Шахмæтты федераци, РЦИАланийы Физикон культурæ æмæ спорты министрад, РЦИ-Аланийы Шахмæтты федераци.

Чемпионат аразджытæ ерысты уæлахиздзаутæ æмæ призон бынæттæ бацахсджытæн снысан кодтой 140 мин сомы призон фонд. Ирыстоны номæй чемпионаты архайдзысты 60 шахматистæй фылдæр. Уыдонимæ уыдзысты, куыд нæ фæлтæрдджын шахматисттæ, афтæ æрыгон курдиатджын лæппутæ æмæ чызджытæ дæр.

Ерыстæ байгом кæндзысты 5 апрелы 15.00 сахатыл.

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here