Райстой цæрæнуæтты сертификаттæ

0
1133

 

«Ацы фембæлд хъуамæ чысыл раздæр уыдаид, азы райдайæны уын хъуамæ радтаиккам цæрæнуæттæ балхæныны тыххæй субсидитæ. Уæззау политикон уавæрты аххосæй уæ цæрæнбынæттæ ныууагътат, бирæ азты зæрдæ дардтат, ног фатерты цæрын райдайдзыстæм, зæгъгæ. Фæстаг дыууæ азы дæргъы Икъаты Русланбеджы архайды фæрцы уавæр хорзæрдæм фенкъуысыд, кæд 2016 азы райдайæны рады 3 мин адæймаджы бæрц лæууыд, уæд абон сты 1200. Ацы азы кæронмæ ма 650 бинонтæ суыдзысты цæрæнуæтты сертификатты хицæуттæ», — знон РЦИ-Аланийы Сæргълæууæг БИТАРТЫ Вячеслав фембæлд, æнæбары сæ цæрæнбынæттæ чи ныууагъта, æмæ бирæ азты дæргъы фатер райсынмæ чи æнхъæлмæ каст, уыцы адæмæй иу къордимæ.

Фембæлды ма архайдтой Хицауады Сæрдар ТУСКЪАТЫ Таймураз, йæ хæдивæг ИКЪАТЫ Русланбег, арæзтад æмæ архитектурæйы министр КАСАТЫ Таймураз, йæ хæдивæг БИТЕТЫ Раман.

Республикæйы Сæргълæууæг Битарты Вячеслав куыд бамбарын кодта, афтæмæй дарддæрдæр сæ архайд нæ фæлæмæгъдæр кæндзысты, чидæриддæр сертификаттæ райсынмæ рады лæууы, уыдоны фарста лыггонд æрцæудзæн. «Паддзахад уын цы æххуыс бакодта, уый фæрцы уæ бон бауыдзæн фатертæ балхæнын, уæ ног хæдзæртты амонд, æнæниздзинад, фарн æрбынат кæнæнт, бирæ азты сæ æнæнизæй, зæрдæрайгæйæ цæрут», — загъта Битары-фырт.

Ссæдз адæймаджы сæ циндзинад не ‘мбæхсгæйæ, республикæйы Сæргълæууæджы къухæй райстой æмбæлгæ документтæ, сылгомæгты зæрдæтæ ма рæсугъд дидинджыты бæстытæй дæр балхæдтой. Афтæ зæгъæн ис, æмæ сертификатты хицæуттæ дæр æмæ хъуыддагыл чи бацархайдта, уыцы бæрнон адæймæгтæ дæр æмхуызонæй уыдысты райгонд. Мысыкаты Фатимæ бузныг загъта æппæты номæй Битарты Вячеславæн, йæ алыварс ахæм хорз æмкусджытæ кæй æрбамбырд кодта, уый тыххæй. «Уырнгæ дæр нæ нал кодта, искуы ацы бон æрлæудзæн, æмæ нæ тыхстдзинæдтæ фæсте аззайдзысты, уый. Тынг хорз хъуыды кæнæм, республикæмæ иу кæнæ дыууæ сертификаты куы æрвыстой, уыдæттæ. Бæрæг у, Уæрæсейы Хицауадимæ дæр уын хорз æмгуыстад кæй ис, сæ размæ сын фарстытæ кæй æвæрут, иумæйагæй сыл кæй архайут, уый. Бузныг арæзтад æмæ архитектурæйы министр Касаты Таймуразæн, йæ хæдивæг Битеты Раманæн, муниципалон хицаудзинадæн. Мах разы стæм, Цæгат Ирыстонæн ахæм разамонджытæ кæй ис, уымæй, нæ бон цы ран уа, уым уын уыдзыстæм æххуысгæнæг», — ахæм уыдысты цæрæнуаты сертификаты хицау Мысыкаты Фатимæйы ныхæстæ.

Республикæйы Сæргълæууæг куыд бафиппайдта, афтæмæй уавæр æмбæрстгонд у Уæрæсейы Хицауадæн, уæдæ Президент Владимир Путин дæр сын æппынæдзух хæс кæны вазыгджын хъуыддагыл бæрнонæй кусын.

 Нæ уацхæссæг

ОСТАВЬТЕ ОТВЕТ

Please enter your comment!
Please enter your name here