Уалдзыгон æрсидт

0
1065

 

Куыд ивгъуыд азты, афтæ ныр дæр æфсадмæ уалдзыгон æрсидт райдыдта 1 апрелы. Нæ уацхæссæг бабæрæг кодта горæт Дзæуджыхъæуы æфсæддон комиссарады æфсæддон службæмæ лæппуты цæттæгæнæн æмæ æрсидæн хайад

— Уалдзыгон æрсидтимæ баст мадзæлттæ æххæст кæнынмæ бавнæлдтам, — загъта горæты æфсæддон комиссар Беджызаты Роберт. — 15 апрелы службæ кæнынмæ арвитдзыстæм сидтонты фыццаг къорд. Службæ кæнынмæ фæсивæд æрвыст цæудзысты бæстæйы алы рæттæм. Калининградæй райдай æмæ Сахалинæй фæу, Волгоград, Астрахан, Дард Скæсæн…

Сидтонты къордтæм æвзаргæйæ, уæлдай æргом здахæм сæ уæлдæр ахуыргонддзинадмæ, уæлдайдæр уæлдæр техникон ахуыргонддзинадмæ æмæ хæдтулгæ скъæрын зоныны тыххæй æвдисæндар, категори С, æм ис æви нæй, уымæ. Сидтонты физикон цæттæдзинад хорз æмвæзады ис, — дзырдта мын дарддæр комиссар, — сæ дзæвгар хай сты спортсментæ. Фæлæ дзы ис, æнæниздзинады уавæрмæ гæсгæ сидтон къамис кæй сфауы, ахæмтæ дæр æмæ «тылифгæнджытæ». Æфсæддон службæйæ сæхи чи фæтылиф кæны, уыдонæн æфсæддон билеты бæсты лæвæрд цæуы справкæ. Ахæмтæн паддзахадон службæмæ бацæуыны бар нæй, нæдæр барадхъахъхъæнæг оргæнтæм. Запасы чи ис (дзырдæй-бæзгæтæ) æмæ 27 азы кæуыл нæма цæуы, уыдонæн сæ бон у медицинон къамис рацæуын. Сидтон лæппутæй чысыл сывæллæттæ кæмæн ис, уыдон службæ кæнынмæ, гæнæн æмæ амалæй, æрвыст цæудзысты хæстæг æфсæддон хæйттæм.

Медицинон къамисы ис психолог дæр. 2012 азæй фæстæмæ йын ам йæ хæстæ æххæст кæны Хадыхъаты Алинæ. «Мæ сæйраг хæс у, йæ нервытæ æмæ психикæ сæ раны кæмæн не сты, ахæмты сбæрæг кæнын. Ивгъуыд азæй фæстæмæ ног уæлæмхасæн тестмæ (30 фарсты) гæсгæ кусæм экстремистон архайд сбæрæг кæныныл дæр. Хуыцауæн табу, нæ сидтонты ‘хсæн ахæм нæма разынд», — загъта уый.

Куындыхаты Ираклийыл 21 азы цæуы. Æфсæддон хыгъды слæууынмæ æрбацыд. Разæй йæм æнхъæлмæ кæсы медицинон къамис. Уым та ис цалдæр хуызы специалисттæ. Мæнæ цы зæгъы оталаринголог Икъоты Ларисæ:

— Нæ лæппутæн сæ фылдæр боксæй æмæ хъæбысæй хæцынц, хъазынц футболæй, уыдон та спорты ахæм хуызтæ сты, кæцыты æнцонæй райсæн ис цæфтæ, сæстытæ, уæлдайдæр хъустæ æмæ фындзтæ. Гайморитæй рынчынты, кæнæ аллергион ринит кæмæ разыны, уыдоны арвитын рентгенмæ, стæй та стационармæ. Уый фæстæ ногæй æрбацæуы махмæ. Æз æркæсын дохтыр-рентгенолоджы æмæ стационары дохтырты хатдзæгтæм. Республикон æфсæддон комиссарады дæр ма йын æркæсынц йе ‘нæниздзинады уавæрмæ. Кæд æртæ дохтыры дæр сидтоны уавæры тыххæй æмхуызон хатдзæгмæ æрцæуынц, уæд æй æфсæддон службæйæ ссæрибар кæнынц.

Психологон фæлварæны æмæ медицинон къамис рацæуыны фæстæ лæппутæ æрлæууынц сидтон къамисы раз, кæцыйæн ацы хатт йæ сæргъы ис Бæройты Хасан. Къамисы уæнгтæ сты Мидхъуыддæгты министрады, «Иры Стыр Ныхас»-ы, Дзæуджыхъæуы бынæттон хиуынаффæйады администрацийы ахуырады управленийы æмæ æндæр кусæндæтты минæвæрттæ.

Уыцы бон къамис рацыдысты Мырзаганты Руслан, Гурам Мурашвили æмæ ма ноджыдæр дæсгай дзæуджыхъæуккаг сидтонтæ. Æнтыстджынæй баслужбæ кæнут, лæппутæ!

БАГАТЫ Аврам Къамтæ систа ЦÆГÆРАТЫ Дауыт

ОСТАВЬТЕ ОТВЕТ

Please enter your comment!
Please enter your name here