Кучиты Юрийы рухс ном мысгӕйӕ

0
47

Хъӕбӕлоты Билары номыл Сывӕллӕтты сфӕлдыстады республикон галуаны знон кадджын уавӕры райдыдта фӕлладуадзӕн лагер «Фидӕн»-ы ӕртыккаг рад.

Ардӕм ӕрбахуыдтой Фыдыбӕстӕйы Стыр хӕсты архайӕг, фыццӕгӕм ранджы капитан Багаты Алыксандры ӕмӕ Хӕстон-денджызон тыхты ветеран,  дыккӕгӕм ранджы капитан  Рӕмонты Алыксандры. Уыдон арфӕ ракодтой сабитӕн, цӕмӕй сӕ фӕлладуадзӕн бонтӕ зӕрдӕрухсӕй ацӕуой. Радзырдтой сын Кучиты Юрийы царды фӕндӕгты тыххӕй.

Ам ис 113 сывӕллоны, 7 азӕй  15 азы онг кӕуыл цӕуы, ахӕмтӕ. Фӕлладуагъды фӕткмӕ гӕсгӕ сабитӕ лагеры вӕййынц райсомы 9 сахатӕй изӕры 17 сахаты онг, бон дыууӕ хатты бахӕрынц. Сабитӕ иу минут дӕр дзӕгъӕлбадт нӕ фӕкӕнынц, ӕнкъард кӕнынмӕ сын рӕстӕг нӕй. Семӕ арӕзт цӕуынц сфӕлдыстадон конкурстӕ, викторинӕтӕ, спортивон хъӕзтытӕ. Ахуыр кӕнынц  нывтӕ кӕныныл, кафыныл, зарыныл, хуыйыныл ӕмӕ афтӕ дарддӕр.

Сывӕллӕтты сфӕлдыстады республикон галуаны разамонӕджы хӕдивӕг Калоты Тамарӕ нын куыд загъта, афтӕмӕй фыццаг рады сывӕллӕттӕн сӕ фӕлладуагъд баст уыд Театры азимӕ, дыккаг рад йӕ рӕстӕг ӕрвыста Хетӕгкаты Къостайы юбилейон райгуырӕн бонимӕ бӕрӕггӕнӕн мадзӕлттӕ аразгӕйӕ. Ныртӕккӕ цы ӕртыккаг рад ӕрбамбырд, уыцы сывӕллӕттӕ та ӕрымысыдысты нӕ зындгонд ӕмзӕххон, “Арктикӕ”-йы капитан, Социалистон Фӕллойы Хъӕбатыр Кучиты Юрийы ном. Уый фӕдыл арӕзт ӕрцӕудзӕн сӕрмагонд конкурс. Йӕ уӕлахиздзауӕн лӕвӕрд ӕрцӕудзӕн Кучиты Юрийы номимӕ баст зӕрдылдарӕн лӕвар.

Дарддӕр ма сывӕллӕттӕ архайдзысты ӕрдзы хъӕбысы туристон ӕмбырды. Уым сын фадат фӕуыдзӕн сӕ арӕхстдзинӕдтӕ равдисынӕн: хуыздӕр халагъуд фыццаг саразынӕй, алыхуызон спортивон конкурстӕ ӕмӕ афтӕ дарддӕр.

— Ацы туристон къорды нысан у, фыццаджыдӕр, сабиты ӕнӕниздзинад — сӕ физикон цӕттӕдзинад фӕфидардӕр кӕнын, дыккаджы та сын хъуамӕ ӕрдз бауарзын кӕнӕм, ӕрдзимӕ куыд цӕрын хъӕуы, куыд ӕй хъахъхъӕнын хъӕуы, уый сын бацамонӕм, — радзырдта Калоты Тамарӕ.

Хъӕздыг ӕмӕ цымыдисаг у лагеры куысты программӕ. Сывӕллӕттӕ ма экскурсион балцы ацӕудзысты Урсдонмӕ, Дыгургоммӕ, Майрӕмададжы денджызон фистӕгӕфсӕддонты цыртдзӕвӕнмӕ. Бабӕрӕг кӕндзысты Тибы Кучиты Юрийы райгуырӕн хъӕу Кимцъына, уым ныр дӕр ма фидар лӕууы Кучиты мыггаджы мӕсыг.

Нӕ зӕрдӕ дардзыстӕм, ацы сабитӕй дӕр Ирыстонӕн аккаг хъӕбултӕ кӕй байрӕздзӕн, ууыл. Сӕ ныййарджыты фӕндиаг уӕнт! Сывӕллӕтты ӕмӕ уазджыты йӕ аив зардӕй бахъӕлдзӕг кодта Республикӕ  Цӕгат Ирыстон-Аланийы адӕмон артист Дауыраты Эдуард.

 

Хъойбайты Галинӕ

Къамтӕ систа

Къӕбысты Харитон

ОСТАВЬТЕ ОТВЕТ

Please enter your comment!
Please enter your name here