Къостайы райгуырӕн бон уыдзӕн Мӕскуыйы дӕр

0
19

Ирон литературӕйы бындурӕвӕрӕг Хетӕгкаты Къостайы райгуырды 160 азы сбӕрӕг кӕныны тыххӕй юбилейон мадзӕлттӕ бацӕттӕ кӕныны фӕдыл организацион комитетӕн уыд ӕмбырд. Амыдта йӕ республикӕйы Хицауады Сӕрдары хӕдивӕг Иринӕ АЗИМОВА.

— Ирон поэт, драматург, публицист ӕмӕ нывгӕнӕг Хетӕгкаты Къостайы райгуырды 160 азы сбӕрӕг кӕнынмӕ бирӕ рӕстӕг нал баззад. Уый у ацы азы сӕйрагдӕр культурон цау, уымӕ гӕсгӕ ӕппӕт ирон адӕмы зӕрдӕйы дӕр хъуамӕ хицӕн бынат бацахса. Ирон классикы райгуырӕн бон сбӕрӕг кӕныны мадзӕлтты архайыны бар уыдзӕн Ирыстоны алы уазӕгӕн дӕр. 2019 азы 25 июны Республикӕ Цӕгат Ирыстон-Аланийы Хицауады уынаффӕйӕ фидаргонд ӕрцыд юбилейон мадзӕлтты пълан. Абон хъуамӕ сбӕрӕг кӕнӕм, юбилеймӕ куыд цӕттӕ стӕм, уый, — загъта Иринӕ Азимова.

Бӕрӕгбоны мадзӕлттӕ арӕзт ӕрцӕудзысты канд Къостайы райгуырӕн бон 15 октябры нӕ, фӕлӕ райдайдзысты дзӕвгар раздӕр, куыд Дзӕуджыхъӕуы, афтӕ республикӕйы районты дӕр. Уыдон уыдзысты равдыстытӕ, викторинӕтӕ, конкурстӕ, ӕвдыст ӕрцӕудзысты спектаклтӕ, кинонывтӕ, литературон изӕртӕ — пъланмӕ гӕсгӕ сты дӕсгай мадзӕлттӕ. Сӕ архайджытӕ уыдзысты канд республикӕйы нӕ, фӕлӕ Мӕскуыйы цӕрджытӕ дӕр.

28 октябрӕй Уӕрӕсейы райдайдзысты Ирон культурӕйы бонтӕ. Алыхуызон мадзӕлттӕ цӕудзысты Стыр ӕмӕ Чысыл театрты сценӕтыл, Уӕрӕсейы паддзахадон библиотекӕйы. Мӕскуыйы цӕрджытӕ базонгӕ уыдзысты ирон адӕмы номдзыддӕр хъӕбул Къостайы сфӕлдыстадимӕ, сӕ бон бабӕрӕг кӕнын уыдзӕн, РЦИ-Аланийы нывгӕнджытӕ Къостайы райгуырды юбилеймӕ цы нывтӕ сарӕзтой, уыдоны равдыст дӕр.

Фӕлӕ сӕйраг мадзӕлттӕ уыдзысты Цӕгат Ирыстоны. Дзӕуджыхъӕуы Рождественскийы уынджы цы культурон бынты ног объект рабӕрӕг, ууыл сӕвӕрдзысты номарӕн фӕйнӕг. Уый у «Хетӕгкаты Къостайы хӕдзар, поэт уӕззау рынчын кӕй фӕци ӕмӕ Лабӕмӕ кӕй ацыд, уымӕ гӕсгӕ кӕронмӕ арӕзт чи не ‘рцыд, уыцы хӕдзар». Фӕйнӕгӕн йӕ эскиз ныридӕгӕн у цӕттӕ.

Уырыссаг академион театры коллектив театрдзаутӕн цӕттӕ кӕны Къостайы поэмӕ «Фатимӕ»-мӕ гӕсгӕ ӕвӕрд спектаклы премьерӕ, ӕвдыст ӕрцӕудзӕн 11 октябры. Сентябры кӕрон телеуынынады ӕвдыст ӕрцӕудзӕн зындгонд киноныв «Фатимӕ» ирон ӕвзагыл. Йӕ раивыныл ныртӕккӕ кусы ПТРК «Алани» Ирон театры актертимӕ.

Республикӕйы цӕрджытӕн сӕ бон архайын уыдзӕн егъау литературон-фольклорон бӕрӕгбоны. Уый арӕзт ӕрцӕудзӕн 15 октябры Къостайы райгуырӕн хъӕу Нары.

Уымӕй уӕлдай, Цӕгат Ирыстоны цӕрджытӕн бацӕттӕ кӕндзысты равдыст. Уым фенӕн уыдзӕн, 1964 азӕй 2014 азмӕ литературӕ ӕмӕ аивады къабазы Хетӕгкаты Къостайы номыл премийы аккаг чи ссис, уыцы лауреатты уацмыстӕ, стӕй ма, Тугъанты Махарбеджы номыл аивадон музейы фондты цы уацмыстӕ ис, уыдоны равдыст.

Организацион комитеты уӕнгтӕ стыр ӕргом аздӕхтой, республикӕйы ӕппӕт территорийыл дӕр Къостайӕн цы цыртдзӕвӕнтӕ ис, уыдон сног кӕнынмӕ. Уыцы куыстыты фӕрцы се ‘ппӕт дӕр сӕ хуыз аивдзысты.

РЦИ-Аланийы Сӕргълӕууӕджы

ӕмӕ Хицауады пресс-службӕ   

ОСТАВЬТЕ ОТВЕТ

Please enter your comment!
Please enter your name here