Сыгъзӕрин ӕмӕ бронзӕ майдантӕ

0
19

Уӕгъдибар хъӕбысхӕстӕй Польшӕйы сӕйраг горӕт Варшавӕйы  цыдысты Вацлав Циалковскийы номарӕн дунеон турниры ерыстӕ.

Уӕрӕсейы командӕйы цы фараст богалы хӕцыд, уыдон иууылдӕр райстой  хӕрзиуджытӕ. Рамбылдтой 4 сыгъзӕрины, 1  ӕвзист ӕмӕ 4 бронзӕ майданы. Афтӕмӕй командӕты ‘хсӕн  бацахстой 1-аг бынат.

Уӕрӕсейы командӕйы цы дыууӕ ирон богалы уыд, уыдонӕн бантыст сыгъзӕрин ӕмӕ бронзӕ хӕрзиуджытӕ рамбулын.

86 кг онг уӕзы иттӕг хорз рахӕцыд ӕрчъегкаты Тотрадзы хъомылгӕнинаг  Найфонты Артур. Йӕ уӕзы цы зындгонд тыхджын богӕлттӕ хӕцыд, уыдонӕй Артур фембӕлд цыппаримӕ ӕмӕ се ‘ппӕтыл дӕр фӕуӕлахиз. Артур турниры 1/8 хайы сыгъдӕгӕй рамбылдта польшӕйаг богалӕй, уый фӕстӕ 1/4 хайы фӕуӕлахиз казахаг богалыл. Ерысты 1/2 хайы йӕ ныхмӕлӕууӕг уыди туркаг зындгонд богал Фатих Эрдин ӕмӕ уымӕн дӕр йӕ бон нӕ баци Найфоны-фырты размӕбырст бауромын. Кӕронбӕттӕны Артуры ныхмӕлӕууӕг уыди польшӕйаг тыхджын богал Збигнев Барановски. Уый тынг тырныдта йе ‘мбӕстӕгты раз уӕлахиздзау суӕвыныл, фӕлӕ йӕ фӕнд йӕ къухы нӕ бафтыд. Артур ыл фӕуӕлахиз 4:1 хыгъдӕй ӕмӕ ссис Вацлав Циалковскийы номарӕн турниры уӕлахиздзау.

Нӕ иннӕ богал, Уӕрӕсейы ацы азы чемпион Хуыгаты Алан, 125 кг онг уӕзы хӕцгӕйӕ, йӕ фыццаг дыууӕ ныхмӕлӕууӕгыл куы фӕуӕлахиз, уӕд ерысты 1/2 хайы фембӕлд канадӕйаг уӕззаууӕзон богал Амар Дхесиимӕ. Сӕ ныхмӕлӕуд рауад хъазуатон. Дыууӕ богалы дӕр уыдысты иттӕг къӕрцхъус ӕмӕ дӕргъвӕтин рӕстӕг рӕдыд не ‘руагътой. ӕппынфӕстаг, Хуыгайы-фырт, размӕ бырсгӕйӕ, рӕдыд ӕруагъта, ӕмӕ сӕ фембӕлд ахицӕн 0:1 хыгъдӕй Дхесины пайдайӕн. Хуыгаты Аланӕн ма фадат уыди 3-аг бынатыл тох кӕнынӕн, ӕмӕ уыцы фембӕлды куы фӕуӕлахиз, уӕд бацахста 3-аг бынат.

Уӕрӕсейы иннӕ богӕлттӕй сыгъзӕрин майдантӕ рамбылдтой: Арыйаан Тютрин (57 кг), Магомедрасул Идрисов (61 кг) ӕмӕ Гаджи Набиев (79 кг). ӕвзист майданӕй хорзӕхджын ссис Билял Махов (125 кг). Бронзӕ майдантӕ ма Хуыгаты Аланӕй уӕлдай рамбылдтой: Рамиз Гамзатов (57 кг), Рамазан Рамазанов (70 кг) ӕмӕ Даурен Куруглиев (86 кг).

Иннӕ уӕзты Вацлав Циалковскийы номарӕн турниры ацы азы уӕлахиздзаутӕ систы: 65 кг — Джон Майкл Дьякомихалис (АИШ), 70 кг — Хайдар Явуз (Турк), 74 кг — Якуп Гор (Турк), 92 кг — Сулейман Карадениз (Турк), 97 кг — Алишер Йергали (Казахстан), 125 кг — Амар Дхеси (Канадӕ).

Командӕты ‘хсӕн фыццаг бынат  Уӕрӕсейы богӕлттӕ кӕй бацахстой, уый тыххӕй сын лӕвӕрд ӕрцыд сӕрмагонд Кубок. Исгӕ та йӕ ракодта  турниры Уӕрӕсейы командӕйы сӕргълӕууӕг Гозымты Хетӕг.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here