Адӕймаджы ӕнӕниздзинады бындур

0
15

Адӕймагыл, уӕлдайдӕр сывӕллоныл, йӕ физикон рӕзт куыд ахады, уый тыххӕй фыст уыд суанг рагон бердзенаг куыстыты. Физикон ӕгъдауӕй сывӕллон цас фидардӕр уа, уыйбӕрц ын зындзинӕдты сӕрты хизын у ӕнцондӕр, ахӕм сывӕллон вӕййы ӕгъдауджындӕр, хиуылхӕст ӕмӕ ныфсджындӕр.

Организмӕй фидар адӕймагӕн алы низты ныхмӕ тох кӕнын у ӕнцондӕр, алы рыстӕн дӕр уый у фӕразондӕр. Астӕуккаг ӕнусты истори хъуыстгонд у йӕ хъӕбатыр хӕстонтӕй, рыцӕрты турниртӕ ӕмӕ хӕстон стӕртӕй. Йӕ буар цӕфтӕй бахъахъхъӕныны тыххӕй хӕстон адӕймаджы дарын хъуыд згъӕрӕй конд хотыхтӕ. Уыдон рог кӕм уыдысты. Сӕ хӕссын, стӕй ма хӕцӕнгарз къухы дарынӕн ӕмӕ дзы уыцы-иу рӕстӕг пайда кӕнынӕн гыццыл хъару нӕ хъуыд. Уыцы азты физикон культурӕ канд рӕсугъддзинады тыххӕй нал хъуыд, фӕлӕ ма ссис хъару ӕмӕ лӕгдзинады ӕнӕмӕнгхъӕугӕ хъуыддаг.

Ныртӕккӕ спорты ахадындзинадӕн аккаг аргъгонд, хъыгагӕн, нал цӕуы. Скъолаты урокты размӕ сывӕллӕттӕ нал фӕкӕнынц цыбыр спортивон фӕлтӕрӕнтӕ. Уӕдӕ, раздӕр куыд уыд, афтӕ промышленнон куыстуӕтты дӕр, «пятиминуткӕ»» кӕй хуыдтой, уый дӕр нал вӕййы.

Цавӕрдӕр, зӕгъӕм, финансон аххосӕгтӕм гӕсгӕ спортивон залмӕ кӕнӕ бассейнмӕ цӕуыны фадат кӕмӕн нӕй, уыдонӕн сӕ бон у физикон ӕгъдауӕй рӕзын хӕдзары уавӕрты, зӕгъӕм, гантельтӕй пайда кӕнын. Бынтон зивӕггӕнаг чи разына, уымӕн дӕр пайда у, цалдӕр хатты бынтон хуымӕтӕг физикон фӕлтӕрӕнтӕ акӕнын. Ӕппынфӕстаг, куыстмӕ транспортӕй цӕуыны бӕсты адӕймаг фистӕгӕй куы цӕуа, уӕд уый дӕр уыдзӕн ӕнӕниздзинадӕн тынг пайда. Фистӕгӕй цӕуын у уӕлдай ахсджиагдӕр, бадгӕ куыст чи кӕны, уыдонӕн.

Физкультурничы бон бӕрӕг кӕныны нысан у, физикон культурӕ ӕмӕ спортимӕ баст цыдӕриддӕр лыггӕнинаг фарстытӕ ис, уыдонмӕ ӕппӕт ӕхсӕнады ӕргом аздахын.

Уырны нӕ, физикон культурӕ йӕхимӕ хӕстӕг чи айса, уыдоны нымӕц фидӕнмӕ нӕ бӕстӕйы ноджы кӕй фӕфылдӕр уыдзӕн, ӕмӕ спорт ӕцӕг дзыллон кӕй суыдзӕн, уый. Ӕмӕ уӕд наци уыдзӕн ӕнӕниз, фидар ӕмӕ цардхъом.

Уе ‘ппӕт дӕр ӕнӕниз ут!

ЦХУЫРБАТЫ Эллӕ,

Медицинон профилактикӕйы республикон центры дохтыр-методист

ОСТАВЬТЕ ОТВЕТ

Please enter your comment!
Please enter your name here