Нывондхӕссӕн бӕрӕгбон Хъуырман

0
14

Ӕрбахӕццӕ та нӕм, иунӕг кадджын Хуыцауы фӕндӕй, пысылмон адӕмы стырдӕр бӕрӕгбӕттӕй иу — Хъуырман. Пысылмон нымадмӕ гӕсгӕ уый вӕййы зуль-хиджайы мӕйы 10-ӕм бон (ацы аз йӕ райдайӕн хауы хуыцаубонмӕ, 11 августмӕ). Ацы бонты кӕронмӕ ахӕццӕ сты хадзы кӕныны ӕгъдӕуттӕ, Меккӕмӕ хадзы кӕнынмӕ цы пысылмон адӕм ӕрӕмбырд дунейы алы кӕрӕттӕй, уыдонӕн.

Пысылмон динмӕ гӕсгӕ ис дыууӕ стыр бӕрӕгбоны. Уыдонӕй иу у Комуадзӕн (араббагау — ‘Ид аль-Фитр, туркагау — Ураза-байрам), иннӕ та — Хъуырман (араббагау — ‘Ид аль-адха, туркагау — Курбан-байрам). Бӕрӕгбон у алы майрӕмбон дӕр, уӕд адӕм мӕзджытты скӕнынц иумӕ джума-ламаз.

Хъуырманы бӕрӕгбон ӕмбӕлы кусарт акӕнын хадзы кӕныны балцы чи ис, ӕрмӕст уымӕн нӕ, фӕлӕ йӕ бон кӕмӕн у ӕмӕ йӕ фадат кӕмӕн амоны, алы ахӕм пысылмон адӕймагӕн кӕнӕ бинонты къордӕн дӕр. Хъуырмайнаг (хъуырмалыхъ) кусӕрттагӕн бӕззы, афӕдзӕй къаддӕр кӕуыл нӕ цӕуа, ахӕм фыс кӕнӕ сӕгъ. Бӕззы афӕдздзыды йас ӕхсӕзмӕйдзыд уӕрыкк дӕр. Стурвосӕй та, дыууӕ азӕй къаддӕр кӕуыл нӕ цӕуа, ахӕм. Авд лӕджы кӕнӕ авд бинонты къорды иу стыр кусарт (гал, хъуг, къамбец) иумӕйагӕй куы акӕной, уӕд уый сӕ алкӕмӕн дӕр нымад у ӕгъгъӕдыл. Хъуырмайнаг кусӕрттагӕн нӕ бӕззы сахъат, рынчын, йӕ та тынг фыдхуыз фос. Афтӕ куырм, къуылых, ӕнӕдӕндаг, йӕ иу хъусӕн, йӕ къӕдзилӕн кӕнӕ цӕстӕн йӕ фылдӕр хай кӕмӕн нӕ уа, ахӕм фос дӕр.

Кусӕрттаджы туг суадзыны хӕдразмӕ ӕмбӕлы зӕгъын сӕрмагонд ду’а: «БисмиЛляхи, Аллаху Акбар» («Иунӕг Хуыцауы номимӕ, Иунӕг Хуыцауӕй сӕйрагдӕр ницы ис»). Ӕргӕвдын та хъӕуы цыргъ кардӕй, цӕмӕй фос хъизӕмар ма кӕна. Кусарт акӕнӕн ис цыппар боны дӕргъы: бӕрӕгбоны фыццаг бон райсомӕй (бӕрӕгбоны ламазы фӕстӕ) суанг цыппӕрӕм боны фӕссихоры ламазы рӕстӕджы райдианы онг. Дзидза акӕнынц ӕртӕ дихы. Иу дзы — дӕхи, дыккаг уӕрст цӕуы мӕгуыртӕн, уӕззау рынчынтӕн, фӕкӕсинӕгтӕн удыбӕстӕйы охыл. Ӕртыккаг хайӕ та ӕмбӕлы уазджыты, хӕстӕджыты ӕмӕ сыхӕгты сбуц кӕнын. Нывондӕн хаст кусӕрттаджы дзидза кӕнӕ царм уӕй кӕнын не ‘мбӕлы, ӕрмӕст — лӕвар дӕттын.

Хъыгагӕн, арӕх Хъуырманы бӕрӕгбон ӕмӕ уыцы бон нывондхӕссыны ӕгъдау баст ӕрцӕуынц ӕрмӕстдӕр марды ӕгъдауимӕ, зианы кӕндтытимӕ. Хъуырман у бӕрӕгбон, циндзинад, ӕмӕ ницы бар дары марды кӕндтытӕм, уӕлмӕрдтӕм цӕуынмӕ сӕрмагондӕй уыцы бонты.

Кӕй ранымадтам, уыцы нывондхӕссыны ӕмӕ бӕрӕгбоны уагӕвӕрдтӕ сты дины ӕгъдаумӕ ӕмӕ ахуыргӕндты уынаффӕмӕ гӕсгӕ, ӕнӕмӕнг ӕххӕстгӕнгӕ.

КЪУБАЛТЫ Аркади

ОСТАВЬТЕ ОТВЕТ

Please enter your comment!
Please enter your name here