Зӕрдӕ ӕвӕрынц ног скъолатӕ, рӕвдауӕндӕттӕ, цӕрӕнуӕттӕй…

0
8

Хур ӕмӕ ныл къӕвда куы сӕвварс вӕййынц, уӕд нӕхицӕн бацагурӕм цавӕрдӕр удӕнцойдӕр бынӕттӕ. Чи зоны нӕ ӕвӕстиатӕй хъуыддӕгты фӕдыл атагъд кӕнын дӕр фӕхъӕуы, фӕлӕ сӕ аргъӕвӕм, мӕнӕ куы фӕбон кӕна, уӕд, зӕгъгӕ. Ис ахӕм куыстадон архайд, ӕмӕ дзы нӕдӕр судзгӕ хур у нымад, нӕдӕр къӕвда ӕмӕ мит. «Ацы хӕдзар, ацы скъола хъуамӕ саразӕм бӕлвырд ӕмгъуыдмӕ, уымӕй нын иуварс ахизӕн нӕй», — ахӕм фӕткмӕ гӕсгӕ кусынц аразджытӕ. Иу азӕй иннӕмӕ Цӕгат Ирыстоны аразджытӕ сӕ куыст лӕмӕгъдӕр нӕ кӕнынц, стыр ӕргом здахынц социалон ахадындзинады объекттӕм.

Ӕппӕт уынаффӕтӕ, нысантӕ фидар кӕны Арӕзтад ӕмӕ архитектурӕйы министрад. Ӕрмӕст фарон Дзӕуджыхъӕуы 12-ӕм микрорайоны арӕзт ӕрцыд скъола 500 бынатимӕ, 18-ӕм микрорайоны — рӕвдауӕндон 280 сабийӕн. Уӕдӕ 27-ӕм дзӕуджыхъӕуккаг скъола афтӕ рацарӕзтой, ӕмӕ йӕ уындӕй, йӕ фадӕттӕй зӕрдӕ рухс кӕны. Ӕрӕфы районы хъӕу Советскоейы, Беслӕны, Алагиры байгом ис цыппар ног рӕвдауӕндоны, алы ран дӕр дзы 120 бынаты. Ацы аз дӕр аразджытӕ ӕвӕрынц фидар нысантӕ, хъуамӕ саразой 49 алыхуызон объекты. Уыдонӕн сӕ егъаудӕртӕ сты: Дзӕуджыхъӕуы 1100 ӕмӕ 500 бынӕттимӕ дыууӕ скъолайы, Мӕздӕджы — скъола 500 бынатимӕ ӕмӕ станицӕ Луковскаяйы рӕвдауӕндон 150 бынатимӕ.

Тагъд ӕххуысы республикон клиникон рынчындоны бындуронӕй рацараздзысты цалдӕр хайады бӕстыхӕйттӕ, ахӕм куыстытӕ ма бакӕндзысты Сывӕллӕтты республикон клиникон рынчындоны дӕр. Рӕвдауӕндӕттӕм рады цы сабитӕ лӕууынц, уыдоныл хъуыды кӕнгӕйӕ, ацы аз 18 рӕвдауӕндонмӕ бафтаудзысты уӕлӕмхасӕн бӕстыхӕйттӕ. Спортивон хъӕбысхӕстӕй тренировкӕгӕнӕн центрӕй уӕлдай ма сывӕллӕттӕн сараздзысты 10 бирӕфатаджын спортивон-дзӕбӕхгӕнӕн комплексы, 4 физкультурон-дзӕбӕхгӕнӕн гом комплексы. Бындуронӕй базилдзысты хъӕууон скъолаты спортивон залтӕм, Культурӕйы хӕдзӕрттӕм. Районты бавналдзысты ног фелсырон-акушерон пункттӕ ӕмӕ амбулаторитӕ аразынмӕ.

Арӕзтад ӕмӕ архитектурӕйы министрады бирӕвӕрсыг архайды фӕрцы граждӕнты алы категоритӕн лыггонд цӕуынц сӕ цӕрӕнуӕтты фарстытӕ. Фарон ӕрыгон бинонтӕй 226 систы цӕрӕнуӕттӕ балхӕныны ӕвдисӕндарты хицӕуттӕ. Ацы азы фыццаг ӕмбисы та сӕ цӕрӕнуӕтты уавӕртӕ фӕхуыздӕр кодтой 78 ӕрыгон бинонтӕ. Хъӕуты кусӕг ӕмӕ цӕрӕг специалисттӕй 35 азы онг кӕуыл цӕуы, уыцы ахуыргӕнджытӕ, дохтыртӕ, иннӕ кусджытӕй фарон цӕрӕнуӕттӕ балхӕныны тыххӕй ӕххуыс райстой 16 адӕймаджы. Ацы азы фыццаг кварталы та — 6 специалисты.

Ахӕм замантӕ уыд, ӕмӕ, ӕнӕбары сӕ цӕрӕн бынӕттӕ чи ныууагъта, уыдоны номыл-иу федералон центр республикӕмӕ ӕрӕрвыста иу сертификат. Фарон ахӕм документты хицӕуттӕ систы 488 амондджын бинонтӕ. Ацы азы фыццаг ӕмбисы та — 400 бинонтӕ. Рохуаты нӕ баззадысты Чернобылы бӕллӕхы, куыстадон иугонд «Маяк»-ы срӕмыгъды фӕстиуджытӕ иуварсгӕнджытӕ ӕмӕ ма сӕ архайд ахӕм вазыгджыныл нымад кӕмӕн ӕрцыд, уыцы адӕм дӕр. Сӕ аргъ 49,9 милуан сомы кӕмӕн уыд, ахӕм сертификаттӕ фарон райстой 17 бинонтӕ. Фыдыбӕстӕйы Стыр хӕсты ветерантӕ, хӕсты чи фесӕфт, уыдоны бинонтӕй 23 систы сертификатты хицӕуттӕ, бахъуыд сын 24,6 милуан сомы. Инвалидтимӕ бинонтӕ райстой 6 сертификаты 5,7 милуан сомӕн. Тарнизы хӕцгӕ хуызӕй рынчынтӕй 11-ӕн радтой сертификаттӕ.

Ацы азы фыццаг ӕмбисы дӕр уыцы хъуыддӕгтыл цӕуы архайд. Зӕгъӕм, фаронӕй дыууӕ хатты фӕфылдӕр, Фыдыбӕстӕйы Стыр хӕсты ветерантӕ ӕмӕ, хӕсты чи фӕмард, уыдоны бинонтӕн лӕвӕрд сертификатты нымӕц. Райстой сӕ 43 бинонтӕ. Инвалидимӕ бинонтӕ та — 17 ахӕм ӕвдисӕндары. Хӕстон цауты архайджытӕй 3 систы цӕрӕнуӕтты сертификатты хицӕуттӕ.

Цӕгат Ирыстон бӕрнонӕй бавнӕлдта национ проекттӕ ӕххӕст кӕнынмӕ. Арӕзтад ӕмӕ архитектурӕйы министрад национ проект «Цӕрӕнуӕттӕ ӕмӕ горӕтаг алфамблай»-йы фӕлгӕты бацӕттӕ кодта регионалон проект «Цӕрӕнуӕттӕ». Йӕ сӕйраг нысанмӕ гӕсгӕ цӕрӕнуӕттӕ аразыны бӕрц Уӕрӕсейы азмӕ хъуамӕ фӕфылдӕр уа 120 милуан квадратон метры онг. Ацы аз хъуамӕ нӕ республикӕйы цӕрӕнуӕттӕ саразой 214 мин квадратон метры, 2024 азмӕ хъуамӕ схӕццӕ уа 291 мин квадратон метрмӕ. Азы фыццаг ӕмбисмӕ пъланӕн йӕ 57 проценты къухы бафтыдысты, ома, сарӕзтой 122 мин квадратон метры.

Уӕрӕсейы Арӕзтады министрадимӕ нын цы бадзырд ис, уый бындурыл Цӕгат Ирыстонӕн радих кодтой субсидитӕ 523,6 милуан сомы. Хъуамӕ уыдонӕй Дзӕуджыхъӕуы 18-ӕм микрорайоны саразой скъола 500 бынатимӕ, уымӕй дарддӕр — микрорайоны фӕндӕгтӕ дӕр. Цӕгат Ирыстоны Арӕзтад ӕмӕ архитектурӕйы министрад, ӕппӕт нысантӕ царды кӕимӕ ӕххӕст кӕны, уыцы арӕзтадон организацитӕ сӕ бӕрӕгбоныл ӕмбӕлынц ныфсджынӕй. Адӕмӕн зӕрдӕ цы хъуыддӕгтӕй ӕвӕрынц, уыдон кӕронмӕ кӕй ахӕццӕ кӕндзысты, уый дызӕрдыггаг нӕу. Уыдон та сты ног скъолатӕ, рӕвдауӕндӕттӕ, фатертӕ, спортзалтӕ, клубтӕ…

Бутаты Эльзӕ

ОСТАВЬТЕ ОТВЕТ

Please enter your comment!
Please enter your name here