Зындгонд ахуыргонд ӕмӕ  цӕстуарзон зондамонӕг

0
11

Адӕймаг  йӕхи цы дӕсныйадӕн снывонд кӕна, уым ын  фӕзминаг, зондджын ӕмӕ  фӕлтӕрдджын   хистӕртӕ куы уа, уӕд  йӕ хъысмӕтӕй  вӕййы разы. Ахӕм зондджын рухстауӕг у дӕсны ахуыргӕнӕг, уӕздан ирон сылгоймаг, ЦИПУ-йы ирон литературӕйы кафедрӕйы раздӕры сӕргълӕууӕг, филологон наукӕты кандидат, РЦИ-Аланийы  ахуырады сгуыхт кусӕг Хъантемыраты Римӕ.

Уымӕн йӕ  цард баст у  ирон ӕвзаг ӕмӕ литаратурӕимӕ, сӕ иузӕрдион лӕггадгӕнджыты цӕттӕ кӕныны  арфӕйаг хъуыддагимӕ. 1968 азы Римӕ Цӕгат Ирыстоны паддзахадон педагогон институт каст куы фӕци, уӕд ахуыргӕнӕджы дӕсныйады фыццаг къахдзӕфтӕ акодта Фарныхъӕуы астӕуккаг скъолайы.  Уый фӕстӕ мадӕлон ӕвзаджы  рухс тыдта  педагогон ӕмӕ  хъӕууонхӕдзарадон институтты студентты зӕрдӕты.

1973 азы Римӕ сси  ЦИПУ-йы  ирон филологийы ӕмӕ ӕвзагзонынады кафедрӕйы  хистӕр лаборант.   Уым кусгӕйӕ, йӕхи равдыста, йӕ  рухсадон ӕмӕ наукон архайды иударон хъуыдытыл хӕст чи нӕу, над фӕндӕгтыл дзы чи нӕ цӕуы, фӕлӕ дӕллаг галау  ирон удварны хуымы йӕ дзывыр арф чи садзы, ахӕм  цӕстуарзон ахуыргӕнӕгӕй, лекторӕй ӕмӕ ахуыргондӕй.  1980 азы Римӕ  ӕнтыстджынӕй бахъахъхъӕдта  филологон зонӕдты кандидаты диссертаци. Йӕ монографи «Адӕмы удварны проблемӕ коллективизацийы рӕстӕджы» хицӕн чиныгӕй куы рацыд, уӕд ыл ӕхсызгонӕй сӕмбӕлдысты канд  Ирыстоны наукон ӕхсӕнады минӕвӕрттӕ нӕ, фӕлӕ ма  ахуыргӕнджытӕ ӕмӕ студенттӕ дӕр. Фондз азӕй фылдӕр   уыд   филологон факультеты цур  чысыл университеты декан. Фынддӕс азӕй фылдӕр та арӕхстджын  разамынд лӕвӕрдта ЦИПУ-йы ирон литературӕйы кафедрӕйӕн. Уыцы рӕстӕджыты   йӕ разамындӕй дӕсгай студенттӕ бахъахъхъӕдтой курсон  ӕмӕ  дипломон куыстытӕ. Бӕстон наукон, ахуырадон, эстетикон домӕнтӕн дзуапп лӕвӕрдтой йӕ лекцион ӕмӕ практикон ахуыртӕ. Кӕддӕриддӕр-иу иттӕг разӕнгардӕй дзырдта  Ирыстоны  фарны хъӕбултӕ Хетӕгкаты Къостайы, Мамсыраты Темырболаты, Хъаныхъуаты Иналы, Брытъиаты  Елбыздыхъойы, Мамытты Стефаны,  Цӕлыккаты Ахмӕты, фӕсарӕнты цӕрӕг ирӕттӕй сфӕлдыстадон куыст чи кодта ӕмӕ кӕны, уыдоны цард ӕмӕ сфӕлдыстадон фӕндагыл, сывӕллӕтты литературӕйыл. Уыимӕ йӕ алы лекцийы  дӕр архайдта, цы фыссӕджы кӕнӕ поэты сфӕлдыстадыл дзырдта, уый  йӕхи зӕрдӕмӕ куыд  цӕуы, афтӕ йӕ студенттӕн дӕр бауарзын кӕныныл. Йӕ хъӕппӕрисӕй алы азты ӕнтыстджынӕй арӕзт ӕрцыдысты дунеон ӕмӕ республикон конференцитӕ. Уыдоны-иу канд дыууӕ Ирыстоны  ахуыргӕндтӕ нӕ архайдтой, фӕлӕ ма дзы-иу мидисджын докладтӕ скодтой Цӕгат  Кавказы ӕмӕ нӕ бӕстӕйы зындгонд ахуыргӕндтӕ дӕр.

Римӕ хорз  зыдта ӕмӕ зоны, студентӕн ирон литературӕйы фарстыты тыххӕй ӕрмӕг афтӕ бацамонын, цӕмӕй йӕм канд цымыдисдзинад нӕ, фӕлӕ арфдӕр иртасыны тырнындзинад фӕзына.  Уый у йӕ рухстауӕн ӕмӕ зонадон архайды сӕйрагдӕр сгуыхт.  Канд  нӕ университеты нӕ, фӕлӕ йӕ зонд ӕмӕ уды фарнӕй  Римӕ ауды  Ирыстоны  астӕуккаг скъолаты  ахуырдзаутыл ӕмӕ ахуыргӕнджытыл. У ирон литературӕйӕ 3-аг ӕмӕ 10-ӕм кълӕсты ахуыргӕнӕн чингуыты автор. Бирӕ тыхтӕ бахардз кодта ирон драматургийы бындурӕвӕрӕг Брытъиаты Елбыздыхъойы цард ӕмӕ сфӕлдыстадӕй  къамты альбом ӕмӕ критикон уацты чиныг бацӕттӕ кӕныныл. Ацы куыстытӕ йын мыхуыры рацыдысты рауагъдад «Ир»-ы. Пайда сӕ кӕнынц Цӕгат ӕмӕ Хуссар Ирыстоны уӕлдӕр ӕмӕ астӕуккаг скъолаты ахуыргӕнджытӕ, студенттӕ ӕмӕ аспиранттӕ.

Ивгъуыд ӕнусы  90-ӕм азты райдайӕны Римӕ мыхуыры рауагъта  ирон литературӕйы критикон уацты ӕмбырдгонд.  Уый йӕ рӕстӕджы  рухс федта дыууӕ томӕй. Ныртӕккӕ йын суанг библиотекӕты дӕр ссарӕн нал ис.  Фӕстаг азты  Римӕйы къухы цы зонадон ӕнтыстытӕ бафтыд, уыдонмӕ хауы, фӕсарӕнты цӕрӕг ирӕттӕй сфӕлдыстадон куыст чи кодта ӕмӕ кӕны, уыдоны уацмыстӕ хицӕн чиныгӕй кӕй бацӕттӕ кодта ӕмӕ рауагъта, уый. Хъантемыроны фӕрцы  нӕ дзыллӕ базыдтой,   Ирыстоны  удварнӕн бирӕ хӕрзты кӕй бацыд дины кусӕг, адӕмон сфӕлдыстад ӕмбырдгӕнӕг Мамытты Стефан. Йӕ уацмыстӕ (радзырдтӕ, пьесӕ, адӕмон сфӕлдыстады  бынтӕ, тӕлмацтӕ)  мургай, халгай фембырд кодта ӕмӕ сӕ бӕстон разныхасимӕ рауагъта хицӕн чингуытӕй дыууӕ хатты. Уыцы ӕнтыстытӕн дӕр дыууӕ  Ирыстоны зонадон ӕмӕ культурон ӕхсӕнад скодтой  аккаг аргъ.

Уымӕй уӕлдай ма, университеты кусгӕйӕ,  иудадзыгдӕр архайдта   нӕ республикӕйы зонадон ӕмӕ ӕхсӕнадон царды. Уыд  нӕ республикӕйы Сӕргълӕууӕджы цур  ирон ӕвзаг бахъахъхъӕныны ӕмӕ рӕзты паддзахадон къамисы, Ахуырад ӕмӕ наукӕйы министрады методикон советы ӕмӕ паддзахадон стипендитӕ дӕттыны фӕдыл къамисты уӕнг. Йӕ арфхъуыдыджын фыстытыл-иу сӕ цӕст ӕрӕвӕрдтой  нӕ ахуыргӕндтӕ ӕмӕ культурӕйы кусджытӕ.

Кӕд ныртӕккӕ  университеты нал кусы, уӕддӕр ӕнцад бадын йӕ сӕрмӕ нӕ хӕссы, ныр та у  прогимназ «Эрудит»-ы ахуыргӕнӕг. Ам дӕр  ахуыргӕнджыты коллективӕн у йӕ цӕстуарзон  зондамонӕг,  рӕвдауӕг  хистӕр.

Ацы бонты зындгонд рухстауӕг ӕмӕ ахуыргонд Хъантемыраты Римӕ бӕрӕг кӕны йӕ юбилей. Ӕмӕ йын нӕ цӕст уарзы:  йӕ сӕдӕ азы рындзӕй уӕнгрогӕй ӕмӕ хъӕлдзӕгӕй  акӕсӕд.

Гасанты Валери

ОСТАВЬТЕ ОТВЕТ

Please enter your comment!
Please enter your name here