Бирӕвӕрсыг ӕмӕ рӕдау курдиат

0
32

Зындгонд фыссӕг, Хетӕгкаты Къостайы номыл паддзахадон премийы лауреат Мамсыраты Дӕбейы райгуырдыл сӕххӕст 110 азы

Мамсыраты Дӕбе йӕ рӕстӕджы уыд ирон прозаикты зынгӕдӕр ӕмӕ номдзыддӕр. Уый арф ӕнкъардта рӕстӕджы цыд, царды улӕфт ӕмӕ цӕугӕ боны домӕнтӕ. Иудадзыг уыд литературон цардӕн йӕ гуылфӕнты, куыста бирӕ ӕмӕ ӕнтыстджынӕй, йӕ уацмыстӕ ӕндӕвтой ирон прозӕйы рӕзтыл.

Мамсыраты Хабийы фырт Дӕбе райгуырди 1909 азы 9 августы Быдыры Дӕргъӕвсы. Хӕдзар уыд ӕвӕрӕз. Уыди дзы бирӕ сывӕллӕттӕ. Йӕ фыд ын йӕ райгуырдмӕ нӕ банхъӕлмӕ каст, ӕмӕ Дӕбе ӕххӕстӕй бавзӕрста мӕгуыр ӕмӕ сидзӕры хъысмӕт.

1919 азы дӕсаздзыд лӕппуйы радтой ӕрыдоны семинары пансионатмӕ. Дыууӕ азы фӕстӕ пансионат ӕхгӕд ӕрцыд, ӕмӕ та Дӕбе раздӕхт хӕдзары куыстытӕм. 1924-1926 азты ахуыр кодта сӕ хъӕуы скъолайы, 1926-1930 азты та — Дзӕуджыхъӕуы педтехникумы. Уыцы рӕстӕджы техникум уыд ирон ахуырады артдзӕст. Куыста дзы зындгонд ахуыргӕнӕг Гуыриаты Гагуыдз, уый разамынд лӕвӕрдта литературон къордӕн, цырын кодта сфӕлдыстадон тыхтӕ. Ам Дӕбе фӕцалх и сфӕлдыстадон куыстыл, фыста ӕмдзӕвгӕтӕ ӕмӕ радзырдтӕ, йӕхимӕ ӕркӕсын кодта литературон ӕхсӕнады.

1930 азы Дӕбейы арвыстой Заманхъулмӕ скъолайы сӕргълӕууӕгӕй. Уыцы-иу рӕстӕг фӕсаууонмӕ ахуыр кодта Ростовы пединституты литературон факультеты. Уӕды азтӕ советон адӕмӕн уыдысты хъысмӕтивӕн дуг. Цыди коллективизаци. Дӕбе уыдта, хъӕу хицӕн къордтыл куыд ныддихтӕ, ӕмӕ карз хӕсты куыд бацыдысты, уый. Йӕ тӕлмӕнтӕй фӕстӕдӕр равзӕрд роман «Уӕззау операци».

1933 азы Дӕбе бацыд Ленинграды истори, философи ӕмӕ литературӕйы институтмӕ. Бакаст дзы ӕртӕ курсы. ӕвӕгӕсӕг студенты хъуыдис цӕрыны фӕрӕзтӕ, ӕмӕ ахуырты фӕстӕ куыста наулӕууӕны. Буарӕй фидар нӕ уыд, рынчынтӕ хаста ӕмӕ ныууагъта йӕ ахуыр. ӕрыздӕхт Ирыстонмӕ. Уӕдӕй фӕстӕмӕ ӕппӕт хъарутӕ дӕр лӕвӕрдта литературон ӕмӕ ӕхсӕнадон куыстӕн. Уыди газет «Рӕстдзинад»-ы редактор, журнал «Пионер»-ы редактор. Бирӕ азты куыста Фысджыты цӕдисы сӕрдарӕй. Уый зӕрдиагӕй агуырдта курдиӕттӕ ӕмӕ сыл аудыдта ӕнувыдӕй.

Мамсыраты Дӕбейы курдиат уыд бирӕвӕрсыг ӕмӕ рӕдау. Ирон фысджытӕй уый бӕрц чингуытӕ ничи рауагъта. Куыста алы жанрты: поэзи, прозӕ, драмӕ. Кодта тӕлмац. Фыста очерктӕ, критикон уацтӕ. Дӕбемӕ уыд цыдӕр фарн ӕмӕ йӕ уый хаста царды тӕссаг уылӕнты сӕрты. Иннӕ фысджытӕй хъауджыдӕр ӕййӕфта къаддӕр ӕфхӕрд. Йӕ кад уыд йӕ курдиатӕй бирӕ уӕлдӕр. ӕппӕлӕн ныхас ын ничи ауӕрста. Гӕнӕн ис, ӕмӕ йӕ ацы хъуыддаг нӕ уагъта йӕ уацмыстыл фаг кусын. Сценӕйы йын цардхъом разынд ӕрмӕст «ӕфхӕрдты Хӕсанӕ» — уӕлмонц романтикон драмӕ, уый цӕры йӕ сюжеты хъаруйӕ. Дӕбе йӕ пьесӕ «Зорттаты Майрӕм»-ы тыххӕй 1949 азы фыста: «Пьесӕйы ис химидбыцӕутӕ ӕмӕ, ӕмткӕй дзургӕйӕ, пьесӕйы цы фӕхъӕуы, уыдон се ‘ппӕт дӕр. Фӕлӕ дзы цы нӕ ис, цӕуылнӕ бахаудта пьесӕ сценӕмӕ. Уымӕн ӕмӕ дзы нӕй ныртӕккӕйы царды ӕцӕгдзинад. Пьесӕйы цы быцӕудзинӕдтӕ ис, уыдон уыдысты раджы кӕддӕр, колхозтӕ ма сӕ тӕккӕ аразгӕйӕ куы уыдысты, уӕд, фӕлӕ дзы ахӕм быцӕутӕ ныр нал ис». Ахӕм карз тӕрхон Дӕбе йӕхицӕн хӕссы ӕнӕконфликты теоримӕ гӕсгӕ. Пьесӕйы ӕвдыст цӕуы колхозы сӕрдар — «йӕхи расай-басай чи кодта хӕстӕй фервӕзыны тыххӕй, уыцы Додти, расыггӕнаг ӕмӕ тынг хӕлд адӕймаг». Соцреализмы домӕнтӕм гӕсгӕ уацмысы архайӕг у типикон, Додти у ӕппӕт сӕрдарты иугонд фӕлгонц. Ахӕм персонажӕн бынат нӕ уыд советон сценӕйы 40-ӕм азты. Пьесӕйы «нӕй нырыккон царды ӕцӕгдзинад» — уый уыд хицауады хатдзӕг, ӕмӕ йӕ тыхбар ныббаста Дӕбейӕн дӕр. Ахӕм уавӕрты рӕзӕн нӕ уыд ӕцӕг драмон аивадӕн.

Дӕбейы курдиат хъомысджындӕр уыдис прозӕйы. Уӕлдай идейон-эстетикон ахадындзинад ис йӕ радзырдтӕн.

Дӕбе зыдта царды быцӕутӕ. Зыдта, адӕймаджы удыхъӕд быцӕуты кӕй раргом вӕййы, уый дӕр, ӕмӕ агуырдта карз быцӕутӕ, драмон сюжеттӕ. Хъӕздыг ӕрмӕг ын лӕвӕрдта советон истори: мидхӕст, колхозон арӕзтад, ног ӕгъдӕуттыл тох, Фыдыбӕстӕйы Стыр хӕст. Йӕ зӕрдӕ йын агайдтой царды хъӕнтӕ, адӕймаджы ӕууӕлтӕ — эгоизм, козбау, зыд ӕмӕ ӕндӕр ахӕмтӕ. Дӕбейы радзырдтӕ, цы цаутӕ ӕвдисынц, уыдонмӕ гӕсгӕ дих кӕнынц цалдӕр тематикон къордыл.

Уӕрӕсейы историйы мидхӕст уыди трагедиты гуырӕн. Революци ӕмӕ карз социалон быцӕутӕ цыдысты драматизмы уагыл. Дӕбе хорз арӕхсти радзырдӕн цау ӕвзарынмӕ, йӕ бон уыд цауы сюжетон хахх ссарын.

Радзырд «Пакет» (1935) у лӕгдзинады таурӕгъ. Фыссӕг ӕмӕ хабаргӕнӕг Абысал бадынц ӕрӕфы был. Абысал мысы мидхӕсты цаутӕ, урс ӕфсад ӕмӕ сырх партизанты хӕст Дыгургомы. «Йӕ таурӕгъ дӕр уыдис доны хуызӕн ӕнӕскъуыйгӕ, рӕсугъд ӕмӕ тыхджын», — фыссы автор. Уыцы таурӕгъ ӕвдисы хуымӕтӕг хӕххоны лӕгдзинад. Партизантыл ӕхгӕд ӕрцыд комы дуар, хъӕуы сӕ бастдзинад Сырх ӕфсадимӕ. Уыцы хӕс йӕхимӕ райста Дзӕрай. Хӕссы пакет, цӕуы тӕссаг фӕндагыл, йӕ размӕ бады мӕлӕт, фӕлӕ, карды комыл цӕуӕгау, тырны йӕ нысанмӕ. Фӕцӕф и знаджы нӕмыгӕй, ахауд рындзӕй тызмӕг ӕрӕфмӕ, уӕддӕр донласт ӕмӕ мӕлӕтдзагӕй архайы пакет ӕфснайыныл. Лӕг ӕмбары йӕ хӕс, зоны йӕ бӕрн, ӕмӕ йын уыцы зондахаст дӕтты ӕгӕрон хъару.

Радзырды идейӕ ӕргом кӕнынц Абысалы хатдзӕгтӕ. Тохы фӕлтӕрд лӕг дзуры: «Аргъӕутты, таурӕгъты фӕдзурынц, лӕг мӕлӕтӕй нӕ тарстис, зӕгъгӕ. ӕнӕуи царды афтӕ нӕ вӕййы. Нӕй, мӕлӕтӕй чи нӕ тӕрсы, ахӕм… Адӕймаг мӕлӕтӕй куы тӕрса ӕмӕ дзы йӕхи бахъахъхъӕнын куы бафӕраза, афтӕмӕй йӕ хӕс куы сӕххӕст кӕна, уӕд уый ӕцӕг ӕхсарджын у…» Ахӕм уавӕр бӕрзонд кӕны сгуыхты мидис, уым разыны архайды нысан, уымӕй ӕвзӕры фӕлгонцы психологизм.

Ӕцӕг хабарыл амад у радзырд «Ирвӕзынгӕнӕг» (1934). Дӕбе ӕвдисы 1920 азы цаутӕ. Архайд цӕуы Каспы былгӕрон, горӕт Петровскы. Басаст урс ӕфсады тых, лидзынц горӕтӕй, кӕнынц фӕстаг фыдмитӕ. Горӕт — змӕст, адӕм — тарст. Саст хӕстонтӕ пырх кӕнынц, наумӕ хӕссын сӕ бон цы нӕу, уыцы исбон. Сӕ фыдвӕнд у хотыхты вагӕттӕ срӕмудзын, горӕт басудзын. Уыцы фыдракӕнды ныхмӕ ӕрлӕууыд машинист Хуытъинаты Мӕхӕмӕт. Фыссӕг ӕвдисы йӕ хъайтары тӕссаг уавӕр. Фӕлӕ ам дӕр мӕлӕтӕй тыхджындӕр у патриот, намысджын адӕймаг, хъахъхъӕны адӕмы цард ӕмӕ исбон. Бантыст ын поезд горӕтӕй атӕрын. Хорздзинад ракӕнын архайӕгӕн йӕхицӕн хӕссы цин ӕмӕ амонд, — ахӕм у фыссӕджы моралон хъуыды.

Уавӕры драматизм равдисынӕн Дӕбе удджын кӕны тас. Мӕлӕтау ӕвирхъау тасдзинад зилы горӕты уынгты, хӕдзӕртты, фӕлӕ никӕй ары, йӕ риуы кӕмӕн ныббырыдаид, «йӕ цӕссыгтӕ кӕмӕн фемӕхсын кодтаид, йӕ уӕнгтӕ кӕмӕн нырризын кодтаид… ӕмӕ уӕд бырыдис уазал, уымӕл, талынг пъадвалтӕм, рынчындӕттӕм ӕмӕ уым ардта хуыздзыд, ӕмризӕджы рызтгӕнӕг адӕмы дзыгуырты». Тас бафтыд саст ӕфсадыл дӕр ӕмӕ «катайгӕнӕджы змӕлд кодтой». Ахӕм параллелизмы фӕрцы фыссӕг ӕргом кӕны, истори сӕфты тӕрхон кӕмӕн рахаста, уыцы тыхгӕнӕг ӕфсады хъысмӕт.

20-ӕм азты царды цыди стыр ивддзинӕдтӕ. Ног тыхбар арӕзта ног цардӕвӕрд, фидар кодта ног ӕхсӕнадон уаг. Уалдзӕг кӕнӕ фӕззӕг ӕрдзы хуыз куыд ивы, афтӕ ног закъонтӕ ивтой адӕймаджы цард, йӕ зондахаст, йӕ хъысмӕт. Уыцы ивӕнтӕ цыдысты уӕззауӕй, хӕлдтой ӕнусон фӕтк, састой бирӕ хъысмӕттӕ. Уӕлдай зынӕй ивта сылгоймаджы царды уаг: царды уылӕнтӕ йӕ ӕрсдонау хастой размӕ, ӕндӕр цардмӕ, фыдӕлтыккон ӕгъдӕуттӕ йыл хӕлуарӕджы тынтау хӕцыдысты фӕстӕмӕ. Уыцы уавӕр литературӕйӕн уыд ахъаззаг ӕрмӕг. Дӕбе дзы райста сюжет йӕ радзырд «Фыццаг къахдзӕф»-ӕн (1929).

Ӕрыгон сидзӕргӕс Дасханы адӕм сӕвзӕрстой хъӕусоветы ӕххӕсткомы сӕрдарӕй. Сылгоймаг кусы ӕнувыдӕй, ӕнтыстджынӕй. Фӕлӕ бирӕтӕм хорз нӕ кӕсы, сылгоймаг хицау кӕй сси, уый. Хионтӕ йӕ здахынц йӕ фӕндагӕй. Хахуыр ыл кӕнынц хӕлӕггӕнджытӕ, йӕ бынатмӕ чи тырны, уыдон. Хӕрам рацыд фидисы хуызы, ӕмӕ рӕузонд Темыр амары йӕ хо Дасханы.

Радзырды кӕрон ӕнӕзонгӕ сылгоймаг кӕны митингон ныхас, дзуры джиппыуагъд лозунгтӕ, фӕлӕ ӕмткӕй уацмыс у реалистон. Йӕ сюжет у ӕндыгъд. Йӕ композицион нывӕст афтӕ у, ӕмӕ дзы цаутӕ таурӕгъау фӕд-фӕдыл нӕ цӕуынц, хицӕн эпизодтӕ сты Дасханы мысинӕгтӕ, ӕмӕ уыцы фӕтк арф кӕны характеры психологизм. Уацмысы нывӕфтыдӕй зынынц ирон царды хицӕн ӕууӕлтӕ: сидзӕр сабиты цард, цыппӕрдӕсаздзыд Бутузы куыстытӕ, сылгоймӕгты дам-думтӕ, фидистӕ — уыдон ӕргом кӕнынц персонажты ахастытӕ, сӕ архайды нысан ӕмӕ мидис.

Дӕбе арӕхстджынӕй аразы психологон сурӕт. Сидзӕрты хӕдзармӕ зымӕгон ӕрбацыд Дасханы тиу. «Митӕмбӕрзтӕй мидӕмӕ бахызтис ныллӕг ӕмӕ гуыбыргомау, сӕгъбоцъо, фыдцъылыс, цъӕхдзаст лӕг. Йе стыр уӕлдзарм худ ӕмӕ ӕнӕцъар кӕрц ацагъта; йӕ фӕстӕ дуар куы рахгӕдта, уӕд йе ‘мпъызтытӕ сӕрак дзабыртӕ, фӕсдуар цы ихсыд зӕронд цъылын уыдис, уымӕй амарзта», — уыцы змӕлдтытӕ ӕвдисынц, арсау гуырымыхъ чи у, ахӕмы ӕууӕлтӕ. Сидзӕртӕ рох вӕййынц сӕ фыды ӕфсымӕрӕй, уый ӕгъдау нӕ кӕны тыхст бинонтӕн, фӕлӕ адӕмы цӕстмӕ ӕгъдау домы Дасханӕй.

Фыссӕгӕн цыбыр радзырды бантыст сылгоймаджы фӕлгонц саразын. Дасхан у хӕрзӕгъдау ӕмӕ хъаруджын ирон сылгоймаг. Йӕ хӕдзар — мӕгуыр, фӕлӕ ӕфснайд, йӕ сабитӕ — хӕрзӕхсад. Ис ын фидар удыхъӕд. Йӕ рӕстдзинад зоны ӕмӕ уымӕй у ныфсджын. Хӕдзары куыд сӕрӕн у, афтӕ сӕрӕн, дзуапджын ӕмӕ хъӕппӕрисджын разынд ӕхсӕнадон куысты дӕр. Уӕззау у сылгоймаджы хъысмӕт, гуыргъахъ у йӕ фӕндаг, ӕмхиц ӕм сты даутӕ ӕмӕ тауыстӕ. Тыхсы Дасхан дӕр. «Цыма чъизи цады аныгъуылд, афтӕ йӕм фӕкаст», быры уыцы цъыфӕй хусмӕ, рухсмӕ, фӕлӕ йыл нӕй схӕцӕг, ӕппарынц ӕй фӕстӕмӕ цъӕмӕлмӕ. Ацы нывы зыны йӕ хъысмӕты трагизм. Рухсмӕ чи тырны, фыццаг фӕндаг чи гӕрды, уыдоны цард трагеди у, фӕлӕ сӕ тохы раргом вӕййы сӕ уды рухс, сӕ курдиат, сӕ хъару. Трагедийы геройтӕ бӕрзонд кӕнынц адӕймаджы ном.

Цардивӕнтӕ ӕвдисы радзырд «Цыт» дӕр (1929). Йӕ сӕйраг темӕ у, социалон уавӕртимӕ кусӕг лӕг ӕмӕ йӕ куыстмӕ ӕхсӕнады ахаст куыд ивы, уый. Фыссӕг нын радзырдта дыууӕ царды истори. ӕхсӕв ӕмӕ бонау ӕмбастӕй цӕуы Дзынга ӕмӕ Цолайы цард, кӕд сын хицӕн хъысмӕттӕ ис, уӕддӕр. Дӕбе ӕвдисы дыууӕ хӕдзары — галуан ӕмӕ къӕс: «Иу хӕдзар ссӕнды иннӕйы. Иу хӕдзар худы иннӕуыл». Уый у социалон быцӕуы символон ныв. Галуаны цӕрӕг цъиры къӕсы цӕрӕджы тугвӕллой, ӕмӕ цӕуы тох. Йӕ фӕстиуӕг — революци. Тугцъир цӕуы сӕфтмӕ, кусӕг аразы йӕ цард, — ахӕм у цауты логикӕ.

Бӕстон нывгонд у Дзынга-Хъуыдӕберды фӕлгонц. Йӕ номы истори дӕр фаг у йӕ удыхъӕд ӕвдисынӕн. Дӕбе у реалист. Йӕ персонажы ӕвдисы ӕппӕтвӕрсыгӕй. Хъуыдӕберд хъӕздыг кӕны ӕххуырст адӕмы куыстӕй. Фӕлӕ йӕхӕдӕг дӕр у кусаг ӕмӕ хӕдзардзин, зоны хӕдзар ӕмӕ куыстӕн фӕтк ӕвӕрын. Дзынга у хин, фӕлӕ ӕрхъуыдыджын, архайы уавӕртӕм гӕсгӕ. Ног ӕхсӕнады козбау кӕны, раздӕр кӕуыл не ‘рвӕссыд, уымӕн дӕр. Йӕ фос сусӕгӕй фӕуӕй кодта ӕмӕ коллективизацийы дуджы баззад ӕнӕфхӕрдӕй. Заводы ӕфсисады хайы у хъӕппӕрисджын кусӕг, у амалджын лӕг ӕмӕ цӕры дзӕбӕхӕй. Фӕлӕ адӕймаджы удыхъӕдӕн ис вазыгджын ӕрдз. Хъуыдӕберд дардмӕ нӕ кӕсы. Уый у мулчы цагъар. Ницы хъуаг у, фӕлӕ йын уый фаг нӕу, хъӕуы йӕ хи исбон. Уыцы мондаг ын сасийау ӕвдӕрзы йӕ зӕрдӕ. Дзынга давы, хӕры къазна, уӕддӕр йӕхимӕ кӕсы ахст тигр — фаг уӕрӕх не сты йӕ авналӕнтӕ. ӕмбӕхсы йӕ фыдвӕдтӕ ӕмӕ свӕййы лӕгмарӕг. Фӕлӕ фыдгӕнӕгӕн ӕрцӕуы карз тӕрхон.

Хуымӕтӕг, фӕлӕ уӕздан ӕмӕ хъаруджын лӕг у Цола. Цард ӕй ссӕнды, фӕлӕ фидар у ӕмӕ нӕ сӕтты. Архайы ӕрмӕст кусӕнгарзӕй. Фӕлӕ, сӕр кӕм бахъӕуы, уым разыны ныфсхаст. Судзгӕ хӕдзарӕй рахӕссы сабиты. Мидхӕсты заман фехӕлдта ӕфсӕнвӕндаг ӕмӕ адӕмы бахызта ӕфхӕрӕг урс ӕфсадӕй. Уыцы сгуыхтытӕ йын мысынц иу бон. «Фӕлӕ уый фӕстӕ адӕмӕй байрох, — дзуры карз ӕцӕгтӕ автор. — Цола баззадис мӕгуыр ӕмӕ ӕгадӕй». Уыцы уавӕр ын арӕх ӕрымысы Дзынга дӕр, «ацы хицауад дӕр дӕ хуызӕн мӕгуыртыл тынг нӕ тыхсы, зӕгъгӕ». Фӕлӕ цард ивта. Бирӕ сагъӕсты фӕстӕ Цола ахызт гуырысхоты сӕрты ӕмӕ сси хъазуатон колхозон. Хицауады хъуыд ног хӕдзарад стауын, ӕмӕ Цолайы куыстӕн аргъ кӕнынц газеттӕ. Фӕстагмӕ Цола сси заводы кусӕг. Уыцы цау радзырды фӕзынд ӕнӕнхъӕлӕджы, — ахӕм цардвӕндаг ӕвдисын уыд рӕстӕджы домӕн. Фӕлӕ Цолайы куыст ӕмӕ лӕгдзинадӕн аргъгонд кӕй ӕрцыд, уый у цард ӕмӕ рӕстӕджы ӕцӕгдзинад. Хорздзинад нӕ сӕфы — ахӕм у радзырды оптимистон идейӕ.

Дӕбе къорд уацмысы ӕвдисы Фыдыбӕстӕйы Стыр хӕсты цаутӕ. Фыста ӕмдзӕвгӕтӕ, очерктӕ, радзырдтӕ. Фыссӕг ӕвдисы оккупантты фыдракӕндтӕ ӕмӕ советон адӕмы сгуыхтытӕ. Уыцы темӕйыл фыст у радзырд «Мастисджытӕ» (1943).

Йӕ роман «Хъӕбатырты кадӕг» ын ирон литератортӕ хонынц «ӕппӕты цӕттӕдӕр ӕмӕ хӕрзаивдӕр роман», «ирон литературӕйы тӕккӕ ахсджиагдӕр уацмыстӕй иу». Уацмыс у егъау, ӕртӕ томы. Дӕбе йыл фӕкуыста бирӕ азты. Романы 1-аг чиныг мыхуыры рацыд 1948 азы, 2-аг чиныг — 1958 азы, 3-аг та 1969 азы. Авторы зӕрды уыд 4-ӕм том ныффыссын дӕр.

Дӕбе ацы романы бавнӕлдта стыр историон дуг равдисынмӕ. Фыссӕг нывӕфтыд кӕны 1907-1920 азты цаутӕ. Уыцы дуг уыд вазыгджын, ӕрцыди дзы, историйы арф фӕд чи ныууагъта, ахӕм цаутӕ. Саст ӕрцыд фыццаг уырыссаг революци. Йӕ фӕстӕ ралӕууыд ӕлхъывд политикон рӕстӕг: хицауад ӕгъатырӕй ӕфхӕрдта, змӕнтӕгыл кӕй нымадта, уыдоны, «ахӕстӕттӕ байдзаг сты… Бынат кӕмӕн нӕ арынц, уыдон та мингай ӕрвитынц Сыбырмӕ». 1914 азы райдыдта фыццаг дунеон хӕст. 1917 азы сӕнтыст дыууӕ революцийы, сӕ фӕстӕ Уӕрӕсейыл анхъӕвзта мидхӕст. 1920 азы Цӕгат Кавказы ӕрфидар и советон тыхбар. Ацы цаутӕ сты «Хъӕбатырты кадӕджы» историон бындур.

Мамсыры-фырт цаутӕ фӕлгъауы, йӕ рӕстӕджы сӕ партион истори куыд ӕвдыста, афтӕ. Фӕлӕ цаутӕ сты историон, фыссӕг сӕ ныв кӕны, йӕ гӕнӕнтӕ цас амонынц, уыйбӕрц объективонӕй. Романы ӕмбастӕй уынӕм хъӕу ӕмӕ горӕты цард, ӕрымысгӕ персонажты ӕмрӕнхъ дзы сӕйраг архайӕг сты зынгӕ ӕхсӕнадон ӕмӕ политикон кусджытӕ. Архайд цӕуы бӕлвырд ран, бӕрӕг уавӕрты. Нывты зынынц рӕстӕджы ӕууӕлтӕ ӕмӕ бынӕттон колорит. Персонажты характерты рахатӕн ис, цы ‘хсӕнадӕй сты, уый ӕууӕлтӕ. Уыцы миниуджытӕм гӕсгӕ «Хъӕбатырты кадӕг»-ӕн схонӕн ис историон роман.

Дӕбе ӕвдисы стыр царды уӕрӕх ныв. Архайды фылдӕр хай цӕуы ӕрӕфы хъӕуы. Уый, цыма дунейӕ иуварс аззад, афтӕ зыны. Фӕлӕ уый у дунейы чысыл чырӕг, зынгӕ ӕмӕ ӕнӕзынгӕ хъуыддӕгтӕй ӕнгом баст у ӕппӕт паддзахадимӕ. Цард базмӕлыд уым дӕр, иу зылдӕй рахызт уӕрӕх фӕндагмӕ, фӕзынд ын рӕзынӕн рӕстӕг ӕмӕ дӕрддзӕг. Афтӕмӕй хъӕу бахауд ӕхсӕнадон ӕнкъуыстыты уылӕнты. Дӕбе бӕстон ныв кӕны хъӕуы цард, фӕлӕ сӕйраг сюжетон хаххӕн райста иу бинонты хъысмӕт. Борзаты дыууӕ фӕлтӕры цард у романы бындурон мидис, уым айдӕнау зынынц хъӕуы социалон быцӕутӕ, адӕмы намысон идеалтӕ.

Быцӕутӕ сты тохы ӕнхъизӕн, тох у рӕзт ӕмӕ цардивӕн фӕрӕз. Хистӕр фӕлтӕры ссӕнды цард, сӕтты сын сӕ тых, сӕ ныфс ӕмӕ сӕ афтӕмӕй кӕны мӕлӕты амӕттаг. Кӕстӕр фӕлтӕр бахауынц ног уавӕрты, фадат сӕ аразы тохы фӕндагыл. Фидар у зӕронд цардӕвӕрд, арф сты йӕ уидӕгтӕу, ӕмӕ нӕ дӕтты йӕ бартӕ. Алы социалон къордӕн дӕр ис йӕхи нысан, Иутӕ хъахъхъӕнынц сӕ исбон ӕмӕ сӕ цардыуаг, иннӕтӕ агурынц амонд, домынц бартӕ. Уый адыл социалон тох у карз, ис дзы трагизмы ӕууӕлтӕ. Уым уӕлахиз кӕнынц ног цардыл тохгӕнджытӕ. Романы сюжетӕн йӕ сӕйраг нывӕст у ӕфсымӕртӕ Гаппо ӕмӕ Сослӕнбеджы цардвӕндаг.

«Хъӕбатырты кадӕджы» ӕвдыст цӕуы стыр цард ӕмӕ стыр историон рӕстӕг. Автор цардӕй райста хъӕздыг ӕрмӕг — бирӕ цаутӕ, бирӕ фӕзындтӕ, бирӕ архайджытӕ. Уыдонӕн хъуыдис бӕлвырд системӕ скӕнын, сӕйраг цаутӕ равзарын, уыдон иу архайды баиу кӕнын. Хъуыддаг романы цӕуы иннӕрдӕм: конфликт иу фӕдыл нӕ рӕзы, ӕмӕ архайд ныкъкъабӕзтӕ вӕййы. Дӕбе нӕ тырны конфликт карз кӕнынмӕ, ӕххӕст ма уыцы цау дӕр куы равдисин, зӕгъгӕ, йӕ хъайтарты фестын кӕны куы иу ран, куы — иннӕ ран. Афтӕмӕй быцӕутӕн нӕй райрӕзт, кӕронмӕ нӕ разыны хицӕн хъайтарты цардвӕндаг.

Дӕбейы романы айдӕнау зынынц ирон прозӕйы ӕууӕлтӕ. Фыссӕгӕн хуыздӕр ӕнтысы хъӕууон цард ӕвдисын. Хуызджын сты романы хъӕууон нывтӕ: ӕрдз ӕмӕ быдырон куыстытӕ, чындзӕхсӕв ӕмӕ куывд, чызджы фыццаг рацыд хъазтмӕ, хус рӕстӕджы къӕвда расайӕн ӕгъдӕуттӕ, марды кӕнд ӕмӕ ӕндӕртӕ. Уыцы нывты зыны адӕмы культурӕ, сӕ национ удыхъӕд. Фӕлӕ, хорз цы у, уый ирон критикӕ нымадта аиппыл, фыссӕгӕй домдта цард ныв кӕнын нӕ, фӕлӕ революцион тох ӕвдисын. Афтӕмӕй чиныгӕй чиныгмӕ романы мидис кодта къӕрисдӕр ӕмӕ ӕгъуыздӕр. Нывӕфтыд ныхас 3-аг чиныджы рахизы публицистикӕмӕ, цаутӕ ивынц цауты ӕмӕ зынынц историон хроникӕйау.

«Хъӕбатырты кадӕг» ӕмткӕй уыд зынгӕ фӕзынд ирон прозӕйы.

Джыккайты Шамил

ОСТАВЬТЕ ОТВЕТ

Please enter your comment!
Please enter your name here