Физкультурничы бон Терчы был

0
28

Алы аз дӕр августы дыккаг сабаты  Уӕрӕсейы спортуарзджытӕ хъӕлдзӕгӕй сӕмбӕлынц «Физкультурничы бон»-ыл.

Уыцы бон сын арӕзт ӕрцӕуынц алыхуызон ерыстӕ. Уыдон фӕцӕуынц хъӕлдзӕгӕй ӕмӕ дзы фӕархайынц алы кары нӕлгоймӕгтӕ ӕмӕ сылгоймӕгтӕ. Ахӕм рауадысты «Физкультурничы бон»-ы ерыстӕ ацы аз дӕр  Дзӕуджыхъӕуы ӕмӕ Ирыстоны алы районты.

Дзӕуджыхъӕуы афӕстаг азты бӕрӕгбон арӕзт ӕрцӕуы Хъесаты Колкайы уынджы, Терчы былгӕрон цы спортивон стыр комплекс  ис, уым.

Терчы былӕй дардмӕ хъуысыдысты хъӕлдзӕг спортивон музыкӕйы зӕлтӕ. Ардӕм цы бирӕ адӕм ӕрбацыдис, уыдонӕн бӕрӕгбоны арфӕтӕ ракодтой: РЦИ-Аланийы физкультурӕ ӕмӕ спорты министры хӕдивӕг Гуылчеты Валери, Олимпаг хъӕзтыты уӕлахиздзау Рӕмонты Сослан, дунейы чемпион Цӕболты Хетӕг, Дзӕуджыхъӕуы бынӕттон администрацийы фӕсивӕдон политикӕйы комитеты сӕрдар Баситы Марат.

РЦИ-Аланийы Физкультурӕ ӕмӕ спорты министрады «Кады грамотӕтӕ» лӕвӕрд ӕрцыдысты, нӕ республикӕйы спортивон куысты къорд азы зӕрдиаг фыдӕбон чи фӕкодта, уыцы тренертӕ ӕмӕ ахуыргӕнджытӕн:  Барсег Киракосянӕн — спортивон скъола «Дзӕуджыхъӕуы спорты академи»-йы тренер-ахуыргӕнӕг; Валерий Матвеевӕн — «Боксы олимпаг цӕттӕгӕнӕн спортивон скъолайы» тренер; Теблойты Анатолийӕн — спортивон скъола «Дзӕуджыхъӕуы спорты академи»-йы тренер-ахуыргӕнӕг; Владимир Авасепянцӕн — «Республикӕйы спортивон скъолайы» инструктор-методист; Гаглойты Георгийӕн — «Рог атлетикӕйӕ олимпаг цӕттӕгӕнӕн спортивон скъолайы» хистӕр тренер; Джериаты Стеллӕйӕн — “Республикон спортивон скъолайы” инструктор-методист. Арфӕйы гӕххӕттытӕ та райстой: ӕрчъынаты Зӕринӕ, Дзытиаты Мӕдинӕ, Давид Клещенко,  Гӕбӕлаты Еленӕ ӕмӕ  Мерденты Максат.

Бӕрӕгбон  сӕ аивадӕй срӕсугъд кодтой: адӕмон кӕфтыты ансамбл «Нартӕ» ӕмӕ  Цӕгат Ирыстоны паддзахадон камерон хоры солист Хъӕцмӕзты Владимир.

Ерыстӕ цыдысты спорты аст хуызӕй ӕмӕ дзы архайдтой куыд ӕвзонг лӕппутӕ ӕмӕ чызджытӕ, афтӕ сӕ ныййарджытӕ ӕмӕ ас спортсментӕ дӕр. Ерысты райдайӕны размӕ Рӕмонты Сослан ӕмӕ Цӕболты Хетӕг спортсментӕн скодтой физзарядкӕ. Уый цыдис хъӕлдзӕг уавӕры ӕмӕ иууылдӕр баззадысты разыйӕ.

Бӕрӕгбон тынг фӕцыд адӕмы зӕрдӕмӕ. Уыдонӕй иу — хӕххон-металлургон промышленносты зындгонд кусӕг ӕгъуызарты Таймураз  загъта: «Ахӕм бӕрӕгбӕттӕ ӕнӕмӕнг хъӕугӕ хъуыддаг сты. Зӕрдӕ рухс кӕны, нӕ кӕстӕртӕ се ‘нӕниздзинадыл, сӕ физикон цӕттӕдзинадыл куы фӕкусынц, уӕд уымӕй. Мӕнӕ ам, Терчы был, цы хорз уавӕртӕ арӕзт ӕрцыд хи ирхӕфсынӕн ӕмӕ физикон цӕттӕдзинадыл бындуронӕй бакусынӕн, уый мах рӕстӕджы кӕм уыди. Абон нӕ рӕзгӕ фӕсивӕдӕй бирӕтӕ се ‘нӕниздзинадыл ӕмбӕлгӕ куыст нал кӕнынц. ӕгӕр бирӕ рӕстӕг сты Интернет ӕмӕ ӕндӕр электрон ногдзинӕдты уацары ӕмӕ сын уыдон сӕ физикон цӕттӕдзинадӕн цӕмӕй зиан ма хӕссой, уый тыххӕй архайын хъӕуы ныййарджыты дӕр. Акӕсут-ма, цы хорз гӕнӕнтӕ сын ис, уымӕ.  Арфӕйы аккаг сты ацы уавӕртӕ саразджытӕ».

Ерыстӕ ацыдысты тынг зӕрдӕмӕдзӕугӕ уавӕры. Спорты алы хуызтӕй дӕр (мини-футбол, уынджы баскетбол, волейбол, шашкӕтӕй хъазт, бадминтон, кросс-файт, сывӕллӕтты «Хъӕлдзӕг ерыстӕ», воркаут) уӕлахиздзаутӕ ӕмӕ призон бынӕттӕ бацахсджытӕн лӕвӕрд ӕрцыдысты зӕрдылдарӕн хӕрзиуджытӕ.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here