Ӕхсӕнадон палатӕйы архайд ӕвзӕрстыты

0
8

Граждайнаг ӕхсӕнады институтты ахадындзинад ӕвзӕрстыты закъонад ӕмӕ ӕргомдзинад бахъахъхъӕныны фӕдыл уыд йӕ пленарон ӕмбырд Цӕгат Ирыстоны ӕхсӕнадон палатӕйӕн.

Афӕдзы размӕ Уӕрӕсейы Федерацийы Паддзахадон Думӕйы хаст закъонмӕ гӕсгӕ ӕхсӕнадон палатӕтӕн ис регионалон ӕмӕ муниципалон ӕвзӕрстыты сӕ цӕстдарджыты ӕвӕрыны бар. Федералон закъонмӕ гӕсгӕ ивддзинӕдтӕ хаст ӕрцыд республикӕйы закъондӕттынадмӕ дӕр.

— «РЦИ-Аланийы ӕхсӕнадон палатӕйы тыххӕй» закъонмӕ цы ивддзинӕдтӕ хаст ӕрцыд, уыдонмӕ гӕсгӕ нын бар ис республикӕйы Парламент ӕмӕ бынӕттон хиуынаффӕйады оргӕнтӕм ӕвзӕрстыты ӕвзарӕн къамистӕм нӕ цӕстдарджыты нысан кӕныны бар. Ӕхсӕнадон цӕстдардмӕ нысангонд адӕймӕгтӕ ницы бар дарынц кандидаттӕм дӕр ӕмӕ политикон партитӕм дӕр. Сӕ комкоммӕ хӕстӕ бӕрнонӕй кӕй ӕххӕст кӕндзысты, уый ӕппындӕр дызӕрдыггаг нӕу, — йӕ раныхасы загъта Цӕгат Ирыстон-Аланийы ӕхсӕнадон палатӕйы сӕрдар Нинӕ Чиплакова.

Цӕгат Ирыстоны ӕхсӕнадон палатӕ ӕмӕ РЦИ-Аланийы Центрон ӕвзарӕн къамис бафыстой бадзырд ӕмгуыстады тыххӕй. Ӕвзарджыты иумӕйаг бон, 8 сентябры, 144 ӕвзарӕн хайӕдтӕй алкӕцыйы дӕр архайдзӕн ӕхсӕнадон цӕстдарджытӕ, уыдонӕй 127 уыдзысты Дзӕуджыхъӕуы. ӕхсӕнадон палатӕ, ӕхсӕнадон цӕстдарджытӕ ӕвзаргӕйӕ, ӕнгомӕй кусы республикӕйы зындгонддӕр ӕхсӕнадон организацитимӕ. Уыдон сты Уӕрӕсейы Федерацийы промышленниктӕ ӕмӕ амалхъомты цӕдисы регионалон хайад, ӕрдз хъахъхъӕныны ӕппӕтуӕрӕсеон ӕхсӕнад, Автомобилистты ӕппӕтуӕрӕсеон ӕхсӕнад, Уӕрӕсейы Сылгоймӕгты цӕдис, Фӕсивӕды цӕдис, ӕхсӕнадон иугӕндтӕ «Наша Осетия», «Стыр Ныхас», «Боевое братство», хӕрзгӕнӕг фонд «Быть добру» ӕмӕ ӕндӕр национ-культурон ӕхсӕнадтӕ.

Цӕгат Ирыстоны ӕхсӕнадон палатӕйы сӕрдар Нинӕ Чиплакова куыд бацамыдта, афтӕмӕй ахӕм хуызы архайд стыр ахъаз фӕуыдзӕн ӕвзӕрстытӕн ӕнӕхӕрам ӕмӕ ӕнӕхин митӕй ацӕуынӕн, фадат ратдзӕн ӕвзарджыты ӕууӕнк раздахынӕн ӕмӕ ӕвзӕрстыты фылдӕр адӕм архайынӕн.

Центрон ӕвзарӕн къамисы сӕрдары хӕдивӕг Хъуыдакаты Сослан куыд загъта, афтӕмӕй ӕхсӕнадон цӕстдарджыты зӕрдиаг ӕмӕ сыгъдӕгзӕрдӕ архайды фӕрцы ӕвзарӕн хайӕдты уыдзӕн къаддӕр быцӕутӕ ӕмӕ ӕнӕзакъон митӕ. Уый тынг ахсджиаг у кандидатты ‘хсӕн ахӕм стыр быцӕу архайды уавӕрты.

Центрон ӕвзарӕн къамисы барадон хайады хицау Томайты Ирмӕ  ӕмбырды архайджытӕн радзырдта, ӕхсӕнадон цӕстдарджыты бартӕ ӕмӕ архайды, сӕ бон цавӕр мадзӕлттӕй пайда кӕнын у, уый тыххӕй.

Иумӕйаг хъӕлӕс кӕныны бон, 8 сентябры, ӕвзӕрстытӕ уыдзысты республикӕйы сӕйраг горӕты ӕмӕ ӕртӕ районы.

Хъайтыхъты Зӕлинӕ

ОСТАВЬТЕ ОТВЕТ

Please enter your comment!
Please enter your name here