Ирыстоны хӕхты ног цард

0
36

Ирыстоны хӕхтӕм ног цард бауадзын, фысвосы дзугтӕ сбирӕ кӕнын, хи продукцийӕ ӕфсадын адӕмы — ахӕм стыр нысан ӕвӕрынц сӕ размӕ республикӕйы разамынд ӕмӕ РЦИ-Аланийы Хъӕууон хӕдзарады ӕмӕ хойраджы министрад.

— Ныртӕккӕ республикӕйы ис 49 мин сӕры фыстӕ, хӕстӕгдӕр рӕстӕг ма сыл бафтдзӕн 12,5 мин сӕры. Нӕ хӕхбӕсты, алы комы дӕр ис бирӕ хизӕнтӕ, фӕлӕ нӕ сӕрвӕттӕм куы акӕсай, уӕд дзы лыстӕг фос гӕзӕмӕ фендзынӕ. Пайда у йӕ дзидза, ӕфтиӕгтӕ райсӕн ис йӕ къуымбилӕй. Ацы куыстмӕ йе ‘ргом чи раздӕхта, уыдонӕн алывӕрсыг ӕххуыс уыдзӕнис, — загъта РЦИ-Аланийы хъӕууон хӕдзарад ӕмӕ хойраджы министры хӕдивӕг Рубайты Ибрагим.

Йӕ сабибонтӕ мысгӕйӕ, Дзагкойты Барисы цӕстытыл арӕх  ауайынц, ӕнӕкӕрон фысты дзугтӕ. Дыгургомы дурджын фӕндӕгтыл уайгӕйӕ хъомыл кодта, йӕ цард сбаста ӕфсады службӕимӕ. Ленинграды ӕфсӕддон академи каст фӕцис, уыд Цӕгат Кавказы ӕфсӕддон зылды ӕфсады спортивон клубы хицау, ӕнтыстджынӕй куыста 58-ӕм ӕфсады командӕгӕнӕджы хӕдивӕгӕй. Абон та булкъон Дзагкойты Барис у ӕнтыстджын фермерон хӕдзарады разамонӕг. Дары бӕхтӕ, дуцгӕ хъомтӕ, фӕлӕ йын фылдӕр циндзинад хӕссынц йӕ фысвосы дзугтӕ. Афтӕ бӕрзонд хизынц Дыгургомы хӕхбӕсты, ӕмӕ йӕм алы рог машинӕ не ссӕудзӕн. Уӕрӕх ӕмӕ цъӕх-цъӕхид сойджын уыгӕрдӕнтӕ иууылдӕр — сӕ бар. Куыд зӕгъы йӕхӕдӕг, афтӕмӕй ӕрбынӕттон Ирыстоны Цӕгат-Ныгуылӕн хайы, Кӕсӕг-Балхъары арӕнтӕм ӕввахс.

— 2014 азы мӕм уыд   200 фысы, ныртӕккӕ сӕ нымӕц у иу минӕй фылдӕр. Зӕрдӕрухс дӕн мӕ фыдӕбонӕй, ӕмӕ ам зӕгъын хъӕуы, ӕнӕ паддзахады ӕххуысӕй ницы бакуыстаин, — зӕгъы Барис. — Ӕнӕ бафиппайгӕ нӕй, фӕстаг рӕстӕг хъӕууонхӕдзарады къабазӕн цас ӕххуыс ис, уый. Ӕз дӕр ӕй мӕхиуыл банкъардтон, 2017 азы паддзахадон грант — милуан сомы куы райстон, уӕд. Министр Уазиты Хъазыбеджы архайдӕй фысты куыстгӕнджытӕн радтой дотацитӕ, мадӕл фыстӕ чи дары, уыдонӕн. Цы чысыл фӕлтӕрддзинад мӕм уыд ацы куысты, уымӕ гӕсгӕ ӕмбӕрстон, хӕрзмыггаг фосимӕ кусын кӕй хъӕуы. Ӕнӕзивӕгӕй цыдтӕн ӕндӕр регионтӕм, уыдоны куыстимӕ зонгӕ кодтон. Ирыстоны хӕхты ӕрдзон уавӕрты хуыздӕр кӕцы фыстӕ рӕздзысты, уый ӕвзаргӕйӕ, ӕрлӕууыдтӕн, «Южная мясная» кӕй хонынц, ууыл. Краснодары хъӕууонхӕдзарадон академийы ахуыргӕндтӕ бакуыстой йӕ селекцийыл, дзидза, стӕй ӕхсырджын сты ацы фыстӕ. Махмӕ цы гуырдзиаг, дагестайнаг ӕмӕ ӕндӕр фысвос дарынц, уыдонӕй алы 100 сӕры дӕр радтынц 80-85 уӕрыччы, хӕссын сӕ хъӕуы 8-9 мӕйы бӕрц, бирӕтӕн та тӕф кӕны сӕ дзидза. Ацы хуссайраг мыггаг та уазӕлттӕн фӕразон у, ӕртӕ мӕймӕ бахъомыл вӕййы, йӕ хӕрдзтӕ дыууӕ хатты къаддӕр сты, сӕйрагдӕр та — алы сӕдӕ сӕрӕй уӕрыччытӕ райсӕн ис 155-170, ома, 200 проценты бӕрц. ӕхсырджын сты ӕмӕ дыгай уӕрыччытӕ ӕнцонӕй схӕссынц мадӕл фыстӕ. Сӕ сӕфтӕджытӕ дӕр хъахъхъӕнинаг сты, хӕххон фӕндӕгтыл ӕрвылбон цӕуынц 35-40 километры бӕрц.

Барис ӕхсызгонӕй дзырдта йӕ фосы тыххӕй, бирӕтӕн дзы нӕмттӕ дӕр ис, биркӕтӕ, стӕй паспорттӕ дӕр, хӕрзмыггаг фос кӕй сты, уый ӕвдисӕндартӕ. Сӕ разӕй та цӕуы сыкъаджын сӕгъ Гоги, фыййау-куыйтӕ хъахъхъӕнынц фысты дзуг, уыдон та сӕхицӕн ӕнӕмӕтӕй кӕрдӕгыл хизынц.

Гранты ӕххуысӕй фермер балхӕдта хъӕугӕ техникӕ — трактор «Беларусь», ӕндӕр ифтонггӕрзтӕ, зымӕгмӕ хос ӕрцӕттӕ кӕнынӕн йӕ тӕккӕ афон у. Хӕдзарады фосы дохтыр ӕппӕт санитарон домӕнтӕ ӕххӕст кӕны, афӕдз дыууӕ хатты фысты ныннайынц креолинӕй, низты ныхмӕ кӕнынц профилактикон куыст. Ам, бӕрзонд хӕхбӕсты, сыгъдӕг уӕлдӕфмӕ, сойджын кӕрдӕгыл хизынц ӕмӕ хӕрзхаст сты Барисы фысвос. «Зивӕг ма кӕн, дӕ куыст уарз ӕмӕ уӕлахиз уыдзынӕ», — зӕгъы фермер. Йе стыр бӕллиц у, йӕ фысты нымӕц ӕртӕ минмӕ схӕццӕ кӕнын. Хӕстӕгдӕр дыууӕ-ӕртӕ азмӕ уый йӕ къухы кӕй бафтдзӕн, уый йӕ уырны.

Куыд зӕгъы, афтӕмӕй фыс ӕлхӕнӕг кӕддӕриддӕр вӕййы, фӕлӕ, хъыгагӕн, кӕуыл фӕфыдӕбон кӕнынц, уымӕн йӕ «сойтӕ» сӕудӕджертӕ айсынц, сӕхи аргъ ма сыл бафтауынц, афтӕмӕй сӕ уӕй кӕнынц. Иннӕ лыггӕнинаг фарст та у, зымӕджы уавӕрты сӕ дарын, бирӕтӕ, уыимӕ, Барис дӕр, аренды райсынц бӕстыхӕйттӕ. Фысӕн йӕ пайда ӕрмӕст дзидза нӕ, фӕлӕ ма къуымбил дӕр у. Цыппар тоннӕйы хорз къуымбил ӕфснайдӕй лӕууы скълады, агурӕг ӕй нӕй, цы фӕуыдзӕн, кӕдмӕ лӕудзӕн — ничи зоны.

Гугкаты Жаннӕ

ОСТАВЬТЕ ОТВЕТ

Please enter your comment!
Please enter your name here