Цӕрӕнуӕтты-коммуналон хӕдзарад: зымӕгмӕ цӕттӕдзинады фарстытӕ

0
7

Цӕгат Ирыстоны Сӕргълӕууӕг Битарты Вячеславӕн кусӕг фембӕлд уыд республикӕйы цӕрӕнуӕттӕ-коммуналон хӕдзарады, артаг ӕмӕ энергетикӕйы министр Таматы Майрӕнимӕ. Ныхасы рӕстӕг ӕркастӕуыд, цӕрӕнуӕтты-коммуналон комплексы объекттӕ зымӕгмӕ куыд цӕттӕгонд цӕуынц, уымӕ.

Таматы Майрӕны ныхасмӕ гӕсгӕ, ӕппӕт цалцӕггӕнӕн ӕмӕ иннӕ цӕттӕгӕнӕн куыстытӕ дӕр цӕуынц рагагъоммӕ фидаргонд фӕткы бындурыл. Ӕппӕт мадзӕлттӕн дӕр хъӕугӕ фӕрӕзтӕ дихгонд ӕрцыдысты коммуналон ӕмӕ энергетикон компаниты бюджеттӕй.

Ныхасы архайджытӕ сӕрмагондӕй ӕрдзырдтой хъӕууон цӕрӕн бынӕттӕм газуадзӕнтӕ аразыны фарстыл. Зӕгъӕм, Горӕтгӕрон районы Ног поселокмӕ ныридӕгӕн фӕхӕццӕ газы хӕтӕл. Газуадзӕн хӕтӕлты ног участоктӕ та ныртӕккӕ арӕзт цӕуынц ӕрхонкӕйы станицӕйы, Дӕллаг Ларсы, Задалескы, ӕхсау ӕмӕ Мацутӕйы. Дзинагъайы та ахӕм куыстытӕ ахицӕн сты.

Битарты Вячеслав профилон министрады разамонӕджы ӕргом аздӕхта нуазыны доны хӕрзхъӕддзинады фарстмӕ дӕр.

Зындгонд куыд у, афтӕмӕй Цӕгат Ирыстоны федералон национ проект «Экологи»-йы фӕлгӕты ӕххӕстгонд цӕуы регионалон программӕ «Сыгъдӕг дон». Уыцы программӕйы бындурыл республикӕйы зынгӕ куыст цӕуы доны хӕдзарады райрӕзтыл. Программӕйы куыд нысангонд цӕуы, афтӕмӕй 2024 азы онг республикӕйы ӕппӕт цӕрӕн бынӕтты 98,9 проценты хъуамӕ ӕфсӕст ӕрцӕуой хӕрзхъӕд нуазыны донӕй.

Цӕгат Ирыстоны Сӕргълӕууӕджы амынддзинадмӕ гӕсгӕ Цӕрӕнуӕтты-коммуналон хӕдзарады, артаг ӕмӕ энергетикӕйы министрады специалисттӕ бӕстон раиртӕст сарӕзтой республикӕйы донуадзӕн системӕйы уавӕры тыххӕй. Уыцы бӕрӕггӕнӕнты бындурыл нымад ӕрцыдысты, доны хӕтӕлтӕ раивынӕн цы ӕхцайы фӕрӕзтӕ хъӕуы, уыдон. Специалисттӕ куыд зӕгъынц, афтӕмӕй республикӕйы донӕфсисады системӕйы бындурон рацарӕзтӕн бахъӕудзӕн 10 миллиард сомӕй фылдӕр.

— Ныртӕккӕ цы проекттыл кусӕм, уыдонӕй иу у Лӕцӕй Гуысырайы донгуырӕны онг хӕтӕлы арӕзтад. Иннӕ проекттӕ баст сты Орджоникидзейы донгуырӕны, Тарскӕйы, Змейкӕйы, Алагир ӕмӕ Дигорайы донуадзӕн системӕты рацарӕзтимӕ. Уымӕй уӕлдай, УФ-йы Арӕзтад ӕмӕ цӕрӕнуӕтты-коммуналон хӕдзарады разамынды раз фарст сӕвӕрдтам, цӕмӕй республикон проекттӕн фылдӕр ӕхца радих кӕной. Нӕ зӕрдӕ дарӕм, федералон министрад нӕ фӕндоныл кӕй сразы уыдзӕн, ууыл. Ахӕм уынаффӕ хаст куы ӕрцӕуа, уӕд, кӕй зӕгъын ӕй хъӕуы, фылдӕр фадӕттӕ уыдзӕн республикӕйы донуадзӕн хӕдзарады системӕйы уавӕр зынгӕ фӕнывылдӕр кӕнынӕн, — бафиппайдта Таматы Майрӕн.

Фембӕлды архайджытӕ ӕрдзырдтой ӕндӕр ахсджиаг хъуыддӕгтыл дӕр.

РЦИ-Аланийы Сӕргълӕууӕджы

ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here