Цӕгат Ирыстоны хъӕууон хӕдзарады къабазы дарддӕры райрӕзтӕн

0
30

Цӕгат Ирыстоны Сӕргълӕууӕг Битарты Вячеславӕн фембӕлд уыд республикӕйы хъӕууон хӕдзарад ӕмӕ хойраджы министр Уазиты Хъазыбегимӕ. Ныхасы архайджытӕ ӕрдзырдтой республикӕйы агропромышленнон комплексы дарддӕры райрӕзты мадзӕлттыл.

Зындгонд куыд у, афтӕмӕй 15-16 августы Цӕгат Ирыстоны цӕудзысты «Картофы быдыры ӕппӕтуӕрӕсеон бон»-ы мадзӕлттӕ. Уазиты Хъазыбеджы ныхасмӕ гӕсгӕ, агропромышленнон комплексы минӕвӕртты ахӕм уӕрӕх ӕмбырд Цӕгат Ирыстоны уыдзӕн фыццаг хатт. Уӕрӕсейы 36 регионӕй Дзӕуджыхъӕумӕ ссӕудзысты, картофы куыстады ӕнтыстджын архайд чи кӕны, уыцы специалисттӕ. Ирыстоны сын цы фембӕлдтытӕ уа, уыдоны рӕстӕг базонгӕ уыдзысты кӕрӕдзи фӕлтӕрддзинадимӕ, бӕстон ӕрдзурдзысты картофы куыстады нырыккон технологиты дарддӕры райрӕзтыл.

— «Картофы быдыры ӕппӕтуӕрӕсеон бон»-мӕ ссӕудзысты УФ-йы Хъӕууон хӕдзарады, Ахуырад ӕмӕ наукӕйы министрадты бӕрнон кусджытӕ, регионты агропромышленнон комплексы разамонджытӕ, наукон организациты, зӕхкусджыты ӕмӕ фермерты цӕдисты, куыстадон иугӕндты минӕвӕрттӕ, — загъта министр.

Фосдарынады къабазы уавӕры тыххӕй дзургӕйӕ, Уазиты Хъазыбег куыд фӕнысан кодта, афтӕмӕй архайд цӕуы фыстӕ дарыны куыстад рапарахат кӕныныл. Зӕгъӕм, фысты дзугты нымӕц фарон дыууӕ хатты фӕфылдӕр ӕмӕ схӕццӕ 31 мин сӕрмӕ. Куыд нысангонд цӕуы, афтӕмӕй ацы азы кӕронмӕ уыцы нымӕц хъуамӕ схӕццӕ уа 50 минмӕ.

Министры ныхасмӕ гӕсгӕ, ӕнтыстдзинӕдтӕ ӕфты зӕхкусджыты къухы дӕр. Зӕгъӕм, специалистты нымадмӕ гӕсгӕ, ацы аз нӕмыгджын хорты тыллӕджы ӕрзад иу гектарӕй схӕццӕ уыдзӕн 60 центнермӕ. Фарон та республикӕйы ахӕм культурты тыллӕг рауад 762 мин тоннӕйы бӕрц. Ацы азы та уыцы бӕрӕггӕнӕн хъуамӕ схӕццӕ уа 800 мин тоннӕмӕ.

Йӕ рӕстӕджы Битарты Вячеслав министрады разамындӕн бахӕс кодта, цӕмӕй зӕхкусӕг-фермерон хӕдзарӕдты сӕ куырдиӕттӕм гӕсгӕ сифтонг кӕна хъӕрмуӕттӕ ӕмӕ халсарты куыстад рапарахат кӕнынӕн хъӕугӕ техникон фӕрӕзтӕй. Ныр республикӕйы разамонӕг профилон министры бафарста, уыцы амынддзинад куыд ӕххӕстгонд цӕуы, уымӕй.

Уазиты Хъазыбег йӕ дзуаппы куыд фӕнысан кодта, афтӕмӕй, хъӕрмуӕттӕ сӕвӕрын чи сфӕнд кодта, уыцы хӕдзарӕдтӕн ныридӕгӕн радих кодтой 19 хъӕрмуаты. «Фермертӕй куырдиӕттӕ куы уа, уӕд ма сын радих кӕндзыстӕм 3 хъӕрмуаты», — йӕ ныхасмӕ бафтыдта министр.

РЦИ-Аланийы Сӕргълӕууӕджы

ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here