Ӕххуыс, хъуыддӕгты уӕлхъус чи балӕууыд, уыдонӕн

0
10

«Ацы фембӕлд куыстуаты хуымӕтӕджы конд не ‘рцыд, ардыгӕй фӕстӕмӕ Амалхъомады тыххӕй советы ӕмбырдтӕ кӕндзыстӕм куыстуӕтты. Хъуамӕ бынӕтты ӕвзарӕм, амалхъом цы хъуыддаджы уӕлхъус балӕууыд, уый йын куыд ӕнтысы, цавӕр къуылымпытӕ ӕййафы, ӕмӕ йын нӕ бон баххуыс кӕнын куыдӕй у, уыдӕттӕ. Мӕнӕ федтат фӕллойы, куыстады бӕрзонд культурӕимӕ продукциуадзӕг заводы уавӕртӕ. Ирыстоны ӕхсыры продукттӕ цӕттӕ кӕнын у тынг ахсджиаг хъуыддаг, нырма ис, ӕппӕт домӕнтӕн дзуапп чи нӕ дӕтты, ахӕм куыстуӕттӕ. Фӕлӕ «Ӕхсырпродукт» у ӕххӕст ӕппӕт нырыккон технологитӕй, цы продукцийы хуызтӕ уадзы, уыдоны хӕрзхъӕддзинадмӕ аипп ӕрхӕссӕн нӕй», — знон РЦИ-Аланийы Сӕргълӕууӕг Битарты Вячеслав «Ӕхсырпродукт» бабӕрӕг кӕныны фӕстӕ раныхас кодта ӕмбырды.

Зӕгъын хъӕуы уый, ӕмӕ урсагуадзӕг куыстуаты уавӕртимӕ базонгӕ сты РЦИ-Аланийы Сӕргълӕууӕджы цур Амалхъомады тыххӕй советы уӕнгтӕ, хъӕууонхӕдзарадон ӕмӕ экономикон ведомствӕты бӕрнон кусджытӕ, амалхъомтӕ, ӕндӕр хуынд адӕм. ӕмбырды агъоммӕ уал ӕрбацӕуӕг адӕм ӕрзылдысты ӕхсыруадзӕг куыстуатыл, федтой уавӕртӕ, байхъуыстой кусджытӕм дӕр. Битарты Вячеслав заводы кӕрты цы хъуыддаджы ныхас байгом кодта, уым ӕппӕт бӕрнон адӕймӕгты ӕргом аздӕхта комкоммӕ продукциуадзӕгӕн ӕххуыс кӕнынмӕ.

«Мах ацы совет номхӕссынӕн нӕ сарӕзтам, ис нӕм фӕнд, цӕмӕй амалхъомад рӕза, не ‘ппӕт хъарутӕ дӕр уыцы ‘рдӕм арӕзт сты. Иугӕр куыстуат йӕ нысантӕм цӕуы, нӕ цуды, уӕд хъуамӕ, цал стӕм, уалӕй уӕм йӕ цуры, ӕмӕ нын цы фадӕттӕ ис, уыдӕттӕй йын ахъаз кӕнӕм. Махмӕ та куыд уайы? Хъуамӕ йӕ цыфыддӕр фӕндӕгтыл ӕрзилын кӕнӕм, тухӕнӕй йӕ амарӕм, цӕмӕй стыхса, йӕ къух ауигъа хъуыддагыл», — бафиппайдта республикӕйы Сӕргълӕууӕг.

Куыд бацамыдта, афтӕмӕй, республикӕйы экономикон рӕзтыл чи архайы, уыдонӕн цӕлхдуртӕ ӕвӕрын нӕ хъӕуы. Куыстуат байгом кӕнынӕн зӕхх райсынмӕ куы ӕрцӕуынц, уӕд уыцы аукционты балӕууынц, ӕрмӕстдӕр искуыцӕй ӕмӕ искӕмӕй ӕхца ратоныныл чи хъуыды кӕны ӕмӕ архайы, ахӕмтӕ. Уыдон сусӕгӕй-ӕргомӕй къуылымпытӕ фӕкӕнынц ӕцӕг амалхъомӕн, уыдоны домӕнтыл куы нӕ сразы вӕййы, уӕд ӕй аукционӕй фӕхауӕццаг кӕнынц.

Битарты Вячеслав рӕгъмӕ цы фарстытӕ рахаста, уыдон сты рагон, кӕд сыл ныр архайын райдыдтой, уӕддӕр ахъаззагӕй нӕма ӕнтысынц.

«Кӕд ӕмӕ хъомвосы нымӕц фӕфылдӕр кӕныныл архайӕм, уӕддӕр хи урсагӕй нӕ республикӕ бафсадын нӕ бон нӕу. Тырнгӕ бӕргӕ кӕнӕм, фӕлӕ нӕм ныртӕккӕ базарады фылдӕр ис ӕрбаласӕггаг ӕхсыры продукци. Афтӕмӕй не ‘хца дӕр ӕндӕр регионтӕм ивылы, хи хомаггуыстгӕнӕг къабаз нӕм фидар кӕй нӕма у, уымӕ гӕсгӕ ӕвзарӕм ахӕм зындзинӕдтӕ. Тынг ахсджиаг у ӕхсыруадзӕг — ома, фосдарӕг ӕмӕ ӕхсыры куыстгӕнӕджы ‘хсӕн ӕмбарындзинад ӕмӕ нывыл ӕмгуыстад. Хъуыддаг ӕрмӕст ӕхсыр райсыныл куы ныууадзӕм, уӕд абон уа, райсом, уӕддӕр фосдарӕг бамбардзӕн: йӕ продукци агуырд нӕ цӕуы ӕмӕ ӕрцӕудзӕн йӕ фос скуынӕг кӕнынмӕ. Уый та у фӕстӕмӕ къахдзӕф. Сӕйрагдӕр нысан у ӕппӕт уыцы цӕгтӕ баиу кӕнын ӕмӕ хӕрзхъӕд продукциимӕ базарады бынат ссарын», — бацамыдта республикӕйы Сӕргълӕууӕг.

Куыстуат «Ӕхсырпродукт» кусы фондз азы дӕргъы, йӕхи уал ирыстойнаг фӕлхасгӕнджытӕн хорзӕй базонын кодта. Ис сӕм фӕндтӕ куыстад рапарахат кӕныны тыххӕй, уыдӕттӕ та домынц цавӕрдӕр фӕрсаг ӕххуыс. Йӕ разамонӕг Абайты Алан ӕмбырды архайджытӕн куыд радзырдта, афтӕмӕй ӕнӕ искӕй ӕххуысӕй сарӕзта ацы завод, цӕмӕй дзы хъомысджын стыр куыстуат рауайа, уый тыххӕй та хъӕуы ныллӕг проценттимӕ ӕфстау райсын. Йӕ архайдӕй ницы уайы, ӕмбӕлы цӕлхдуртыл, «Хъӕууонхӕдзарадон банк» цы дзуапп дӕтты, уымӕ гӕсгӕ ӕхсыркусӕг заводтӕн ныллӕг проценттыл ӕфстау нӕ дӕттынц. Уыдӕттӕ, дам, хауынц ӕрмӕстдӕр ӕхсыруадзджытӕм, ома, фосдарджытӕм.

Ӕмбырд йӕ куыст кодта, афтӕмӕй Битарты Вячеслав бабар кодта бадзурын «Хъӕууонхӕдзарадон банк»-мӕ ӕмӕ йын йӕ гӕнӕнтӕ ацы хъуыддаджы фӕдыл базонын. Кӕд ӕмӕ Абайы-фыртӕн «нӕй-нӕй» кодтой, уӕд ӕмбырды архайджытӕм та ӕрбарвыстой разыйы дзуапп. Куыстуаты разамонӕг Абайты Алан куыд радзырдта, афтӕмӕй йӕм ис цӕттӕ проект ног завод саразынӕн, зӕхх дӕр сӕм ис. Цӕмӕй проект экспертизӕйы иртӕст ӕрцӕуа, уымӕн хъӕуы 50 милуан сомы бӕрц. Ис ма ӕндӕр зындзинӕдтӕ дӕр. Хорз уаид, куыстуат рацаразын инвестицион проектмӕ бахӕссын, фӕлӕ закъонмӕ гӕсгӕ уырдӕм, куыст кӕм цӕуы, ахӕм объекттӕ нӕ хауынц.

Заводы генералон директор ӕрхаста ахӕм бӕрӕггӕнӕнтӕ: ӕндӕр регионтӕй ӕрбаласӕггаг ӕхсыры продукци оптон базӕты мӕймӕ вӕййы 2 мин тоннӕйы бӕрц, ома, суткӕмӕ — 70 тоннӕйы.

«Мах куыстуат та мӕймӕ бакусы 110 тоннӕйы, кӕй зӕгъын ӕй хъӕуы, уыдонимӕ нӕ бон ерыс кӕнын нӕу иугӕйттӕй. Стыр зындзинад ӕййафӕм егъау дуканитӕ «Магнит», «Пятерочка», ӕндӕр ахӕм хъомысджын уӕйгӕнӕндӕттӕ нын нӕ продукци бӕрзонд ӕфтаугӕ проценттимӕ кӕй исынц, уый тыххӕй. Зӕгъӕм, «Кубанская буренка»-йыл ӕвӕрынц 18 проценты, мах урсагыл та — 50 проценты. Афтӕ зӕгъӕн ис, ӕмӕ нӕм республикӕмӕ цы стыр фирмӕтӕ-дуканитӕ ӕрбакъахдзӕф кодтой, уыдон бынӕттон продукциуадзӕджы раз ӕвӕрынц ӕргом цӕлхдуртӕ», — загъта Абайы-фырт.

Куыд бамбарын кодта, афтӕмӕй бирӕ хӕттыты архайдта уыцы стыр дуканиты хицӕуттимӕ аныхас кӕнын. Фӕлӕ уыдонӕн сӕ разамынд бадынц ӕндӕр регионты, стыр горӕтты ӕмӕ хӕстӕг нӕ цӕуынц. Нӕ сӕ фӕнды хъуыддаджы ныхасы архайын. Кӕд ӕмӕ «Ӕхсырпродукт»-ӕн йӕ бон у фылдӕр продукци уадзын, уый охыл ног завод саразын Ногиры бынмӕ, уӕддӕр йӕ разамонӕджы тынгдӕр тыхсын кӕны, йӕ продукцийӕн базарадмӕ ӕнцон рахизӕнтӕ кӕй нӕй, уый. Абайы-фырт ма фӕбӕрӕг кодта ӕндӕр ахсджиаг, иннӕ продукциуазджытӕн дӕр вазыгджын чи у, ахӕм фӕзилӕнтӕ.

Битарты Вячеслав бахӕс кодта экономикон рӕзты министр Томайты Хъазыбегӕн, цӕмӕй хӕрзцыбыр рӕстӕгмӕ стыр дуканиты разамонджытимӕ фембӕлой, ӕмӕ ӕппӕт ацы лыггӕнинаг хъуыддӕгтыл бӕстон ӕрдзурой.

«Мах уавӕртӕ сарӕзтам, цӕмӕй республикӕмӕ ахӕм стыр базарадон куыстуӕттӕ ӕрбахизой, фӕлӕ уый ууыл дзурӕг нӕу, ӕмӕ нын нӕ адӕмы бастигъой. Хъуамӕ сӕ уӕйгӕнӕн фӕзуӕтты 30 проценты онг бынӕттӕ скӕной ирыстойнаг продукцийӕн, уӕдӕ, бафтаугӕ проценты бӕрц дӕр хъуамӕ уа иннӕ товарты ӕмхуызон», — бафӕдзӕхста республикӕйы Сӕргълӕууӕг. Уымӕй дарддӕр ма сӕвӕрдта домӕн, цӕмӕй «Ӕхсырпродукт»-ӕн бацӕттӕ кӕной амалхъомадон пълан, ахӕм уавӕртӕ саразын, цӕмӕй йын радтой бирӕазыккон ӕфстау ныллӕг проценттимӕ.

Республикӕйы Сӕргълӕууӕджы фарстытӕн дзуаппытӕ лӕвӕрдтой Томайты Хъазыбег, хъӕууон хӕдзарад ӕмӕ хойраджы министры хӕдивӕг Рубайты Ибрагим, сӕ хъуыдытӕ  ӕмӕ хатдзӕгтӕ загътой ӕмбырды иннӕ архайджытӕ.

Бутаты Эльзӕ

ОСТАВЬТЕ ОТВЕТ

Please enter your comment!
Please enter your name here