«Машук»-ы архайджытӕ фембӕлдысты регионты сӕргълӕуджытимӕ

0
34

Зындгонд куыд у, афтӕмӕй горӕт Пятигорскы йӕ куыст кӕны Цӕгат Кавказы федералон зылды ӕрвылазон фӕсивӕдон форум «Машук». Дыццӕджы лагеры уазджытӕ уыдысты Уӕрӕсейы Президенты ӕххӕстбарджын минӕвар Цӕгат Кавказы федералон зылды Александр Матовников, Республикӕ Цӕгат Ирыстон-Аланийы Сӕргълӕууӕг Битарты Вячеслав, федералон зылды иннӕ субъектты разамонджытӕ ӕмӕ минӕвӕрттӕ.

Ацы аз Цӕгат Кавказы фӕсивӕдон форум кусдзӕн ӕртӕ радӕй. Фыццаг дыууӕ рады архайджытӕн конкурсон къамисмӕ бавдисдзысты ӕхсӕнадон ӕмӕ культурон цардимӕ, стӕй амалхъомад ӕмӕ инновациты райрӕзтимӕ баст проекттӕ. Форумы организацион комитет рагагъоммӕ куыд фехъусын кодта, афтӕмӕй ацы хатт фӕсивӕдон проектты конкурсы уӕлахиздзаутӕн снысан кодтой ахӕм гранттӕ: юридикон организацитӕн — 0,5 милуан сомы онг, хицӕн адӕймӕгтӕн та — 300 мин сомы онг.

«Машук-2019»-мӕ ӕдӕппӕт сӕмбӕлдзысты 3 мин адӕймагӕй фылдӕр. Уыдонӕй 300 адӕймаджы — Цӕгат Ирыстоны минӕвӕрттӕ. Мӕйы кӕронмӕ фӕсивӕдӕн уыдзӕн бирӕ алыхуызон ахуырадон лекцитӕм байхъусыны, мастер-класстӕ ӕмӕ семинарты, стӕй ӕндӕр цымыдисаг мадзӕлтты архайыны фадат. Уымӕй уӕлдай, Цӕгат Кавказы регионты минӕвӕрттӕ бацӕттӕ кодтой аивадон равдыстытӕ, сфӕлдыстадон программӕтӕ.

Федералон зылды субъектты бонтӕ форумы алы аз дӕр саразынц. Ацы хатт та лагеры программӕ райдыдта Цӕгат Кавказы федералон зылды бонӕй. Уыцы иумӕйаг бӕрӕгбонмӕ форумы архайӕг ӕппӕт делегацитӕ дӕр бацӕттӕ кодтой сӕрмагонд равдыстытӕ ӕмӕ ӕндӕр программӕтӕ. Уыдонӕн аргъгӕнӕг систы Александр Матовников, Битарты Вячеслав, Стъараполы крайы губернатор Владимир Владимиров, Дагестаны Сӕргълӕууӕг Владимир Васильев, Кӕсӕг-Балхъары республикӕйы Сӕргълӕууӕджы хӕстӕ рӕстӕгмӕ ӕххӕстгӕнӕг Казбек Коков ӕмӕ иннӕ регионты разамонджытӕ.

Цӕгат Ирыстоны Сӕргълӕууӕг форумы иумӕйаг мадзӕлттӕй уӕлдай сӕрмагондӕй фембӕлд нӕ республикӕйы фӕсивӕды делегацийы уӕнгтимӕ. Ӕрыгӕттӕн ӕхсызгон ӕмӕ цымыдисаг уыд республикӕйы разамонӕгимӕ комкоммӕ аныхас кӕнын, алкӕй дӕр сӕ фӕндыд йӕ фарст Битары-фыртмӕ раттын, ӕмӕ ахӕм фадат кӕмӕн фӕцис, уыдон райстой ӕргом ӕмӕ бӕстон дзуаппытӕ.

— Форум «Машук»-ыл сӕххӕст 10 азы. Уыцы ӕмгъуыдмӕ йӕ арфӕйаг архайдӕй айхъуыст ӕппӕт бӕстӕйыл дӕр. Алы аз дӕр фӕсивӕдон форум йӕ архайджыты размӕ рахӕссы цымыдисаг ахуырадон ӕмӕ рухстауӕн программӕтӕ, алы регионты ӕрыгон фӕлтӕры минӕвӕрттӕн вӕййы хуыздӕр базонгӕ уӕвыны фадат. Сӕрмагонд ныхасы аккаг у, хъӕппӕрисджын фӕсивӕд форуммӕ ахсджиаг проекттӕ кӕй бавдисынц, уый дӕр. Уыимӕ, сӕ цымыдисагдӕртӕ райсынц паддзахадон ӕххуыс грантты хуызы, — фӕнысан кодта Битарты Вячеслав.

Артур Кузубов республикӕйы Сӕргълӕууӕгмӕ бахатыд, цӕмӕй фӕсивӕдимӕ ахӕм фембӕлдтытӕ арӕхдӕр арӕзт цӕуой. Битарты Вячеслав уыцы хъӕппӕрис хорзыл банымадта, ӕмӕ РЦИ-Аланийы Фӕсивӕды хъуыддӕгты фӕдыл комитеты сӕрдар Джусойты Русланӕн бахӕс кодта уыцы фарстыл бакусын.

Ахӕм бӕлвырд амынддзинӕдтӕ лӕвӕрд ӕрцыд фӕсивӕды иннӕ фарстытӕ ӕмӕ хъӕппӕристы фӕдыл дӕр.

«Машук» дарддӕр йӕ куыст кӕны.

Хъойбайты Галинӕ

ОСТАВЬТЕ ОТВЕТ

Please enter your comment!
Please enter your name here