Ӕмзӕрдӕйӕ, ӕмзондӕй сӕ адӕмӕн лӕггад кодтой

0
35

«Мой старший брат, мой горящий, пламенный Цоцко!

Привет тебе! Боюсь я твоего пламени, оно заразительно, искрометно! Боюсь, ибо, если заражусь, то сгорю дотла и угасну. Ведь это ты неугасаем. В тебя Осетия вложила весь пыл свой, тобою она выразилась», — фыста Цоцкомӕ Брытъиаты Елбыздыхъо.

Уыцы фыдтымыгъ, ссӕдзӕм ӕнусы фыд-зонд ӕртынӕм азты, цӕвӕгӕй кӕрдӕгау, ахаста бирӕ удты. Йӕ цӕхӕры бахаудта Ирыстон дӕр. Тибиты рынау азылд нӕ хуыздӕртыл ӕмӕ сӕ скуынӕг кодта. Уыцы ӕлгъыст рӕстӕджы ирон адӕм февнӕлдтой кӕрӕдзийӕ сӕ маст исынмӕ, ӕдзӕстуарзондзинады уацары бахаугӕйӕ, нӕ хуыздӕртыл дам-думтӕ, тугтӕ мысын райдыдтой ӕмӕ сӕ ахстой. Сӕ амидингӕнджытӕ та уыдысты НКВД-йы  «бӕрнон» ӕмӕ Ирыстонӕн фыдгӕнӕг адӕймӕгтӕ. Ирон адӕмӕй Къостайы фӕдзӕхст: «Ныммӕл мын фӕсмонӕй, ды искуы хӕддзуйӕ куы скӕнай ӕлдар!..» куы айрох вӕййы, уӕд йӕ сӕфты къахыл ныллӕууы. Йӕ сӕфты къахыл уыд уӕд дӕр.

Адӕм кӕрӕдзийы хъӕр нал ӕмбӕрстой, дзырдхӕсджытӕ ӕмӕ «адӕмы знӕгтӕ» сарӕх сты. Мӕнӕ куыд фыссы А. Солженицын йӕ чиныг «Архипелаг ГУЛАГ»-ы: «Уыдис-иу афтӕ дӕр: Ирыстоны чекисттӕн лӕвӕрд уыд республикӕйы фондзсӕдӕ адӕймаджы фехсыны бар, уыдон ма ракуырдтой, цӕмӕй ма сыл бафтыдтаиккой, радтой ма сын ноджыдӕр дыууӕсӕдӕ фӕндзай фехсыны бар».

Гъе, уый уыд стыр бӕллӕх, чи нӕма уыд, ахӕм фыдгӕнд нацийы ныхмӕ. Бафиппайын хъӕуы уый, ӕмӕ, ахст адӕмӕн тӕрхон чи кодта, уыцы «тройкӕты» иу ирон дӕр кӕй никуы уыд. Нӕ адӕмӕн цыфыддӕр знаггад кодтой ӕрцӕуӕг лӕгтӕ. Сӕ мыггӕгтӕ архивты сты.

Ахст адӕмӕн сӕ фылдӕр уыдысты, нӕ нацийӕн  ном чи кодта, уыдон. Ӕрмӕст фысджытӕ дзы банымайӕн ис ӕртынӕй фылдӕр. Фыдазары амӕттӕгтӕн абон сӕ нӕмттӕ сног сты, мысӕм сӕ. Хардзау нӕм кӕсы сӕ хъысмӕт. Уыдонӕй иу у Ӕмбалты Цоцко.

Фӕлтӕрӕй-фӕлтӕрмӕ ирон адӕмы ‘хсӕн ацы Арвы Уациллайы хуызӕн куырыхон лӕджы тыххӕй бирӕ арфӕйы ныхӕстӕ цӕуы, адӕмӕн бафӕзминаг чи у, ахӕмтӕ. Хӕлар уыд  ирон интеллигенцийы хуыздӕр минӕвӕрттимӕ. Бирӕ  бӕлвырд хабӕрттӕ ӕмӕ цаутӕ нын ныууагъта Къоста, Елбыздыхъо ӕмӕ иннӕты тыххӕй. Уагӕр ма йын 1937 азы йе сфӕлдыстадон бынтӕ куы нӕ бабытъайлаг кодтаиккой!

Къоста йӕ иу фыстӕджы фыссы: «Мӕ зӕрдӕ мын тынг фӕцагайдтой Цоцкойы ныхӕстӕ. Куыд диссаджы хорз адӕймаг у, ӕвӕдза!» Йӕхӕдӕг та Къостайӕн уыйбӕрц аргъ кодта, Ирыстоны зонд ӕмӕ ныфс дзы уыдта ӕмӕ йӕ сӕрвӕлтау йӕ уд дӕр радтаид. Къоста куы амард, уӕд ыл сау фӕдардта — йӕхи нал адаста — суанг йӕ бабыны онг.

Мӕнӕ дзы куыд зӕгъы зындгонд ӕхсӕнадон кусӕг ӕмӕ фыссӕг Хӕныкъаты Уӕлгъа йӕ уац «Фыстӕг мӕ кӕстӕрмӕ»-йы: «ӕмбалты Цоцкойы ном фехъуыстаис. Фыссӕг уыд, Къостайы дӕр зыдта. Базонгӕ дӕн Цоцкоимӕ 1923 азы Калачы. Уӕд уыдис ӕмбискары лӕг, фӕлӕ мӕм йӕ даргъ зачъеты тыххӕй ацӕргӕ каст. Мардыл нӕм хил дардтой, ӕмӕ Цоцко хӕрз лӕппуйӕ Къостайыл стыр фыдохы охыл цӕрӕнбонты хил фӕдардта. Ацы сахат, цыма удӕгасӕй уынын уыцы фырнымд, уӕздан, рӕсугъд цухъаджын лӕджы бульвары цӕугӕйӕ. Ахӕм адӕймӕгтӕ вӕййы ӕмӕ, кӕм цӕуынц, кӕм лӕууынц, уым алцыдӕр фӕхуызджындӕр вӕййы. Уыцы адӕмтӕй уыдис Цоцко дӕр…»

Цоцко уыдис хистӕр ӕмӕ кӕстӕры, сылгоймаджы раз, ӕхсӕны царды ирон ӕфсарм ӕмӕ хорз ӕгъдауы, рӕстдзинады ӕмсӕр адӕймаг. Ирон адӕмӕн сыгъд цырагъау. Ирон ӕвзаг ӕмӕ ирон чиныг саразыныл Къостайау йӕхи хъардта. Уыд бирӕ ирон чингуыты редактор ӕмӕ суанг корректор дӕр. Уымӕн ма ис абон дӕр хъазгӕмхасӕнты фехъусӕн: «Цоцкойы цӕстӕй йӕм ӕркӕс!», «Лыстӕг ӕм ӕркӕс, Ӕмбалты Цоцко» ӕмӕ ӕндӕртӕ. Миллеры зындгонд ӕртӕвзагон дзырдуатмӕ дӕр лыстӕг уый ӕркаст.

Базырджын систы, ссӕдзӕм ӕнусы ӕртынӕм азты Ирыстоны хуыздӕртӕ цагъды куы кодтой, уӕд Цоцкойы ныхӕстӕ: «Иры фарн фӕцӕуы, Иры фарн, лӕппутӕ!»

Ӕмбалты Цоцко райгуырд 1871 азы ӕрыдоны. Ам дины семинар каст фӕци 1891 азы. Семинар-иу каст чи фӕцис, уымӕн бар лӕвӕрд цыд сауджын кӕнӕ ахуыргӕнӕджы куыст кӕнын. Ӕмӕ Цоцко равзӕрста рухсады куыст. Уыцы хъуыддаджы балӕууыд Къостайы фарсмӕ, ирон мӕгуыр адӕмы сывӕллӕтты йӕ фӕдыл хуыдта «рухсмӕ ӕнӕзивӕг». Уыимӕ хистӕрты зонды дӕр уагъта размӕ тырнындзинад, сӕ зӕрдӕты — ныфс ӕмӕ рӕсугъд ӕнкъарӕнтӕ.

Ахуыргӕнӕджы ӕмӕ ӕхсӕнадон куыстӕй уӕлдай Цоцко йе ‘ргом аздӕхта ирон цардыуагмӕ, не ‘гъдӕуттӕм, раджы архайын райдыдта адӕмон сфӕлдыстад ӕмбырд кӕныныл. Ссӕдзӕм азты ӕрзылд Цӕгат ӕмӕ Хуссар Ирыстоныл, ахӕццӕ суанг Лабӕмӕ дӕр. Тӕлмац кодта уырыссаг ӕмӕ немыцаг ӕвзӕгтӕй зындгонд фысджыты уацмыстӕ. Комкоммӕ немыцагӕй иронмӕ раивта Шиллеры драмӕтӕ «Абырджытӕ» ӕмӕ «Вильгельм Телль». Фыццаг хатт иронау мыхуыры рацыдысты 1924 азы Берлины. Афтӕ ма комкоммӕ ирон ӕвзагмӕ ратӕлмац кодта Ганс Христиан Андерсены цалдӕр аргъауы дӕр. Уыдонӕй иу — «Булӕмӕргъ». Бирӕ раивта Л.Толстойы ӕмӕ М.Горькийы радзырдтӕй (сӕ дыууӕимӕ дӕр уыд зонгӕ). М.Лермонтовы, В.Вересаевы, А.Хирьяковы ӕмӕ ӕндӕр фысджыты уацмыстӕй, фӕлӕ сӕ фылдӕр къухфыстӕй фесӕфт. Мыхуыры дзы цы рацыд, уыдонӕй у В.Короленкойы «Макъары фын».

Уыцы рӕстӕджы Уӕрӕсейы ӕмӕ дунейы зындгонд фысджыты уацмыстӕ ирон ӕвзагмӕ тӕлмац кӕныныл куыстой Зӕнджиаты Бӕбу, Цомайты Хадзырӕт ӕмӕ Ӕмбалты Цоцко. Ӕртӕйӕ дӕр уыцы хъуыддагмӕ афтӕ хорз арӕхстысты, цы уацмыстӕ раивтой, уыдон иронау афтӕ сдзурын кодтой, раст цыма мах ӕвзагыл фыст ӕрцыдысты, уыйау. Абон дӕр уыцы тӕлмацтӕн ӕмбал нӕй. Гӕдиаты Цомахъ Цоцкойы тӕлмацы тыххӕй фыста: «Стыр ӕмӕ зынаргъ куыст бакодта ӕмбалты Цоцко. Сыгъдӕг ирон ӕвзагӕй раргом кодта уый Шиллеры рӕсугъд ӕмӕ ӕнусмӕ баззайгӕ хъуыдытӕ адӕмы ӕфхӕрды тыххӕй, адӕмы ӕхсары тыххӕй… Стыр зӕрдиаг ӕмӕ зынаргъ хъуыддаг сарӕзта нӕ литературӕйӕн, нӕ ирон адӕмӕн ӕмбалты Цоцко «Вильгельм Телль»-ы ирон ӕвзагмӕ раивынӕй».

Цоцко бирӕ архайдта «Ирон газет» рауадзыныл. Уым фыста ӕгъдӕуттӕ зыгъуыммӕгӕнджыты ныхмӕ. Зӕрдиагӕй архайдта хорз ӕгъдӕуттӕ царды фидар кӕныныл, газеты хъомыс фылдӕр, йӕ къуылымпыдзинӕдтӕ йын иуварс кӕныныл. Газет джиппы кӕм цыди, уым — Шуваловы типографи цы хӕдзары уыд, уый къулыл ын Номарӕн къӕй бакӕныны фӕндон хуымӕтӕджы нӕ фӕзынд нӕ интеллигенцийы хъуыдыйы.

ССР Цӕдисы Наукӕты академи В.Миллеры арӕзт «Ирон-уырыссаг-немыцаг» дзырдуат ӕртӕ чиныгӕй рауадзын куы сфӕнд кодта, уӕддӕр ӕххуысмӕ, куыд ирон дзырды дӕснымӕ, афтӕ Цоцкомӕ фӕдзырдтой Ленинградмӕ. Гулуты ӕндри йӕ мысинӕгты фыссы: «1925 азы Цоцко ӕмӕ А.Фрейман куыстой В.Ф.Миллеры «Ирон-уырыссаг-немыцаг дзырдуат»-ыл — цӕттӕ йӕ кодтой мыхуыры рауадзынмӕ. Фӕлӕ Цоцкомӕ уый ӕгъгъӕд нӕ каст. Ленинграды паддзахадон университеты ректор, профессор Томашевский ирон студенттӕн каст ирон ӕвзаджы курсӕй лекцитӕ, практикон ахуыртӕ та студенттимӕ кодта ӕмбалты Цоцко».

«Йе сфӕлдыстадон куыст йӕ тӕккӕ тынджы уыди Цоцкойӕн, афтӕмӕй хахуырты амӕттаг баци, — фыстой йӕ хӕстӕджытӕ Ӕмбалты Додтан ӕмӕ Хъуылаты Валодя, — 1937 азы октябры йӕ хӕдзарӕй ракодтой ӕмӕ йӕ ӕрцахстой. Чиныгӕй, къухфыстӕй… уӕзласӕн машинӕты сӕ бакалдтой. Йӕхи йын гуыффӕмӕ схизын кодтой».  Ӕмӕ араст йӕ фӕстаг фӕндагыл — адзалы фӕндагыл. Уыцы сӕфты фӕндагыл ацыдысты, йе сфӕлдыстадон бынтӕй мыхуыргонд чи не ‘рцыд, уыдон дӕр.

Ӕмбалты Цоцко ӕмӕ Брытъиаты Елбыздыхъо  зӕрдӕйы уагӕй, удыконд ӕмӕ зондӕй хӕрз хӕстӕджытӕ уыдысты,  ирон адӕмӕн балӕггад кӕныны уаргъ Къостайы амарды фӕстӕ сӕхимӕ райстой ӕмӕ йыл ӕвӕллайгӕйӕ хъуыды кодтой, зӕрдиагӕй йыл  куыстой.  Кӕрӕдзиуыл уыдысты ӕнувыд, иу дзы иннӕмӕн ницы хӕлӕг кодта, иу дзы иннӕйы раз ӕхсызгонӕй дзуапп лӕвӕрдта, йӕ адӕмӕй хорзӕй цы базыдта, уымӕй. Аргъау уа, таурӕгъ, ӕмбисонд, уӕлдай нӕу — иумӕ йыл цин кодтой ӕмӕ йӕ кӕрӕдзийӕн ӕхсызгонӕй дзырдтой. Ноджы ма сӕм ӕмхиц кодтой рӕзгӕ фӕлтӕры.  Стӕй архайдтой, ногӕй-иу цы базыдтой ирон адӕмон сфӕлдыстадӕй, сӕ хорз ӕгъдӕуттӕй, сӕ дунембарынадӕй, сӕ адӕймагдзинадӕй, сӕ историйӕ, уый ӕппӕтӕн фехъусын кӕныныл.

Цоцко ӕмӕ Елбыздыхъойы ӕхсӕн кӕд дӕс азы ис, уӕддӕр сӕ хистӕр ӕмӕ кӕстӕры ӕфсарм нӕ хъыгдары. Уымӕн ӕмӕ сӕ хӕсы раз сӕхи ӕнкъарынц ӕмсӕр, ӕмхуызон, сты ӕмзонд, ӕмхъуыдыгӕнджытӕ, ӕмтохгӕнджытӕ. Уымӕй, Хуыцау адӕймаджы удыхъӕдӕн цыдӕриддӕр хорзӕй радта, уыдонӕй сты хайджын. Чи дзы кӕмӕн фылдӕр аргъ кӕны: хистӕр Цоцко кӕстӕр Елбыздыхъойӕн, ӕви кӕстӕр Елбыздыхъо хистӕр Цоцкойӕн, уый бӕрӕг нӕу. Кӕрӕдзи, чи курдиатджындӕрӕй, не ‘взарынц.

Елбыздыхъо у ирон драматургийы ӕмӕ Ирон театры бындурӕвӕрӕг. Йӕ трагеди «Амран»-ӕй схызт дунеон драматургийы бӕрзӕндмӕ, фӕлӕ йӕ рох никуы кодта, йӕ адӕмы раз ма йыл ӕндӕр — рухстауӕджы хӕс ӕвӕрд кӕй ис, уый. Уыцы хъуыддаджы мыхуырӕн стыр хъомыс ис, ӕмӕ, студент уӕвгӕйӕ, Бетъырбухы уадзын райдыдта журнал «Хуры тын». “Ирон мӕгуыр лӕгӕн ӕцӕгӕлон бӕстӕйы, уӕлдайдӕр Бетъырбухы, журнал джиппы уадзын иунӕгӕй йӕ бон никуы суыдзӕн, — фыссы Елбыздыхъо йӕ журналы фыццаг номыры. — ӕвӕццӕгӕн ӕмӕ мӕ къухы дӕр нӕ бафтыдаид. Фӕлӕ арфӕгонд уӕнт, фӕсивӕдӕй чи баххуыс кодта. Арфӕ сын кӕнын. Ирон арфӕ ракӕнӕд Иры дзыллӕ Хъамболатӕн Цопанаты, Хаджумарӕн Алыккаты, Ногийӕн Солтӕмытаты, Павлейӕн Цӕболты. Уыдон хардз ӕмӕ куыстӕн сӕ фылдӕр айстой сӕхимӕ. «Хуры тын» уыдон руаджы фендзӕн йӕ райгуырӕн дуне.

Арфӕйаг уый тыххӕй сты, ӕмӕ пайдаӕнхъӕлмӕ нӕ кӕсынц, ӕххуыс кӕнынц, ӕрмӕст журнал цӕмӕй цӕра, рӕза ӕмӕ тыхджын кӕна, уый тыххӕй».

Ацы ныхӕстӕй Елбыздыхъо зӕгъы, журнал йӕхӕдӕг йӕхи кады тыххӕй кӕй нӕ уадзы, фӕлӕ йӕ алыварс кӕй ис хорз ирон лӕгтӕ, сӕ адӕмӕн балӕггад кӕнынӕн сӕ ис, сӕ бон, сӕ фыдӕбон ӕвгъау чи нӕ кӕны, ахӕмтӕ. Журналы нысаны тыххӕй та фыссы «Ныстуан»-ы разныхасы. Мӕнӕ дзы цалдӕр хъуыдыйады:

«Зӕхмӕ хуры тын куыд ныккӕса — кӕдӕм нӕ бахъардзӕн йӕ рухс! Мах дӕр фӕзмдзыстӕм хуры тыны. Йӕ ном дӕр ныл ис. Мах бӕллӕм хуры тынау талынг срухс кӕнын, уазал батавын, уӕнгты уӕнгрог цӕвӕрын!»

Стыр ӕмӕ арфӕйаг хӕстӕ сӕвӕрдта Елбыздыхъо «Хуры тын»-ы раз, кӕд ын дзы ӕртӕ номыры рауадзын йеддӕмӕ нӕ бантыст, уӕддӕр. Цыппӕрӕм номыр нал рацыд, уымӕн ӕмӕ «Мӕгуыр лӕгӕн журнал джиппы уадзын йӕ бон никуы уыдзӕн». Фӕлӕ йӕ ныфс нӕ асаст. Йӕ ныфс нӕ асаст ахӕстоны бадгӕйӕ дӕр. Уый нӕ, фӕлӕ ахӕстоны райгуырд фыццаг ирон национ драмӕ.

Елбыздыхъойӕн йӕ ныфс нӕ асаст ссӕдзӕм ӕнусы революциты тымыгъты дӕр. Уымӕн ӕмӕ зыдта иу рӕстдзинад — йӕ ирон адӕмы фидӕнӕн лӕггад кӕнынӕй йыл стырдӕр хӕс ӕвӕрд кӕй нӕй. Ӕмӕ уыцы хъуыддаджы йӕ фарсмӕ фидар лӕууыдысты Цоцкойы хуызӕн намысджын, иузӕрдион ӕнӕбасӕтгӕ лӕгтӕ.

Фӕлӕ цы зӕгъӕм хъысмӕтӕн, фыдцӕрдтытӕн нӕ бафӕрӕзта йӕ ӕрдзон буар, низ ыл стых, ӕмӕ нын ӕй ӕнафоны мӕлӕт байста.

Ссӕдзӕм ӕнусы ӕртынӕм азты Ирыстоны ахст ӕмӕ мард цы адӕм ӕрцыдысты, уыдонӕн сӕ фылдӕр уыдысты Цоцкойы хуызӕттӕ! Уыцы азты сар йӕ сӕр кодта, кӕмӕ-иу фӕкомкоммӕ сты, уымӕн. Зӕгъгӕ, Брытъиаты Елбыздыхъо, Колыты Аксо, Хъороты Дауыт, Токаты Алихан, Дзасохты Гиго ӕмӕ иннӕтӕ, сӕхи мӕлӕтӕй раздӕр нӕ амардысты, уӕд дзы уыдон дӕр нӕ аирвӕзтаиккой. Уӕддӕр сын сӕ уацмыстӕ ӕрцахстой. Алы тугтӕ сыл мысыдысты, адӕмӕн сӕ ӕнад кодтой. Дзӕгъӕлы! Сӕ рӕстдзинад, сӕ ӕхцон ӕмӕ аив дзырд ӕрттывта цыфӕнды быроны бынӕй дӕр, рӕвдыдта адӕмы зӕрдӕтӕ. Иуахӕмы рарӕдывта ӕппӕт ӕхгӕд дуӕрттӕ  ӕмӕ фӕрнӕйдзаг хъуыддӕгтӕ аразы рӕстаг адӕмы ӕхсӕн, иу фӕлтӕрӕй хизы иннӕ фӕлтӕрмӕ. Афтӕ уыдзӕн ӕнусты. Уымӕн ӕмӕ фарны дзырдӕн йӕ хъысмӕт ахӕм у.

Цгъойты Хазби

ОСТАВЬТЕ ОТВЕТ

Please enter your comment!
Please enter your name here