ЦИПУ: фӕсарӕйнаг студенттӕ — фылдӕр

0
26

Цӕгат Ирыстоны Хетӕгкаты Къостайы номыл паддзахадон университеты чи ахуыр кӕны, уыцы фӕсарӕйнаг студентты нымӕц ацы аз дыууӕ хатты фӕфылдӕр уыдзӕн. Уымӕн ӕвдисӕн сты университеты исӕн къамисы рагагъоммӕйы бӕрӕггӕнӕнтӕ.

Зӕгъӕм, фарон Цӕгат Ирыстоны сӕйраг уӕлдӕр ахуыргӕнӕндоны студенттӕ систы 67 фӕсарӕйнаджы. Ацы аз та уал ныридӕгӕн университеты исӕн къамисмӕ куырдиӕттӕ ӕрбалӕвӕрдтой фӕсарӕйнаг бӕстӕты 108 минӕвары. Уыимӕ, боныгон ахуырадмӕ хъӕугӕ гӕххӕттытӕ бадӕттӕн ис 20 августмӕ, фӕсаууонмӕ ахуырадмӕ та — 30 октябры онг.

ЦИПУ-йы ныртӕккӕ чи ахуыр кӕны, уыцы фӕсарӕйнаг студенттӕн сӕ фылдӕр хай сты Хӕдбар Паддзахӕдты ӕмхӕларады бӕстӕтӕ — Туркменистан, Узбекистан, Казахстан, Сомих ӕмӕ иннӕты минӕвӕрттӕ. Ацы аз ма сыл бафтдзысты дард фӕсарӕнты — Китайы, Камерун ӕмӕ Сенегалы минӕвӕрттӕ дӕр.

Университеты исӕн къамисы бӕрӕггӕнӕнтӕм гӕсгӕ, фӕсарӕйнаг бӕстӕтӕй ӕрбацӕуӕг фӕсивӕд фылдӕр цымыдисдзинад ӕвдисынц фармацимӕ, стоматологимӕ, уырыссаг филологимӕ, стӕй сӕ зынгӕ хай та куырдиӕттӕ балӕвӕрдтой, дыгай педагогон дӕсныйӕдтыл кӕм ахуыр кӕнынц, уыцы хайӕдтӕм дӕр.

Фӕсарӕйнаг студентты нымӕц университеты фылдӕрӕй-фылдӕр кӕй кӕны, уымӕн ахъаз у, цы сӕрмагонд цӕттӕгӕнӕн хайад сын байгом кодтой, уый дӕр. А-уалдзӕг уыцы хайад ӕнтыстджынӕй каст чи фӕци, уыцы фӕсивӕдӕн сӕ фылдӕр хай сфӕнд кодтой сӕ ахуырад адарддӕр кӕнын ЦИПУ-йы. Уыимӕ, исӕн къамисы бӕрӕггӕнӕнтӕм гӕсгӕ, уыцы адӕмӕн сӕ иу хай та ахуырмӕ ацӕудзӕн ӕндӕр уӕрӕсейаг горӕттӕм.

Цӕрикъаты Оксанӕ

ОСТАВЬТЕ ОТВЕТ

Please enter your comment!
Please enter your name here