Багаты Аланы ӕнтыст

0
19

Эстонийы сӕйраг горӕт Таллины дарддӕр цӕуынц уӕгъдибар ӕмӕ грекъаг-ромаг хъӕбысхӕстӕй дунейы фыццаг бынат бацахсыныл ерыстӕ фӕсивӕды (21 азы онг) ‘хсӕн.

13 августы сбӕрӕг сты: 57, 65, 70, 79 ӕмӕ 97 килограммты онг уӕзты уӕлахиздзаутӕ ӕмӕ призон бынӕттӕ бацахсджытӕ. Уӕрӕсейаг богӕлттӕн бантыст 1 сыгъзӕрин, 1 ӕвзист ӕмӕ 2 бронзӕ майданы рамбулын.

Сыгъзӕрин майданӕй хорзӕхджын сси Ахмад Ташухаджиев (79 кг), ӕвзист майдан рамбылдта Курбан Шираев (65 кг), Куыдзойты Алан (70 кг) ӕмӕ Ахмед Идрисов (57 кг) та бацахстой ӕртыккаг бынӕттӕ, ӕмӕ сын лӕвӕрд ӕрцыд бронзӕ майдантӕ.

Сӕ уӕзты ма дунейы фыццаг бынӕттӕ бацахсджытӕ систы: 57 кг — Тошия Абе (Япон), 65 кг — Амирхоссейн Махсуди (Иран), 70 кг — Эрик Арушанян (Украинӕ), 97 кг — Аббас Форутанрами (Иран). Уӕрӕсейы командӕйӕ дыккаг бон ерысты цы фондз богалы архайдтой, уыдонӕй цыппар уыдысты ирон лӕппутӕ: Хӕдарцаты Алик (61 кг), Бетанты Давид (74 кг), Багаты Алан (92 кг) ӕмӕ Хуыбылты Ален.

Ирон богӕлттӕй кӕронбӕттӕнмӕ рацыд Багаты Алан. Хуыбылты Ален, Хӕдарцаты Алик ӕмӕ Бетанты Давид фӕйнӕ хӕрды кӕй фесты, уый аххосӕй ма сын фадат уыд ӕртыккаг бынӕттӕм рацӕуыныл ерыс кӕнынӕн.

Гауызыл ерыстӕ куыд рабӕрӕг кодтой, афтӕмӕй нӕ богӕлттӕй ӕппӕты ӕнтыстджындӕр рауад Багаты Аланы архайд. 92 кг онг уӕзы хӕцгӕйӕ, Алан фӕд-фӕдыл фӕуӕлахиз фондз ныхмӕлӕууӕгыл ӕмӕ бацахста фыццаг бынат. Йӕ ныхмӕлӕуджытӕ уыдысты: ирайнаг богал Реза Абдуллахи, (сӕ тох ахицӕн 9:2-Аланы пайдайӕн), туркаг богал Полат Полатчи (ууыл фӕуӕлахиз 8:0 хыгъдӕй), Азербайджаны минӕвар Асхаб Хамзатов (рамбылдта йӕ 3:1 хыгъдӕй), гермайнаг богал Ертугрул Агка (ууыл фӕуӕлахиз 3:0 хыгъдӕй).

Кӕронбӕттӕны Багайы-фырты ныхмӕлӕууӕг уыд америкаг богал Лукас Дэвисон, фӕлӕ уымӕн дӕр йӕ бон нӕ баци Аланы сӕрӕн архайды ныхмӕ фӕлӕууын ӕмӕ йын фӕхӕрд 3:4 хыгъдӕй.

Нӕ иннӕ богӕлттӕ ма уыцы бон рамбылдтой дыууӕ бронзӕ майданы. ӕртыккаг бынӕттӕ бацахстой Хӕдарцаты Алик (61 кг) ӕмӕ Хуыбылты Ален (125 кг). Иу чысыл нӕ фӕрӕстмӕ Бетанты Давиды архайд ӕртыккаг бынатыл ерыс кӕнгӕйӕ. Давид фӕхӕрд азербайджайнаг богал Хаджимурад Гаджиевӕн ӕмӕ бацахста 4-ӕм бынат. Афтӕмӕй Ирыстоны богӕлттӕ, Таллины, ӕмткӕй райсгӕйӕ, рамбылдтой иу сыгъзӕрин ӕмӕ ӕртӕ бронзӕ майданы. Уӕрӕсейы командӕйӕн та бантыст дыууӕ сыгъзӕрин, дыууӕ ӕвзист ӕмӕ цыппар бронзӕ майданы рамбулын.

Таллины дарддӕр цӕуынц дунейы фыццаг бынат бацахсыныл ерыстӕ чызджыты ‘хсӕн. Уыдоны фӕстӕ та, абон гауызмӕ рацӕудзысты сӕ хъару равдисынмӕ грекъаг-ромаг хъӕбысхӕсты богӕлттӕ. Уыдонимӕ ерысты архайдзӕн Цӕмӕхъуаты Нарты хъомылгӕнинаг Тыбылты Георги.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here