Хъомысджын архайды рахӕцӕн

0
17

15-16 августы Цӕгат Ирыстон суазӕг кодта, «Картофы быдырты ӕппӕтуӕрӕсеон бон»-мӕ чи ссыд, уыцы  адӕмы. Компаниты къорд «Бавари»-йы куыстуат «Фат-АГРО»-йы бындурыл арӕзт мадзалмӕ ӕрӕмбырд 250 адӕймаджы бӕрц Уӕрӕсейы алы рӕттӕй, Цӕгат Кавказы республикӕтӕй, Мӕскуыйӕ, Брянскы, Челябинскы облӕсттӕй ӕмӕ ӕндӕр регионтӕй.

Ӕмбырды архайджытӕ базонгӕ сты картофы мыггаджы куысты ног технологитимӕ, се ‘фснайынӕй, ӕвзарынӕй,  тыллӕг райсыны онг.

Демонстрацион быдыры хӕйтты федтой, ӕлхӕнджытӕ ӕппӕтӕй арӕхдӕр кӕй агурынц, стӕй фидӕны кӕй зайын кӕндзысты, ахӕм  бынӕттон ӕмӕ фӕсарӕйнаг  бирӕфадатджын  хуызтӕ, ӕдӕппӕтӕй — 130  мыггаджы.

«Картофы ӕппӕтуӕрӕсеон бон»-ы архайджытӕ фӕстӕдӕр ӕрӕмбырд сты, Джызӕлы бынмӕ  «Фат-Агро”-йӕн цы егъау арӕзтадон базӕ ис, уым. Кадджын уавӕры байгом кодтой, 6 мин тоннӕйы картоф кӕм бацӕудзӕн, ахӕм ӕфснайӕнтӕ уазалгӕнӕнтимӕ. Нырыккон домӕнтӕн дзуапп чи дӕтты, уыцы бӕстыхай фадат ратдзӕн фылдӕр картӕфтӕ бацӕттӕ кӕнынӕн ӕмӕ  базарадмӕ хӕрзхъӕд продукци ӕрвитынӕн.

Ӕмбырды архайджытӕ базонгӕ сты, бынӕттон хъӕууонхӕдзарадон  продукциуадзджытӕ сӕ къухты фӕллойӕ цы ӕрзайын кодтой, уыдонимӕ. Цыхт, кӕсаг, дыргътӕ, халсартӕ, сӕлдӕг, ирон чъиритӕ, адджинӕгтӕ, минералон ӕмӕ адджын дӕттӕ, къалбасы продукци уыд фенӕн ӕмӕ дзы саходӕн дӕр. Уалынмӕ фӕзмӕ иу иннӕйы фӕстӕ цӕуын райдыдтой техникӕйы ног хуызтӕ, сӕ арӕхстдзинад ӕмӕ  сӕ ӕнцонвадатӕй дисы  ӕфтыдтой.

Зайӕгойтӕ алы низтӕй ӕмӕ хилӕгойтӕй бахъахъхъӕнынӕн цы химион фӕрӕзтӕ ис, уыдонӕй дӕр бацӕттӕ кодтой цымыдисаг равдыст. Уазджытӕн ӕмӕ  ӕппӕт архайджытӕн арфӕйы ныхас загъта РЦИ-Аланийы Хицауады Сӕрдар Тускъаты Таймураз.

— Нӕ царды бӕркад зӕххӕй цӕуы. ӕнтыстджын къахдзӕфтӕ кӕнынц хъӕууон хӕдзарады  кусджытӕ, ӕмӕ уый ӕнӕрӕдыд фӕндаг у. Хицауады ӕмӕ наукӕйы ӕмархайдӕй хъуыддаг рӕзы. Алывӕрсыг ӕххуыс республикӕ ӕнкъары Уӕрӕсейы Хъӕууон хӕдзарады министрадӕй, уый тыххӕй уӕлдай бузныг министр Дмитрий Патрушевӕн. Абоны фембӕлд, ӕнӕмӕнг, ахъаз у хъӕууон хӕдзарады  райрӕзтӕн. ӕргом ныхас ног зонгӕтӕ, кӕрӕдзи фӕлтӕрддзинад — уымӕн ӕвдисӕн. Уӕ куыст ӕнтыстджын уӕд, — загъта Тускъайы-фырт.

Уӕрӕсейы Хъӕууон хӕдзарады министрады департаменты директор Роман Некрасов  Дмитрий Патрушевы номӕй бакаст арфӕйы фыстӕг. Уым фыст ис: «Ныфс нӕ ис, Ирыстон дарддӕр дӕр кӕй уыдзӕн Цӕгат Кавказы хъӕууон хӕдзарады  раздзӕуджытимӕ».

Ацы аз компаниты къорд «Бавари»— йыл ӕххӕст кӕны 25 азы. Сӕ быдырты уӕлдай  каст цӕуы картӕфтӕм. Чысыл сабитау сӕм зилынц сӕрмагонд наукон лабораторийы. 2019 азы ӕрзайын кодтой 1,5 милуан быны хӕрзмыггаг картоф. Уый тыххӕй загъта компанийы генералон директор Битарты Зелимхан.

Ӕмбырды  куысты архайдтой нӕ республикӕйы хъӕууон хӕдзарады ӕмӕ хойраджы министр Уазиты Хъазыбег, министрады специалисттӕ, А. Лорхы номыл картофыкуысткӕнынады наукон-иртасӕн институты директор Сергей Жевора, «Россельхозцентр»-ы директор Александр Малько ӕмӕ иннӕтӕ.

Абон та уазджытӕ бабӕрӕг кӕндзысты, Уӕлладжыры комы, Уӕллаг Зджыды цы фӕлварӕн хӕрзмыггаг картофы зӕххытӕ ис, уыдон.

Гугкаты Жаннӕ

Къамтӕ систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here