Ирон аивадӕн лӕггадгӕнӕг

0
66

Адӕмон сфӕлдыстады республикон хӕдзары хайады сӕргълӕууӕг, РЦИ-Аланийы культурӕйы сгуыхт кусӕг Битарты Ларисӕ аивадӕн лӕггад кӕныны фӕндагыл ӕрлӕууыд йӕ сабибонтӕй фӕстӕмӕ, фӕндыр ӕмӕ зарӕг кӕй бауарзта, уый руаджы.

Ларисӕ райгуырд Елхоты. Астӕуккаг скъолайы  канд хорз нӕ ахуыр кодта, фӕлӕ ма архайдта ӕхсӕнадон царды дӕр. Хъӕуы цы музыкалон скъола уыд, уым та  ахуыр кодта фортепианойӕ цӕгъдыныл. Уыд астӕуккаг скъолайы фӕскомцӕдисы комитеты раздзӕуджытӕй иу.

Скъола каст куы фӕци, уӕд бацыд Дзӕуджыхъӕуы аивӕдты училищӕмӕ. Адӕмон инструментты ӕмӕ дирижеры хайады фӕахуыр кодта цыппар азы. Ам дӕр, йӕ хорз ахуырӕй, йе ‘гъдауӕй йӕхи бауарзын кодта йӕ зондамонджытӕн ӕмӕ ӕмбӕлттӕн. Куыд фӕндырдзӕгъдӕг, афтӕ фыццаг къахдзӕфтӕ акодта йӕ райгуырӕн хъӕуы Культурӕйы галуаны ансамблы. Йӕ аивадон разамонӕг уыд зындгонд  хореограф Барахъты Юри.

— Уыцы рӕстӕг ма куыстон Кировы районы культурӕйы хайады. Дзуапп лӕвӕрдтон культурӕйы управленийы цӕугӕ клубтӕн. Ансамбл гастролты нӕ бӕстӕйы бирӕ горӕтты уыд. Уӕлдай ӕнгомдӕр бастдзинӕдтӕ та дардта Кӕсӕг-Балхъары республикӕйы хъӕу Терчы фольклорон-этнографион ансамбл «Терчанка»-имӕ. Советон дуджы Елхоты ӕмӕ кӕсгон хъӕуы ӕхсӕн фыст уыд ӕфсымӕрдзинады бадзырд. Хъӕуы адӕмон кафты ансамблы та  кафыдысты, ныртӕккӕ аивады ӕнтыстджын къахдзӕфтӕ чи кӕны, уыдон: академион ансамбл «Алан»-ы аивадон разамонӕг Тедеты Руслан, УФ-йы сгуыхт артист, РЦИ-Аланийы культурӕйы министр Къубалты Эльбрус. Ныртӕккӕ дӕр мӕ нӕ рох кӕны уыцы рӕстӕг, — зӕгъы Ларисӕ.

Училищӕйы цы зонындзинӕдтӕ райста, уыдон ӕм фаг нӕ фӕкастысты, ӕмӕ  ма каст фӕци Краснодары культурӕйы институты режиссерон хайад дӕр. Ирыстонмӕ куы ссыд, уӕд кусын райдыдта Адӕмон сфӕлдыстады центры. Нӕ республикӕйы хихъӕппӕрисадон къордтимӕ куыд кусгӕ у, практикон ӕмӕ методикон ӕгъдауӕй сын цавӕр ӕххуыс кӕнын ӕмбӕлы, уыцы  сусӕгдзинӕдтӕ Ларисӕйӕн амыдтой ацы аивадон артдзӕсты  сӕргълӕууӕг, зындгонд драматург Хъайттаты Сергей, РЦИ-Аланийы ӕмӕ УФ-йы культурӕйы сгуыхт кусджытӕ Алӕгаты Гӕхӕрман ӕмӕ Гӕбуты Зоя. Цӕстуарзонӕй ма йын йӕ куысты фӕлтӕрддзинадӕй рӕдау хай кодта зындгонд хореограф, УФ-йы аивӕдты сгуыхт кусӕг Уарзиаты Хадзысмел.

Ларисӕйӕн Адӕмон сфӕлдыстады хӕдзары йӕ  хӕстӕ бирӕ уыдысты. Куыста дзы  методистӕй. Куыд нӕ республикӕйы, афтӕ нӕ бӕстӕйы дӕр хихъӕппӕрисадон аивадон къордты цард цӕджджинагау фыхти. Се ‘хсӕн арӕзт  цыд алыхуызон конкурстӕ ӕмӕ фестивалтӕ.  Агитацион-культурон бригӕдты ӕппӕтцӕдисон ӕркастмӕ Ларисӕ ӕмӕ зындгонд режиссер Гӕздӕнты Таймураз бацӕттӕ кодтой Алагиры  агитацион бригад. Сӕрмагондӕй семӕ  аластой, аивады алыхуызон жанртӕй арӕзт цымыдисаг программӕ. ӕмӕ нӕ бӕстӕйы сфӕлдыстадон къордты ӕхсӕн алагираг хӕдахуыр артисттӕ систы уӕлахиздзаутӕ. Райстой   хӕрзиуджытӕ ӕмӕ  зынаргъ лӕвӕрттӕ.

Кӕд  дуг аивта, ӕмӕ адӕмы цард фендӕрхуызон, уӕддӕр Дзӕуджыхъӕуы ӕмӕ нӕ республикӕйы районты культурӕйы хӕдзӕртты судзы аивады арт. Ис дзы адӕмон кӕфтыты, зарӕггӕнджыты, инструменталон ӕмӕ драмон къордтӕ. Уыдонӕн раздӕрау практикон ӕмӕ методикон ӕххуыс кӕны Адӕмон сфӕлдыстады хӕдзары коллектив. ӕмӕ  йе ‘мкусджытимӕ йӕ хӕс зӕрдӕрайгӕйӕ ӕххӕст кӕны  хайады сӕргълӕууӕг  Битарты Ларисӕ дӕр. Йӕ хъӕппӕрисӕй нӕ республикӕйы ӕмӕ ма суанг фӕсарӕнты дӕр бирӕ аивадон изӕртӕ, концерттӕ, фестивалтӕ арӕзт ӕрцӕуы.

«Ирон фӕндыр»-ы фӕархайынц  нӕ республикӕйы, Хуссар Ирыстоны ӕмӕ  Цӕгат Кавказы адӕмон музыкалон инструменттӕй цӕгъдджытӕ. Ныр къорд азы РЦИ-Аланийы Культурӕйы министрады, Адӕмон сфӕлдыстады хӕдзары ӕмӕ бӕгӕныфыцӕн хӕдзар «Бавари»-йы хъӕппӕрисӕй арӕзт цӕуы фестивал «Ирон бӕгӕны». Нӕ фыдӕлты рагон нозт фыцынӕй дзы фыццаг сӕ арӕхстдзинад  ӕвдыстой Ирыстоны  ‘фсинтӕ, ныр та — Уӕрӕсейы горӕтты ӕмӕ дунейы бӕстӕты цӕрӕг ирон адӕм. Амӕй размӕ фестивал арӕзт ӕрцыд Турчы, ӕрӕджы та — Францы.

Нӕ республикӕйы  цалдӕр азы фӕд-фӕдыл  арӕзт цыд фестивал «Ирон зарӕг». Цӕмӕй дзы ӕцӕг аивадон бӕрӕгбон рауайа, ууыл зӕрдиагӕй бацархайдта, ӕмӕ абон дӕр архайы Ларисӕ. Культурӕйы министрад ӕмӕ Адӕмон сфӕлдыстады хӕдзар ын йӕ бӕрны цы хӕстӕ бакӕнынц, уыдон ӕххӕст кӕны  фӕзминагӕй. Зоны алы аивадон къорды, адӕмон театры архайӕджы зӕрдӕмӕ дӕр фӕндаг ссарын. Хихъӕппӕрисадон аивады архайынц  хистӕр ӕмӕ кӕстӕр кары минӕвӕрттӕ. Уыдонӕй  алчидӕр Ларисӕмӕ дары хионы зӕрдӕ. Йемӕ фембӕлын  сын кӕддӕриддӕр вӕййы ӕхсызгон. Уый йӕ сӕрмӕ никуы ӕрхаста концерт кӕнӕ фестивал талф-тулфӕй бацӕттӕ кӕнын. Йӕ размӕ цы хӕстӕ вӕййы, цалынмӕ  уыдон йӕхицӕн не сбӕрӕг кӕна, йӕ хайады кусджытӕн сӕ бӕстон нӕ бамбарын кӕна, уӕдмӕ бӕрӕгбонмӕ цӕттӕ кӕнын дӕр нӕ райдайы. Фестивалы  кӕнӕ ӕркаст аразыны бон куы ‘рхӕццӕ уа, уӕд дӕр ӕмӕ уый размӕ дӕр ӕй залы ӕнцад бадгӕ нӕ фендзынӕ. Йӕ фезмӕлдӕй ӕмӕ фӕлмӕн ныхасӕй бӕрӕгбоны архайджыты ӕмӕ йе ‘мкусджыты зӕрдӕты  ныфс бауадзы. Йӕ цӕсгомыл ӕдзухдӕр фӕхъазы фӕлмӕн мидбылхудт, сагъӕсты фӕд ыл никуы фендзынӕ.

— Мӕ куыст бирӕ уарзын. Фӕлӕ иунӕгӕй мӕ бон ницы бауаид. Уымӕ гӕсгӕ мӕ бузныг зӕгъын фӕнды, фыццаджыдӕр, Адӕмон сфӕлдыстады хӕдзары директор, РЦИ-Аланийы адӕмон артист Цӕриаты Валерийӕн. Уыимӕ сфӕлдыстадон куыст кӕнын у бӕрӕгбон, удӕнцой. Йе ‘ххуыс мӕ куы бахъӕуы, уӕд мын мӕ тыхст ӕхсызгонӕй ацаразы. Аивад ӕмбары тынг хорз. Уӕдӕ йӕ ирондзинады, ӕфсармы, уӕздандзинады миниуджытӕн та ӕмбал нӕй. Зӕрдӕбын арфӕйы ныхӕстӕ мӕ бон зӕгъын у  ме ‘мкуысджытӕй алкӕй тыххӕй дӕр. Нӕ Ирыстоны адӕмӕн та мӕ цӕст уарзы сабыр цъӕх арвы бын цардмӕ дзагцӕстӕй куыд кӕсой. Афтӕмӕй сын аивады фӕрцы нӕ бон лӕггад кӕнын куыд уа, — зӕгъы Битарты Ларисӕ.

Гасанты Валери

ОСТАВЬТЕ ОТВЕТ

Please enter your comment!
Please enter your name here