Сывӕллӕтты уарзон бынат

0
17

Фӕстаг азты нӕ горӕты администрацийы разамонджытӕ уӕлдай фылдӕр ӕргом аздӕхтой цӕрджыты фӕлладуагъдмӕ. Дыккаг аз Хетӕгкаты Къостайы номыл культурӕ ӕмӕ фӕлладуадзӕн парк бындурон цалцӕг кӕй цӕуы, уымӕй уӕлдай горӕты иннӕ парктӕ дӕр рохуаты не сты.

«Мах ӕппӕтдӕр аразӕм, цӕмӕй нӕм цы бирӕ адӕм вӕййы, уыдоны зӕрдӕмӕ цӕуа нӕ алывӕрсыг архайд, — загъта Дзӕуджыхъӕуы ӕвдӕлон рӕстӕг ӕрвитыны ӕмӕ культурӕйы муниципалон центр «Радуга»-йы филиал «Олимпаг парчы» директор Къодоты Марат. — Уый арӕзт ӕрцыд 2014 азы, ӕмӕ йӕ ном афтӕ схуыдтам Сочиаг олимпиадӕйы кадӕн. Парк горӕты сывӕллӕтты ирхӕфсыны тыххӕй арӕзт кӕй ӕрцыд, уымӕ гӕсгӕ нӕ нысан у, цӕмӕй уыдонӕн сӕ алы ӕрбацыд дӕр уа бӕрӕгбоны хуызӕн».

Ӕцӕгдӕр, паркмӕ куы бахызтыстӕм, уӕд нӕм афтӕ фӕкаст, цыма аргъӕутты дунейы стӕм. Йӕ дӕргъ ӕмӕ уӕрх дӕр 23 метртӕ кӕмӕн сты, ахӕм донуаты сывӕллӕттӕ цъыллинджытӕ кодтой хъазӕн кӕсӕгтимӕ, иуварсӕй та сӕм урс арс барджынӕй каст.

Дарддӕр парчы директор куыд радзырдта, афтӕмӕй сывӕллон цӕмӕй донуаты йӕхи аирхӕфса, уый тыххӕй фидын хъӕуы 200 сомы сахатмӕ, кусгӕ та кӕны райсомы 10 сахатӕй изӕры 8 сахатмӕ, ӕмӕ бирӕ мадӕлты фӕфӕнды, сӕ сывӕллӕттӕ доны сӕхи куыд дарынц, уымӕ бакӕсын.

— Уымӕй уӕлдай нӕм сывӕллӕттӕн ис ӕндӕр хиирхӕфсӕнтӕ дӕр: херытӕ, къуыбыртӕ, спанч боб. Конкурстӕ саразӕм, сывӕллӕттӕй хуыздӕр чи кафы, уый сбӕрӕг кӕныны тыххӕй. Фылдӕр та нӕм 34,35 микрорайонты цӕрджытӕ фӕцӕуынц сӕ сывӕллӕттимӕ, ӕмӕ сын мах дӕр се ‘рбацыд бахъӕлдзӕг кӕнӕм, — дзырдта Къодоты Марат.

Уавӕр афтӕ у, ӕмӕ парк арӕзт куы ‘рцыд, уӕдӕй фӕстӕмӕ ссис нӕ горӕты сывӕллӕтты хуыздӕр ирхӕфсӕн бынат. Ардӕм канд ӕввахсдӕр чысыл районтӕй нӕ цӕуынц, фӕлӕ ма ӕндӕр рӕттӕй дӕр.

«ӕз цӕрын, «БАМ» кӕй хонынц, уыцы районы, загъта ӕрыгон мад Калоты Еленӕ. — Алы бон дӕр ацы парчы вӕййӕм мӕ сывӕллӕттӕ Мэлс ӕмӕ Софяимӕ ӕмӕ ардӕм цӕуынӕй никуы бафӕллайдзынӕн. Уымӕн ӕмӕ ам сывӕллӕттӕн, ӕндӕр рӕттимӕ абаргӕйӕ, ис дзӕвгар хуыздӕр фадӕттӕ».

Кӕстӕртӕ нӕ абон ӕмӕ нӕ фидӕн кӕй сты, ууыл хъуыдыгӕнгӕйӕ, парчы разамынд архайы сывӕллӕттӕн фылдӕр хиирхӕфсӕнтӕ саразыныл. ӕдзухдӕр сӕ куысты бынӕтты сӕхи хъӕппӕрисджынӕй ӕвдисынц бӕрӕггӕнӕг Цомартаты Алан, ирвӕзынгӕнджытӕ Цъӕхилты Дауит, Бӕцӕзаты Ацӕмӕз ӕмӕ Сарахъаты Игорь.

Ай-гъай, ардӕм хистӕр адӕм дӕр ӕнӕцӕугӕ не сты райсомы ӕмӕ изӕры сахӕтты. Уыдонӕн ам ис ӕрбадӕн аууон бынӕттӕ, парчы нӕзы, бӕрз, ӕндӕр бӕлӕсты ӕмӕ алыхуызон дидинджыты хӕрздӕф та сын фӕхӕссы ӕнӕниздзинад.

Тохсырты Къоста

Къамтӕ систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here