Кӕсӕнцӕстытӕй ма тӕрсут

0
16

— Цыфӕнды куыстыл хӕст уӕвгӕйӕ дӕр адӕймаг хъуамӕ ма хала йӕ бастдзинад  райгуырӕн зӕххимӕ ,— зӕгъы «Рӕстдзинад»-ы редакцийы уазӕг Хъамболты Альберт. Кӕд нырма ӕрыгон у, уӕддӕр ын бирӕ бантыст йӕ равзӕрст дӕсныйады. Дохтыр суӕвын, урс халат дарын, адӕмӕн ӕххуыс кӕнын йӕ сабибонты бӕллиц уыдис. Сӕ лӕппуйы фӕндоныл сразы сты ныййарджытӕ дӕр.

Ахуырмӕ зӕрдӕргъӕвд уыд Альберт, ӕнтыстджынӕй каст фӕцис Дзӕуджыхъӕуы 41-ӕм скъола. Тыхджын педагогон коллективӕн разамынд лӕвӕрдта директор Олег Астадуров. Йӕ уарзон предметтӕ уыдысты биологи, стӕй ирон ӕвзаг ӕмӕ литературӕ. ӕрмӕстдӕр «фондзтӕ» иста йӕ дзуаппытӕн. Уӕлдай ӕхсызгондӕрӕй ахуыр кодта Къостайы ӕмдзӕвгӕтӕ. Хорз ӕй хъуыды кӕны, сценӕйы Къостайы «Ныстуан» куы каст, уӕд йӕ зӕрдӕйы цы уӕлмонц ӕнкъарӕнтӕ равзӕрд, уый. Альберт сси конкурсы уӕлахиздзау. Бирӕ хорз ахуыргӕнджытӕ йын уыдис медицинон академийы ахуыр кӕнгӕйӕ дӕр. Разӕнгардӕй цыд ахуырмӕ, ӕмӕ 4-ӕм курсмӕ куы бахызт, уӕд ын фӕци Саратовы ӕфсӕддон-медицинон институтмӕ раивыны фадат. Уымӕй размӕ каст фӕци ӕфсӕддон кафедрӕ дӕр. Йӕ ныййарджытӕ Алексей ӕмӕ Валентинӕ, бӕргӕ, батыхстысты, афтӕ дард куыд ауадзой сӕ хъӕбулы, зӕгъгӕ. Фӕлӕ Альберты фӕндон фидардӕр разынд. Ахуыр кӕнын зын нӕ уыд, фӕлӕ ӕфсӕддон фидар ӕгъдау домдтой, радтой йын лейтенанты цин.

— Кусурты Марат — Змейкӕйӕ, Тедеты Азӕмӕт — ныр Цхинвалы хирургӕй кусы. Хӕларӕй цардыстӕм, дарддӕр нӕ службӕ ахӕццӕ кодтам ординатурӕйы. Офтальмологийӕ  лекцитӕ мӕм тынг цымыдисаг фӕкастысты  ӕмӕ сфӕнд кодтон цӕсты низтӕ дзӕбӕхгӕнӕг дохтыр суӕвын. Практикӕйы уыдтӕн горӕт Энгельсы, хорз мӕ суазӕг кодтой рынчындоны, дохтырӕй, хуымӕтӕг кусӕгӕй. Сӕ зӕрдӕтӕ сын-иу мӕхи конд ирон чъиритӕй алхӕдтон, — зӕгъы Альберт. — Спорты алы хуызтӕй архайдтам, дыууӕ хатты сдӕн Саратовы облӕсты чемпион армхӕстӕй.

Сӕрыстыр куыд нӕ уыдаиккой йӕ ныййарджытӕ, медицинон службӕйы афицеры стъалытӕ сӕ фырты пъагӕттыл куы сӕрттывтой, уӕд.

Фесты ахуыры азтӕ, институты хицау, инӕлар-майор ын радта уӕлдӕр медицинон ахуырады тыххӕй диплом ӕмӕ фехъусын кодта, нысангонд кӕй ӕрцыд Мӕскуыйы суворовон ӕфсӕддон училищӕйы медицинон пункты хицауӕй. Бӕрнон хӕстӕ ӕвӕрд уыд Альбертыл, алывӕрсыг цӕстдард хъуыд ӕппӕт санитарон уавӕрмӕ, хӕрӕндоны куыстмӕ. Суворовонтӕ-иу архайдтой Сырх фӕзы Уӕлахизы парады ӕмӕ сын-иу дохтыр  каст се ‘нӕниздзинадмӕ.

— Хорз куыст уыд,  фӕлӕ мӕн фӕндыд дарддӕр ахуыр кӕнын, рӕзын мӕ равзӕрст дӕсныйады. Бацыдтӕн мӕ куырдиатимӕ училищӕйы хицаумӕ. «Ацӕудзынӕ, фӕлӕ уал ныртӕккӕ ам хъӕуыс», — уыд йӕ  дзуапп. Йӕ бӕллиц сӕххӕст фӕстӕдӕр, горӕт Ковровы танкон ӕфсӕдты специалисттӕ цӕттӕгӕнӕн центры дохтырӕй кусгӕйӕ. Уырдыгӕй йӕ фӕндаг акодта Кировы номыл ӕфсӕддон-медицинон академимӕ. Офтальмологийы кафедрӕйы ӕртӕ азмӕ базыдта ацы къабазы ног методикӕтӕ, зонындзинӕдтӕ райсынӕн дзы ис ӕппӕт гӕнӕнтӕ дӕр.

Ахуыргӕнгӕйӕ Альберт сӕмбӕлд йӕ фидӕны цардӕмбал Туаты Аланӕйыл, уый дӕр медицинон кусӕг у.

Дӕсны специалист алкӕм дӕр хъӕуы. Альберты бацагуырдтой Дард Хурыскӕсӕны. Ницы дзы уыд бахӕлӕггӕнинагӕй, фӕлӕ ӕфсӕддон лӕгӕн йӕ фӕндтӕ йӕхи бар нӕ вӕййынц. Уссурийскы районы хъӕу Камень — Рыболовы  госпиталы куыста хирургийы хайады цӕстыты дохтырӕй ӕфсӕддонтӕн стӕй бынӕттон цӕрджытӕн йе ‘ххуыс никуы бавгъау кодта.

2015 азы Альберт раивта граждайнаг службӕмӕ. Куыста Дзӕуджыхъӕуы цӕстыты низты республикон-клиникон рынчындоны. Уый фӕстӕ ӕнтыстджын операцитӕ кодта  Ленинграды облӕсты горӕт Пикалевойы клиникон рынчындоны кусгӕйӕ дӕр. Уыцы рӕстӕг не ‘мзӕххон Тыбылаты Андрей бацагуырдта Альберты, (академийы иумӕ ахуыр кодтой), ӕмӕ йын загъта, офтальмологийы хайады сӕргълӕууӕг ӕхсызгон кӕй хъӕуы, Ленинграды облӕсты ӕртӕ районӕн чи лӕггад кӕны, уыцы рынчындоны, горӕт Кингисеппы.  Альберт иттӕг хорз кӕй сарӕхсдзӕн, ууыл дызӕрдыг нӕ кодта.

Ныр дыууӕ азы Хъамболы-фырт кусы ацы чысыл, фӕлӕ райдзаст горӕты. Йӕ арӕхстдзинадӕй адӕмы йӕхиуыл баууӕндын кодта. Разамынд цы хайадӕн дӕтты, уым ис 38 бынаты. Уӕдӕй абонмӕ скодта 765 операцийы бӕрц. Ирон хирурджы кой дӕрдтыл айхъуыст ӕмӕ йӕм ӕндӕр рӕттӕй дӕр цӕуынц. Боны рухс кӕмӕн фенын кӕны, уыцы адӕмӕй бирӕ арфӕйы ныхӕстӕ фехъусы.

— Рынчынӕн удӕнцой скӕнгӕйӕ, йӕхионты цины цӕссыгтӕ фенгӕйӕ, дохтыр айрох кӕны йӕ фӕллад. Мӕ рынчынтӕн фӕзӕгъын, цӕстыты ӕнӕниздзинад аразгӕ кӕй у буары иумӕйаг ӕнӕниздзинадӕй ӕмӕ царды уагӕй, Дохтырмӕ афойнадыл бацӕугӕйӕ, мингай адӕймӕгтӕ сӕхи фервӕзын кӕнынц куырмдзинадӕй, не свӕййынц инвалидтӕ. Кӕсӕнцӕстытӕ дын иугӕр рафыстой, уӕд сӕ дар, ӕнӕниз царды уаг ӕрвит, уыцы стыр хорздзинадӕй царды ирд ахорӕнтӕй дӕхи ӕнӕхай ма кӕн, — зӕгъы Альберт.

Ныртӕккӕ медицинӕ егъау санчъехтӕ акодта размӕ, фӕзынд ног технологитӕ ӕмӕ ифтонггӕрзтӕ. Кӕй зӕгъын ӕй хъӕуы, арфӕйы аккаг у Хъамболты Альберт, уымӕн ӕмӕ йӕ равзӕрст дӕсныйады бӕрзӕндтӕм схызт, фыдӕлты фарн дӕлӕмӕ нӕ уадзы. Йӕ хӕзнаты хӕзна сты йӕ бинонтӕ, йӕ дыууӕ хъӕбулы, йӕ хӕстӕджытӕ. Зӕрдӕрухсӕй цӕуы йӕ куыстмӕ, изӕрыгон та хӕдзармӕ тагъд кӕны. Уый амонд у. Ацы ныхӕсты мидис зонды хос кӕмӕн фӕуой, уый фӕсмонгонд никуы уыдзӕн.

Гугкаты Жаннӕ

ОСТАВЬТЕ ОТВЕТ

Please enter your comment!
Please enter your name here