Ног рӕвдауӕндӕттӕ ӕмӕ спортивон фӕзтӕ, медицинӕ ӕмӕ культурӕйы ахсджиаг объектты рацарӕзт

0
18

Ацы азы кӕронмӕ республикӕйы фӕзындзысты ног спортивон фӕзтӕ, сывӕллӕтты рӕвдауӕндӕтты фӕзындзӕн уӕлӕмхасӕн бынӕттӕ, рацарӕзты куыстытӕ цӕудзысты медицинӕ ӕмӕ культурӕйы иннӕ ахсджиаг объекттыл дӕр.

Ӕппӕт уыцы фарстытыл Цӕгат Ирыстоны Хицауады Сӕрдар Тускъаты Таймураз республикӕйы районтӕм йӕ радон инспекцион балцы рӕстӕг ӕрныхас кодта муниципалитеттӕ ӕмӕ подрядон организациты разамонджытимӕ. Сӕйраг ӕргом, кӕй зӕгъын ӕй хъӕуы, здӕхт ӕрцыд, фыццаградон национ проектты фӕлгӕты цы ахсджиаг социалон объекттӕ арӕзт цӕуы, уыдонмӕ.

Зындгонд куыд у, афтӕмӕй уыцы программӕты фӕлгӕты архайд цӕуы ӕппӕт районты дӕр, ацы балцы рӕстӕг та уал Тускъаты Таймураз министрадтӕ ӕмӕ ведомствӕты бӕрнон кусджытимӕ бабӕрӕг кодта Алагиры, ӕрыдоны, ӕрӕфы, Дыгур ӕмӕ Горӕтгӕрон районтӕ.

Горӕтгӕрон районы премьер-министр фыццаджы-фыццагдӕр  сбӕрӕг кодта, Тарскӕйы спортивон фӕзы арӕзтад ӕмӕ Октябрыхъӕуы фӕлладуадзӕн парчы рацарӕзт куыд цӕуы, уый. Районы бынӕттон хиуынаффӕйады администрацийы хицау Есиаты Руслан куыд радзырдта, афтӕмӕй ацы аз ӕххӕстгонд ӕрцӕудзӕн парчы рацарӕзты фыццаг къӕпхӕн — аразджытӕ раивдзысты зӕххы бынты цӕуӕг коммуникацитӕ, телыхъӕдтӕ, цырӕгътӕ, саив кӕндзысты къахвӕндӕгтӕ, сӕвӕрдзысты дзы ног бандӕттӕ…

Паркмӕ ‘ввахс та арӕзт цӕуы 10-ӕм рӕвдауӕндоны уӕлӕмхасӕн бӕстыхай. Уыцы куыст куыд цӕуы, уый дӕр федта Тускъайы-фырт. Ахӕм уӕлӕмхасӕн бӕстыхай ныртӕккӕ арӕзт цӕуы Ногиры 12-ӕм рӕвдауӕндоны дӕр. Куыд загъдӕуыд, афтӕмӕй дыууӕ бӕстыхайы фӕрцы рӕвдауӕндӕтты хъомылгӕнинӕгтыл бафтдзӕн фӕйнӕ 20 сабийы. Уый фӕрцы дыууӕ хъӕуы дӕр лыггонд ӕрцӕудзӕн, рӕвдауӕндӕтты бынӕттӕм рады чи лӕууы, уыцы бинонты фарста.

Ӕрыдоны районы сӕйрагдӕр социалон объекттӕй иу у Центрон рынчындон. Уым ныртӕккӕ кӕронмӕ фӕхӕццӕ кӕны бындурон рацарӕзты фыццаг къӕпхӕн. Аразджытӕ ныридӕгӕн нысангонд куыстытӕн сӕххӕст кодтой сӕ 90 проценты бӕрц. Рынчындоны сӕйраг дохтыр Дыдарты Владимир разы у куыстыты хӕрзхъӕддзинадӕй.

Нартыхъӕуы Хицауады Сӕрдарӕн фенын кодтой, бынӕттон Культурӕйы хӕдзары цалцӕггӕнӕн куыстытӕ куыд цӕуынц, уый. Мичурины хъӕуы та ӕркастӕуыд ног рӕвдауӕндоны арӕзтады уавӕрмӕ. Зындгонд куыд у, афтӕмӕй рӕвдауӕндон арӕзт цӕуы сӕрмагонд федералон программӕйы фӕлгӕты, уыдзӕн дзы 120 бынаты.

Алагиры арӕзт цӕуы 7-ӕм рӕвдауӕндоны уӕлӕмхасӕн бӕстыхай. Ахӕм ног агъуыст тагъд рӕстӕг фӕзындзӕн Суададжы дӕр. Уымӕй уӕлдай, ацы хъӕуы бындурон цалцӕггонд цӕуы спортивон зал дӕр. Дыгуры районы ахӕм объектӕй уӕлдай арӕзт цӕуы физкультурон-дзӕбӕхгӕнӕн комплекс дӕр.

Ахсджиаг куыстытӕ кӕнынц ӕрӕфы районы дӕр.

Йӕ балцӕн хатдзӕгтӕ кӕнгӕйӕ, Тускъаты Таймураз куыд фӕнысан кодта, афтӕмӕй ӕппӕт уӕлдӕрамынд объекттыл куыстытӕ хъуамӕ ахицӕн уой 2019 азы декабрмӕ. Уыимӕ, премьер-министры ныхасмӕ гӕсгӕ, азы кӕронмӕ ӕнхъӕлмӕ кӕсын нӕ хъӕуы, фадӕттӕ кӕм амонынц, уым куыстытӕ хъуамӕ ӕххӕстгонд ӕрцӕуой ноябрмӕ.

«Национ проектты фӕлгӕты цы мадзӕлттӕ арӕзт цӕуы, уыдоны сӕйраг нысан у не ‘мбӕстӕгты цард хуыздӕр кӕнын. Уыцы ӕууӕл хынцгӕйӕ, хицаудзинады ӕххӕстгӕнӕг оргӕнтӕ ӕмӕ муниципалитеттӕ сӕ ных хъуамӕ саразой бӕлвырд нысанмӕ — проектты фӕлгӕты ӕппӕт нысангонд куыстытӕ дӕр хъуамӕ ӕххӕстгонд ӕрцӕуой пъланмӕ гӕсгӕ, уыимӕ, аразджыты архайдмӕ хъуамӕ фаутӕ ӕрхӕссӕн ма уа», — фӕнысан кодта Хицауады Сӕрдар.

РЦИ-Аланийы Сӕргълӕууӕджы

ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here