Танделаты Аминӕ фӕуӕлахиз ӕппӕтуӕрӕсеон спартакиадӕйы

0
14

Мӕскуыйы облӕсты горӕт Раменскы уӕгъдибар хъӕбысхӕстӕй цыдысты Уӕрӕсейы скъоладзауты спартакиадӕйы ерыстӕ.

Цӕгат Кавказы федералон зылды командӕйы  хӕцгӕйӕ, Уӕрӕсейы скъоладзауты 9-ӕм спартакиадӕйы уӕлахиздзау ссис Уӕрӕсейы сгуыхт тренер Тедеты Валик ӕмӕ Хетӕгкаты Еленӕйы хъомылгӕнинаг Танделаты Аминӕ. 57 кг онг уӕзы хӕцгӕйӕ,  равдыста уӕлахизмӕ тырнындзинад. Йӕ фыццаг ныхмӕлӕуджытыл фӕуӕлахиз ӕнӕкъуылымпыйӕ ӕмӕ кӕронбӕттӕны фембӕлд ӕрыгӕтты ‘хсӕн Уӕрӕсейы фыццаг бынат бацахсӕг бетъырбухаг богал Елизаветӕ Петляковаимӕ. Аминӕ  йӕ ныхмӕлӕууӕгӕй уыди зынгӕ сӕрӕндӕр. Иу ныббырст иннӕйы фӕстӕ аразгӕйӕ,  хыгъд 10:0-мӕ куы схӕццӕ кодта, уӕд тӕрхонгӕнӕг тох баурӕдта ӕмӕ уӕлахиз радта Аминӕйӕн.

Фыццаг бынатмӕ хӕстӕг уыд лӕппуты ерысы Гобозты Арсалан дӕр. 65 кг онг уӕзы хӕцгӕйӕ, Саулохты Чермены хъомылгӕнинаг фӕуӕлахиз йӕ цыппар ныхмӕлӕууӕгыл ӕмӕ кӕронбӕттӕны фембӕлд бетъырбухаг  Ахмед Жилетежевимӕ. Ацы богалимӕ ма Чермен раздӕры ерысты хӕцыд цалдӕр хатты ӕмӕ-иу сӕ тох ахицӕн Жилетежевы пайдайӕн. Ацы хатт дӕр та фӕуӕлахиз бетъырбухаг богал 5:4 хыгъдӕй. Афтӕмӕй Гобозты Арсалан бацахста  дыккаг бынат.

Дыккаг ӕмӕ ӕртыккаг бынӕттӕ ма бацахстой Мӕскуыйы командӕйы  хӕцӕг дыууӕ ирон чызджы.

40 кг онг уӕзы Гуццаты Аизӕ бацахста дыккаг бынат ӕмӕ хорзӕхджын сси спартакиадӕйы ӕвзист майданӕй. ӕртыккаг бынат ӕмӕ бронзӕ майдан та рамбылдта Бузарты Мария 57 кг онг уӕзы хӕцгӕйӕ.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here