Зӕрӕмӕджы ГЭС — бӕстӕйы егъаудӕр комплекстӕй иу

0
18

Цӕгат Ирыстоны Зӕрӕмӕджы ГЭС саразыны хъуыды фӕзынд  1976 азы. Йӕ саразынмӕ дӕр ын уӕд бавнӕлдтой, фӕлӕ Советон паддзахад куы фехӕлд, уӕд бирӕ къуылымпыдзинӕдтӕ баййӕфта. Нал уыдис финансон фӕрӕзтӕ куыстытӕ дарддӕр ахӕццӕ кӕнынӕн.

Зӕрӕмӕджы ГЭС Цӕгат Ирыстоны зӕххыл у ӕппӕты егъаудӕр инвестицион проект. Цӕгат Кавказы та нымад у тӕккӕ стырдӕр арӕзтадон комплексыл. Техникон бӕрӕггӕнӕнтӕм гӕсгӕ йын Уӕрӕсейы дӕр ӕмбал нӕй. Зӕххы бын йӕ дӕргъ у 20 километрӕй фылдӕр. Уымӕй уӕлдай ма у Уӕрӕсейы ӕппӕты бӕрзонддӕр дон ӕфсӕрӕн бынат (619),  ӕппӕты стырдӕр турбинӕтимӕ.

Ӕхсызгон у уый, ӕмӕ ГЭС-ы арӕзтады разӕнгардӕй архайынц  Цӕгат Кавказы хӕххон-металлургон институты 1-аг ӕмӕ 2-аг курсы студенттӕ. Ам сын ӕппӕт фадӕттӕ дӕр ис кусынӕн ӕмӕ сӕ фӕллад уадзынӕн. Хӕринагӕй  сӕ цух нӕ уадзынц. Сӕ хъуыдымӕ гӕсгӕ сын ахӕм фӕлтӕрддзинад  стыр ахъаз фӕуыдзӕн сӕ дарддӕры ахуыры ӕмӕ царды.

— Ардӕм ӕрбацӕуын мӕ рагӕй фӕндыд, уымӕн ӕмӕ алкӕй къухы нӕ бафты, фыццӕгӕм курсы ахуыр кӕнгӕйӕ, цы дӕсныйад равзӕрстай, уым хи бафӕлварын. Мӕ зӕрдӕ дардзынӕн, иннӕ аз Норильскмӕ кӕнӕ Челябинскмӕ кӕй ацӕудзынӕн, ууыл, — зӕгъы Цӕгат Кавказы хӕххон-металлургон институты 1-ӕм курсы студент Томайты Георги.

Фӕллойадон практикӕмӕ Зӕрӕмӕджы ГЭС-мӕ Цӕгат Кавказы хӕххон-металлургон институтӕй ӕрвитынц ӕрмӕст хуыздӕр студентты. Ахӕм практикӕ сӕм ис 2007 азӕй фӕстӕмӕ. Студенттӕй арӕзт ӕрцыд ӕртӕ сменӕйы, 12-15 адӕймаджы алы сменӕйы дӕр. Алы сменӕ дӕр кусы 20 боны. Иттӕг хорз арӕхсынц бетон кӕнынмӕ, арӕзтадон-монтажон ӕмӕ зӕххы бын куыстытӕм. Уый фӕстӕ сӕ алчидӕр райсдзӕн мызд 25 мин сомы бӕрц. Уый бирӕты разӕнгард кӕны хорз ахуырмӕ. Уӕдӕ сӕхи куыд дарынц, уымӕй дӕр сты раппӕлинаг.

Хӕххон хъуыддӕгты кафедрӕйы сӕргълӕууӕг Гӕбӕраты Олег сӕрыстыр у йӕ студенттӕй. ӕдзухдӕр афтӕ фӕдзуры: «Махмӕ ӕвзӕр студенттӕ нӕй!» ӕхсызгон  у, хи фыдау сыл зӕрдӕйӕ кӕй ауды, уый.

— Мах архайӕм, цӕмӕй фылдӕр студенттӕ цӕуой ардӕм фӕллой кӕнынмӕ. Уый сӕхицӕн дӕр пайда у. Рӕстӕг куы рацӕуа,  уӕд сӕрыстыр уыдзысты, ахӕм егъау комплексы арӕзтадмӕ  сӕ фӕллой кӕй бахастой, уымӕй. Кусынц зӕрдиагӕй ӕмӕ сын уый тынг ӕххуыс уыдзӕн, дарддӕр кусынмӕ Норильскмӕ кӕнӕ Челябинскмӕ куы ацӕуой, уӕд, — бафиппайдта Гӕбӕраты Олег.

Зӕрӕмӕджы гидроэлектростанцӕтӕ лӕууынц Алагиры районы ӕрыдоны доныл. Арӕзт сты, иумӕ баст чи у, ахӕм дыууӕ хайӕ — ныртӕккӕ йӕ куыст чи кӕны, ахӕм Сӕйраг ГЭС ӕмӕ Зӕрӕмӕджы ГЭС.

«Транскам Сервис»-ы сӕйраг инженер Цориты Мӕхӕмӕт куыд загъта, афтӕмӕй арӕзтадон куыстытӕ кӕронмӕ ӕрбахӕццӕ сты. Ныртӕккӕ уал дзы цӕудзысты аварион-фӕлварӕн куыстытӕ.

Хъойбайты Галинӕ

ОСТАВЬТЕ ОТВЕТ

Please enter your comment!
Please enter your name here