Гуыргъахъхъ фӕндӕгтыл — Арктикӕмӕ

0
14

Социалистон Фӕллойы Хъӕбатыр КУЧИТЫ Юрийы 100 азмӕ

Нӕ республикӕйы фыццаг Президент Галазты ӕхсарбег стыр ӕргом здӕхта, не ‘мзӕххонтӕй, йӕ райгуырӕн бӕстӕйӕ дард уӕвгӕйӕ, йӕ адӕмӕн егъау кад чи скодта, уыдонмӕ. Ӕз уыцы рӕстӕг куыстон Президенты паддзахадон уынаффӕгӕнӕгӕй.

Иу хатт мӕм Галазы-фырт йӕхимӕ фӕдзырдта ӕмӕ мын бахӕс кодта: «Сергей Яковлевич! Дӕуӕн дӕ къух рог у. Борис Ельцинмӕ Хъантемыраты Ирбегӕн президенты пенси скӕныны тыххӕй фыстӕг дӕр ды бацӕттӕ кодтай, ӕмӕ Уӕрӕсейы Президент нӕ куырдиат сӕххӕст кодта. Ныр дын сӕрмагондӕй хӕс кӕнын Борис Ельцинмӕ ахӕм фыстӕг Кучиты Сергейы фырт Юрийы тыххӕй бацӕттӕ кӕнын. Уымӕ фаг хъусдард нӕй махӕрдыгӕй».

Ӕз лӕмбынӕг ӕркастӕн, Галазты ӕхсарбег мӕм цы ӕрмӕджытӕ радта, уыдонмӕ, ӕмӕ телефонӕй бадзырдтон Кучиты Юримӕ (уыцы рӕстӕг уый уыд Дзӕуджыхъӕуы), фембӕлдтӕн йемӕ, ӕмӕ нӕм рауад тынг цымыдисаг ныхас, ӕз базыдтон бирӕ ног хабӕрттӕ. Дисы мӕ ӕфтыдта, куыд дӕсны ныхасгӕнӕг ӕмбал, афтӕ, иу ног цауӕй иннӕмӕ ӕнцонӕй рахизгӕйӕ, куыд бӕлвырд ӕмӕ бӕстонӕй дзырдта, ӕз раздӕр кӕй никуы фехъуыстон, ахӕм цаутӕ. Уыцы фембӕлды мӕм Кучиты Юри радта йӕ цардвӕндаг ӕвдисӕг фыстӕджытӕ ӕмӕ гӕххӕттытӕ. Иутӕй дзы пайдагонд цӕуы ацы ӕрмӕджы дӕр.

Кучиты Юрийы цардвӕндаг уыд гуыргъахъхъ, фӕлӕ амондджын. Райгуырд хохаг бинонты ‘хсӕн Тибы 1919 азы 26 августы. Йӕ фыд Кучиты Тимофейы фырт Сергей дӕр райгуырд Тибы 1892 азы. Уыд сырх партизан, большевикты фидар фарсхӕцӕг. Архайдта Граждайнаг хӕсты.

Йӕ ӕрдзон куырдиат, йӕ хъаруйы фӕрцы, царды цӕлхдуртӕн нӕ сӕтгӕйӕ, Сергейӕн йӕ къухы бафтыд бирӕ ӕнтыстдзинӕдтӕ, ссис Цӕгат Ирыстоны зӕхгуысты адӕмон комиссар. Фӕлӕ бӕстӕ цыд йӕ 1937 азмӕ… Йӕ балсӕджы цалхӕй уый иувӕрсты нӕ ацыд Кучиты бинонтӕй дӕр. 1938 азы февралы Кучиты Тимофейы фырт Сергей ахст ӕрцыд, ӕмӕ йӕ уыцы аз июлы фехстой Дзӕуджыхъӕуы. Йӕ бинойнаг, нарыхъӕуккаг Хетӕгкаты Любӕ Василийы чызг, Кучиты Юрийы мад, йӕ фырты ныхӕстӕм гӕсгӕ, зондджын ӕмӕ йӕ райгуырдӕй фырнымд хохаг сылгоймӕгты фӕлтӕрӕй, йӕ сывӕллӕтты хъомыл кодта хъысмӕты уаргъ хӕсгӕйӕ, уӕздан ӕмӕ мадзурайӕ. Уыцы фыдбылызы 1938 азы Юри, адӕмы знаджы фырт, иттӕг хорз бӕрӕггӕнӕнтимӕ каст фӕцис Дзӕуджыхъӕуы 27-ӕм скъола. Йӕ аттестаты фыст уыд: «Большевикты ӕппӕтцӕдисон Коммунистон партийы Центрон Комитет ӕмӕ ССР Цӕдисы Адӕмон Комиссарты Советы 1935 азы Уынаффӕмӕ гӕсгӕ Кучиты Юри Сергейы фыртӕн ис бар ӕнӕ фӕлварӕнтӕй уӕлдӕр ахуырадон скъоламӕ бацӕуынӕн». Фӕлӕ бӕстӕйы уӕлдӕр скъолаты дуӕрттӕ уымӕн ӕхгӕд ӕрцыдысты, адӕмы знаджы фырт кӕй уыд, уымӕ гӕсгӕ. Фӕлӕ адӕм хорз сты, фӕзӕгъынц, ӕмӕ Советон Цӕдисы Хъӕбатыр, Советон Цӕдисы Сӕйраг Советы депутат нӕ республикӕйӕ Марк Иваны фырт Шевелев сфӕнд кодта ӕрыгон лӕппуйӕн баххуыс кӕнын. 1941 азы Фыдыбӕстӕйы Стыр хӕсты райдайӕны хӕдразмӕ июны мӕйы Юри порт «Диксон”-ы буксир «Василий Молоков»-мӕ ист ӕрцыд матросӕй. Матросӕй капитаны онг фӕндӕгтыл цӕгатат ихсӕттӕн наутӕ «Таймыр», «Малыгин», «Илья Муромец», «Сибиряков», «Красин», «Ермак»-ы экипажты службӕгӕнгӕйӕ схӕццӕ атомон ихсӕттӕн нау «Ленин»-ы капитанмӕ.

Уыцы рӕстӕг ӕй зонгӕ дӕр ничи кодта. Йӕ хъуыдыйы кӕрон дӕр никӕмӕн уыд, хӕххон хъӕу тибаг ӕрыгон лӕппу ихсӕттӕн наутӕ «Красин», «Сибиряков», «Ермак»-ы экипажты кӕй службӕ кӕны, уый. Фӕлӕ не ‘ппӕты дӕр дисы бафтыдта, фыццаг атомон ихсӕттӕн нау «Ленин»-ы капитан не ‘мзӕххон Кучиты Юри куы ссис, уый куы фехъуыстам, уӕд. Фарстытӕ сбирӕ сты. Иу дзы иннӕйы сӕрты бырста: чи у, кӕцӕй у, чи сты йӕ ныййарджытӕ, йӕ къабӕзтӕ, цот ын ис ӕви нӕй, чи у йӕ бинойнаг ӕмӕ цы архайӕг у? Фарстытӕн кӕрон нӕ уыд.

Фӕлӕ бынтон дисы бахаудтам, 1971 азы июны аразгӕ цы ихсӕттӕн нау, «Арктикӕ», кодтой, уый капитанӕй дӕр та фидаргонд Кучиты Юри куы ӕрцыд, уӕд. Бынтон диссаг та ӕгас дунейӕн дӕр уыди атомон ихсӕттӕн нау «Арктикӕ» денджызты ленк кӕныны историйы фыццаг хатт фӕлварӕн  лӕгӕрст Цӕгат полюсы районмӕ куы бакодта, уӕд. Ӕппӕты сӕйрагдӕр та уый уыд, ӕмӕ ихсӕттӕн науӕн дӕсны разамынд лӕвӕрдта не ‘мзӕххон Кучиты Юри. Хуымӕтӕг нӕ уыд Цӕгат полюсмӕ фӕндаг. Ихсӕттӕн нау-иу бахауд хохыйас ихты ӕхсӕн, боныхъӕд дӕр экспедицийы ныхмӕ цыма архайдта, цыди ӕвзӕрӕй-ӕвзӕрдӕрмӕ. Уавӕр афтӕ зын, афтӕ вазыгджын уыд, ӕмӕ экспедицийы разамонӕг, ССР Цӕдисы денджызон флоты министр Т.Б. Гуженко загъта Кучиты Юрийӕн: «Дӕ архайды мӕхи нӕ тъыссын, уымӕн ӕмӕ ӕууӕндын экипажы бӕрзонд профессионализмыл. Ныфсджынӕй кус, фӕлӕ, бӕллӕх куы ‘рцӕуа, уӕд та йын дзуапп дӕтдзыстӕм дыууӕйӕ дӕр».

Ӕгас дуне дӕр йӕ хъус дардта атомон ихсӕттӕн нау «Арктикӕ»-йы балцмӕ Цӕгат полюсмӕ. Адӕм ӕууӕндыдысты экипажы ӕнтыстдзинадыл, уымӕн ӕмӕ йын разамынд лӕвӕрдта фӕлтӕрдджын ихсӕттӕг бӕгъатыр Кучиты Юри. Адӕмы ӕууӕнк разынд раст. Экипаж бахӕццӕ Цӕгат полюсмӕ. Уый уыд советон адӕймаджы, наукӕйы ӕнӕбасӕтгӕ хъару ӕмӕ зонды уӕлахиз. Райгуырӕн бӕстӕ стыр аргъ скодта поляронты уӕлахизӕн, схорзӕхджын сӕ кодта ордентӕ ӕмӕ майдантӕй. Кучиты Сергейы фырт Юрийӕн та лӕвӕрд ӕрцыд хорзӕхты хуыздӕр — Социалистон Фӕллойы Хъӕбатыры ном.

“Атомон ихсӕттӕн нау «Арктикӕ»-йы фӕлварӕн рейс Цӕгат полюсмӕ бацӕттӕ кӕнын ӕмӕ бацӕуыны фӕдыл лӕгдзинад ӕмӕ хъӕбатырдзинад равдисгӕйӕ, уӕлдай ӕнтыстдзинӕдтӕ равдисыны тыххӕй ССР Цӕдисы Сӕйраг Советы Президиумы 1977 азы 24 сентябры Указӕй дын лӕвӕрд ӕрцыд Социалистон Фӕллойы Хъӕбатыры ном, Ленины орден ӕмӕ сыгъзӕрин майдан «ӕхсырф ӕмӕ дзӕбуг» дын ратгӕйӕ.

ССР Цӕдисы Сӕйраг Советы

Президиумы Сӕрдар Л. Брежнев

ССР Сӕйраг Советы

Президиумы секретарь М. Георгадзе

Мӕскуы, Кремль, 1977 аз 14 сентябрь”.

Кучиты Сергейы фырт Юрийы фӕллойадон ӕмӕ цардвӕндаг ныр хъуамӕ ӕвдыст ӕрцӕуа чингуыты, зарджыты, кинонывты, адӕмон кадджыты, нывкӕнынады ӕмӕ скульптурӕйы. Фӕлӕ афтӕ нӕ рауад. ССР Цӕдисы фехӕлды фӕстӕ райста пенси йӕ кармӕ гӕсгӕ ӕнӕ уӕлдай лӕггӕдтӕй. Иумӕйаг фӕллойадон стаж — 66 азы. Галазты ӕхсарбег куы базыдта персоналон пенсиисӕгӕй хуымӕтӕг пенсиисӕгмӕ ӕрхаудта «демократон реформӕты» аххосӕй, уӕд сфӕнд кодта Уӕрӕсейы Федерацийы Президентмӕ ныффыссын.

“Зынаргъ Борис Николайы фырт!

Кучиты Сергейы фырт Юрийы ном ӕнгом баст у Цӕгат полюсмӕ атомон ихсӕттӕнтӕ «Ленин» ӕмӕ «Арктикӕ»-йы бацыды дугимӕ. Уӕлдон денджызон ленккӕнынады историйы фыццаг хатт атомон ихсӕттӕн нау «Арктикӕ» 1977 азы августы Цӕгатаг полюсмӕ фӕлварӕн балӕгӕрст куы сарӕзта, ӕмӕ уыцы хъуыддагмӕ ӕрмӕст нӕ бӕстӕйы нӕ, фӕлӕ фӕсарӕнты дӕр милуангай адӕймӕгтӕ цымыдисӕй куы кастысты, уӕд ын разамынд лӕвӕрдта Кучиты Ю.С. Атомон ихсӕттӕн нау «Арктикӕ»-йы фӕлварӕн рейс Цӕгат полюсмӕ бацӕттӕ кӕнын ӕмӕ бацӕуыны фӕдыл лӕгдзинад ӕмӕ хъӕбатырдзинад равдисгӕйӕ, уӕлдай ӕнтыстдзинӕдты тыххӕй Кучиты Ю.С. лӕвӕрд ӕрцыд Социалистон Фӕллойы Хъӕбатыры ном. Зӕгъын хъӕуы уый, ӕмӕ Кучиты Ю.С. капитанӕй фидаргонд ӕрцыд, 1971 азы атомон ихсӕттӕн нау «Арктикӕ» аразын куы райдыдтой, уыцы рӕстӕг ӕмӕ йын разамынд лӕвӕрдта 10 азы.

Кучиты Юри матросӕй капитаны онг фӕндӕгтыл Цӕгатаг ихсӕттӕнтӕ «Таймыр», «Малыгин», «Илья Муромец», «Сибиряков», «Красин», «Ермак»-ы экипажты службӕгӕнгӕйӕ, ядерон энергийӕ денджызон транспорты пайда кӕнын райдайгӕйӕ, схӕццӕ атомон ихсӕттӕн нау «Ленин»-ы капитанмӕ.

Фыдыбӕстӕйы Стыр хӕсты активонӕй архайгӕйӕ, Кучиты Юри службӕ кодта Цӕгатаг флоты къанвойы. Флоты баслужбӕ кодта 25 азы. Райгуырӕн бӕстӕ стыр аргъ скодта Кучиты Юрийы фӕллойадон сгуыхтдзинӕдтӕн. Уый хорзӕхджын ӕрцыд Ленины, Фӕллойадон Сырх тырысайы, Фыдыбӕстӕйы хӕсты          II къӕпхӕны ордентӕй, майдантӕй «Советон фӕсполярье хъахъхъӕныны тыххӕй», «Германыл фӕуӕлахизы тыххӕй».

Кучиты Юри у Дзӕуджыхъӕуы кадджын гражданин, кадджын полярник, денджызон флоты кадджын кусӕг, Географион ӕхсӕнады кадджын уӕнг, атомон ихсӕттӕн «Арктикӕ»-йы кадджын капитан. Ныртӕккӕ Кучиты Юри у пенсиисӕг, ӕмӕ фӕсивӕдимӕ кӕны патриотон ӕмӕ интернационалон куыст.

Зынаргъ, Борис Николайы фырт!

Курын дӕ, Кучиты Сергейы фырт Юрийы ӕнӕкӕрон ӕнтыстдзинӕдтӕ, йӕ цард Уӕрӕсейы Арктикӕйы флотимӕ кӕй сбаста, уыдӕттӕ хынцгӕйӕ, сӕххӕст кӕн нӕ куырдиат Президенты пенси йын снысан кӕныны тыххӕй.

Республикӕ Цӕгат Ирыстон-Аланийы

Президент Галазты Ӕ.”

 

Борис Ельцин хорз ӕргом раздӕхта куырдиатмӕ ӕмӕ йӕ администрацийӕн бафӕдзӕхста, цӕмӕй бацӕттӕ кӕной Указ Кучиты Ю.С. тыххӕй. Указы проекты куы федта, раздӕр президенты пенситӕ кӕмӕн снысан кодта, Кучиты Юри дӕр уыдоны бӕрц ӕхца исдзӕн, уӕд ӕм бахаста ивддзинад: «Снысан ын кӕнын цӕрӕнбонты пенси 20 ӕппынкъаддӕр мызды бӕрц». Уыцы рӕстӕг, уый та уыд 1997 азы февралы мӕйы, Уӕрӕсейы ахӕм пенси ничи иста. Фӕлӕ Галазты ӕхсарбег ууыл не ‘рлӕууыд. Уый базыдта, Кучиты Юри ӕмӕ йӕ бинойнаг Кучиты Нинель (Алексеева) кӕй сты хорз медицинон лӕггӕдтӕ хъуаг.

Республикӕйы Президент арвыста Бетъырбухы губернатор В.А. Яковлевмӕ куырдиат, цӕмӕй Кучиты Ю. С. Ӕмӕ йӕ бинойнагӕн саразой сӕрмагонд медицинон лӕггӕдты уавӕртӕ. Уыцы куырдиат ӕрвыст уыд 1997 азы 3 ноябры ӕмӕ 25 ноябры Кучиты Юри ӕмӕ Галазты ӕхсарбег райстой ахӕм дзуапп: «Канд Кучиты Юри ӕмӕ йӕ бинойнаг нӕ, фӕлӕ ма ӕппӕт бинонтӕн дӕр арӕзт ӕрцыд хъӕугӕ медицинон лӕггӕдтӕ, ӕмӕ сӕм цӕстдард кӕй уыдзӕн раззагдӕр медицинон технологиты клиникон центры”.

Абон, хъыгагӕн, Кучиты Сергейы фырт Юри немӕ нал ис. Уый ацы дунейӕ ахицӕн 2005 азы 15 декабры Бетъырбухы, йӕ  86-ӕм азы куы бацыд, уӕд. Фӕлӕ йӕ ном рох никуы уыдзӕн.

Сергей Плахтий,

профессор

ОСТАВЬТЕ ОТВЕТ

Please enter your comment!
Please enter your name here