Ныр та ма сӕнӕфсир дӕр…

0
15

Ирыстоны зӕххыл ерысхъом дыргъдӕттӕ ӕрзайын кӕнын — ахӕм стыр нысанимӕ 2002 азы Кировы районы хъӕууонхӕдзарадон кооператив «Де-Густо»-йы бавнӕлдтой ахсджиаг куыстмӕ. Сӕ фыццаг акъахдзӕф фӕрӕстмӕ ис, ӕмӕ абон куыстуаты ном хъуыстгонд у ӕрмӕст нӕхи республикӕйы нӕ, фӕлӕ ӕндӕр регионты дӕр.

Хицӕн  таладӕтты зайын кӕнынц тала бӕлӕстӕ, раст чысыл сабитау сӕм зилынц, ӕмӕ сӕ уыдон дӕр фыдӕнхъӕл нӕ фӕкӕнынц. Тыллӕг чи дӕтты, ахӕм дыргъдӕтты фӕзуат сӕм у 270 гектары. Фатау ӕмраст, цъӕх-цъӕхид бӕлӕстӕн сӕ кӕрон зынгӕ дӕр нӕ кӕны.

Агротехникӕйы ӕппӕт домӕнтӕ ӕххӕст кӕнгӕйӕ, «Де-Густо»-йы дыргъдӕтты зайын кӕнынц фӕткъуыйы цалдӕр хуызы, чъерами, алтъами, чылауи, ӕхсынцъы, кӕрдо ӕмӕ бал.

Ӕрвылаз хӕдзарады таладӕтты байрӕзы иу милуан бӕласы.      «Де-Густо»-йы сӕрдар Дзиццойты Римӕйӕн ӕнгом ӕмгуыстад ис зындгонд институттимӕ, Стъараполы дыргъты куысты фӕлварӕнты станцӕимӕ, Цӕгат Кавказы хӕххон ӕмӕ хохрӕбын хъӕууонхӕдзарадон наукон-иртасӕн институты ахуыргӕндтимӕ. Ӕрвылбоны фыдӕбон, стӕй, бирӕ азты фӕлтӕрддзинад ын фадат дӕттынц ӕнӕниз, фидар, бынӕттон ӕрдзон уавӕртимӕ баст бӕлӕстӕ зайын кӕнын, 1-2 азмӕ дыргъ дӕттын чи райдайдзӕн, ахӕмтӕ.

Зӕрдӕрухс сты сӕ фӕллойы бӕрӕггӕнӕнтӕй дӕр. Зӕгъӕн ис, алы аз дӕр мингай тоннӕтӕ дыргътӕ уӕй кӕнынц. Фыццаджыдӕр нӕхи республикӕйы цӕрджытӕн. Сӕ продукцимӕ фенхъӕлмӕ кӕсынц Кӕсӕг-Балхъары, Дагестаны, Цӕцӕны, Хъӕрӕсе-Черкесты республикӕты, Мӕскуыйы, Новосибирскы, Бетъырбухы, Хъазаны, Ярославлы ӕмӕ ӕндӕр рӕтты.

Дыргъдӕтты цӕттӕ тыллӕг ӕмбӕлгӕ уавӕрты ӕфснайд кӕй нӕ цыд, уый тыххӕй зындзинӕдтӕ ӕййӕфтой. Абон, ӕртӕ мин тоннӕйы кӕм цӕуы, ахӕм, алцӕмӕй ифтонг бӕстыхай кусы. Цы ӕфтиӕгтӕ сӕм вӕййы, уыдонӕн сӕ фылдӕр хай хардз кӕнынц хӕдзарады райрӕзтыл.

Хицӕн бригадтӕй алкӕмӕ дӕр ис йӕхи фӕзуат, бӕлӕстӕм зилынц, кӕрдӕг сӕ алыварс кӕрдынц, низтӕ ӕмӕ хилӕгойты ныхмӕ сӕ хостӕй пырх кӕнынц, хӕссынц сӕм минералон хъацӕнтӕ, афойнадыл сӕ бахсӕдынц.

Сӕ бӕркӕдтӕм ма тагъд рӕстӕг бафтдзӕн сӕнӕфсиры хъӕздыг тыллӕг. 2017 азы уалдзӕджы ныссагътой тӕнтъихӕг талатӕ «Шардоне», «Рислинг», «Красностоп — Золотовский». Ӕдӕппӕтӕй фараст сӕнӕфсиры хуызы, ӕмӕ сӕхи хорз ӕнкъарынц Ирыстоны зӕххыл.

— Ныртӕккӕ уал нӕм ис ӕхсӕз мин къудзийы, тыллӕг дӕттын райдайдзысты фидӕн аз, ӕхсӕз тоннӕйы бӕрц дзы хъуамӕ ӕрӕмбырд кӕнӕм. Пайдагонд цӕудзӕн сӕ донӕй, араздзысты дзы сӕны алы хуызтӕ, — зӕгъы «Де-Густо»-йы ӕххӕстгӕнӕг директор Хъуылымбегты Жаннӕ.

Ӕппӕт куыстытӕм дӕр йӕ цӕст дары Дыгъуызты Алексей (къамы).

Ӕрӕджы куыстуат бабӕрӕг кодтой РЦИ-Аланийы Сӕргълӕууӕджы уынаффӕгӕнӕг Уырыцхъуаты Зауырбег ӕмӕ нӕ республикӕйы хъӕууонхӕдзарадон фермерон хӕдзарӕдты ассоциаци — АККОР-ы сӕрдар Къадзаты Игор. Цы федтой, цы фехъуыстой, уымӕй разыйӕ баззадысты.

ГУГКАТЫ Жаннӕ

ОСТАВЬТЕ ОТВЕТ

Please enter your comment!
Please enter your name here