Сӕйрагдӕр — барадон фӕтк бахъахъхъӕнын

0
13

Цӕгат Ирыстоны Сӕргълӕууӕг Битарты Вячеслав дзы сӕрдариуӕг кодта, афтӕмӕй знон уыд РЦИ-Аланийы барадон фӕтк хъахъхъӕныны фарстыты фӕдыл координацион ӕмбырд.

Зындгонд куыд у, афтӕмӕй, Беслӕны фыццӕгӕм скъолайы арӕзт террористон фыдракӕнды амӕттӕгты номарӕн бонтӕ уыдзысты 1-3 сентябры. Уыимӕ бастӕй, республикӕйы ахуырадон кусӕндӕтты Зонындзинӕдты бон бӕрӕггонд цӕудзӕн 4 сентябры (уыимӕ, Рахизфарсы районы скъолаты та ног ахуыры аз райдайдзӕн бон фӕстӕдӕр, ома, 5 сентябры).

Беслӕны арӕзт террористон фыдракӕнды амӕттӕгты номарӕн мадзӕлтты рӕстӕг, стӕй 31 августӕй 6 сентябры онг РЦИ-Аланийы Мидхъуыддӕгты министрады дӕлхайӕдтӕ сӕ службӕ ӕххӕст кӕндзысты карздӕргонд фӕткмӕ гӕсгӕ. Уыцы бонты барадон фӕтк ӕмӕ адӕмы цард хъахъхъӕндзысты пъӕлицӕйы 3 700 кусӕджы, стӕй «Росгвардия»-йы службӕгӕнджытӕ, хъазахъхъаг ӕхсӕнады уӕнгтӕ ӕмӕ бархионтӕ.

Координацион ӕмбырды архайджытӕ бӕстон ӕрдзырдтой ног ахуыры азмӕ цӕттӕдзинады, стӕй Беслӕны дзыллон номарӕн мадзӕлтты архайджыты ӕдасдзинад бахъахъхъӕныны фарстытыл.

Битарты Вячеслав барадон ӕмӕ тыхы ӕппӕт ведомствӕты минӕвӕрттӕм дӕр фӕсидт, цӕмӕй сӕ хъарутӕ ӕрбангом кӕной ӕмӕ ӕппӕт мадзӕлттӕ дӕр саразой адӕмы ӕдасдзинад хъахъхъӕнынӕн. Республикӕйы разамонӕг сӕрмагонд ӕргом аздӕхта, Беслӕны 1-3 сентябры цы номарӕн мадзӕлттӕ цӕудзӕн, уыдонмӕ.

— 15 азы рацыд, Беслӕны фыццӕгӕм скъолайы цы ӕвирхъау фыдракӕнд арӕзт ӕрцыд, ууыл. Уый у нӕ иумӕйаг рис ӕмӕ хъыг. Сентябры фыццаг бонты Беслӕны арӕзт ӕрцӕудзысты дзыллон номарӕн мадзӕлттӕ, горӕт бабӕрӕг кӕндзысты бирӕ уӕрӕсейаг регионтӕ ӕмӕ фӕсарӕйнаг бӕстӕты минӕвӕрттӕ. Уыцы ӕууӕлты архайгӕйӕ, нӕ сӕйрагдӕр нысан у, цӕмӕй уыцы бонтӕ ацӕуой ӕнӕфыдбылызӕй. Адӕмы ӕдасдзинады мадзӕлттӕм сӕрмагонд ӕргом аздахын хъӕуы Зонындзинӕдты бон дӕр, — фӕнысан кодта Битарты Вячеслав.

Боны фӕткы фарстыты фӕдыл раныхас кодтой РЦИ-Аланийы Парламенты Сӕрдар Алексей Мачнев, Рахизфарсы районы администрацийы сӕргълӕууӕг Беркъаты Константин, ахуырад ӕмӕ наукӕйы министр Людмилӕ Башарина, барадон ӕмӕ тыхы ведомствӕты минӕвӕрттӕ.

РЦИ-Аланийы Сӕргълӕууӕджы

ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here