Цӕры йӕ адӕмы фарн ӕмӕ амондӕн

0
15

Иналар-булкъон СУАНТЫ Никъалайы фырт Станиславы 70 азы бонмӕ

Инӕлар-булкъон Суанты Никъалайы фырт Станиславы ӕнӕхъӕн Ирыстоны чи нӕ зоны, ахӕм адӕймаг зын ссарӕн у. Афтӕ зын ссарӕн у, хъаст дзы чи ракӕна, ахӕм дӕр. Фидар зонд, ӕхсар, ӕгъдау ӕмӕ ӕфсарм йӕ мады гуыбынӕй рахаста, цы бинонты ‘хсӕн схъомыл, уым ахъардтой йӕ туджы. Уыцы миниуджытӕ фӕстӕдӕр арф зонындзинӕдтимӕ ныффидар кодта Орджоникидзейы Суворовон, фӕстӕдӕр та маршӕл А.И.Еременкойы номыл Орджоникидзейы дыууӕ Сырхтырысаджын уӕлдӕр командон училищӕйы ахуыр кӕнгӕйӕ ӕмӕ дарддӕр ӕфсӕддон службӕйы гуыргъахъхъ фӕндӕгтыл цӕугӕйӕ.

Станислав райгуырд 1949 азы августы Стъараполы крайы хутор «Большевик»-ы, уый ис Курскы районы Мӕздӕджы хӕдфарсмӕ.

Йӕ фыд Никъала бирӕ зонаг, хӕдӕфсарм, уӕздан лӕг, Фыдыбӕстӕйы Стыр хӕстӕй цӕфтӕй сыздӕхгӕйӕ, куыста историйы ахуыргӕнӕгӕй, йе ‘гъдау ӕмӕ йӕ зонындзинӕдтыл ахуыр кодта, ӕрмӕст кӕстӕр фӕлтӕры нӕ, фӕлӕ ма фӕзминаг уыд сӕ хистӕртӕн дӕр. Куыста скъолайы директорӕй, фӕлӕ хӕстӕфхӕрд лӕгыл йӕ цӕфтӕ ӕртӕфстысты, ӕмӕ бирӕ нал ацард. Станиславыл уӕд цыдис ӕртӕ азы. Баззад йӕ мад ӕмӕ йӕ нанаимӕ.

Мӕздӕджы дыккӕгӕм скъолайы аст къласы фӕуыны фӕстӕ ахуыр кӕнынмӕ бацыд Орджоникидзейы Суворовон училищӕмӕ ӕмӕ йӕ каст фӕцис иттӕг хорз бӕрӕггӕнӕнтимӕ.1967 азы училищӕйӕ сарӕзтой Уӕлдӕр иумайагӕфсӕддон командон училищӕ. Ам цӕттӕ кодтой афицертӕ астӕуккаг ӕфсӕддон ӕмӕ уӕлдӕр сӕрмагонд ахуырадимӕ. 1971 азы йӕ Станислав каст фӕцис, ам дӕр та иттӕг хорзӕй. Ӕфсӕддон уӕвынмӕ чи нӕ бӕллыд, уыцы сӕрӕн лӕппу йӕ хъуыды аивта Суворовон училищӕйы ӕмӕ райдыдта йе ‘фсӕддон цардвӕндаг.

Ӕрыгон афицеры арвыстой Киевы М.В. Фрунзейы номыл дыууӕ хатты Сырхтырысаджын иумӕйагӕфсӕддон уӕлдӕр училищӕмӕ. Ам ын йӕ бӕрны бакодтой курсантты взвод, фӕстӕдӕр ссис ротӕйы командир. Цыбыр рӕстӕгмӕ йӕ ротӕ нымад ӕрцыд училищӕйы ӕппӕты хуыздӕр ӕфсӕддон хайадыл. Станислав ахуыр кӕнынмӕ бацыд М.В. Фрунзейы номыл академимӕ. Ӕнтыстджынӕй йӕ каст фӕуыны фӕстӕ капитаны цинимӕ йӕ службӕ дарддӕр кодта Германийы. Батальоны командир йӕ растдомӕн, фидар ӕгъдау, йӕ арф зонындзинӕдты фӕрцы уайтагъд ссис афицертӕ ӕмӕ салдӕтты уарзондӕр адӕймаг. Сӕ цӕст ыл ӕрӕвӕрдтой хистӕр командӕгӕнджытӕ дӕр, ӕмӕ 32-аздзыд лӕппуйӕн бабар кодтой мотоӕхсӕг полкъ. Ӕрыгон командир хъӕппӕрисджынӕй бавнӕлдта йӕ ног ӕмӕ бӕрнон куыстмӕ. Хорз зындгонд ын уыд, ӕфсӕддон хъуыддаджы сӕйрӕгты сӕйрагдӕр фидар ӕгъдау ӕмӕ арф зонындзинӕдтӕ кӕй сты, уый. Уыдон хъомыладимӕ сбӕтгӕйӕ, Станислав архайдта, йӕ хъарутыл нӕ ауӕрдгӕйӕ. Ӕмӕ йӕ тухитӕ дзӕгъӕлы нӕ фесты. Германийы цы Советон ӕфсад уыди, уым йӕ полкъ бацахста фыццаг бынат, ӕмӕ йын лӕвӕрд ӕрцыд ССР Цӕдисы хъахъхъӕнынады министрады вымпел «За мужество и доблесть», Германийы Советон ӕфсӕдты цӕугӕ Сырх тырысаимӕ. Полкъ ссис фистӕг ӕфсӕдты ‘хсӕн социалистон ерысы хъӕппӕрис расидӕг. Полчъы командир Суанты Станиславӕн та ӕмгъуыдӕй раздӕр радтой дӕлбулкъоны цин.

1983 азы ӕфсады инӕлар Германы Советон ӕфсӕдты сӕйраг командӕгӕнӕг Михаил Зайцевы бардзырдмӕ гӕсгӕ Суаны-фырт нысангонд ӕрцыд танкты фӕстӕзаддӕр дивизийы штабы хицауӕй. Ӕмӕ афӕдзмӕ дивизи рацыд фыццӕгты ӕмрӕнхъ.

Станиславӕн Фыдыбӕстӕйы Стыр хӕсты йӕ фыд Никъала дӕр танкист уыд, ӕмӕ ныр дивизийы штабы хицауӕй куы ӕрлӕууыд, уӕд ӕм афтӕ каст, цыма йын йӕ хъуыддӕгты мӕрдты бӕстӕй йӕ фыд дӕр ӕххуыс кӕны, цыма дарддӕр уый фӕдзӕхстытӕ ӕххӕст кӕны, цыма сӕ фӕндӕгтӕ ам баиу сты, ӕмӕ йӕ уый тынгдӕр разӕнгард кодта ног ӕнтыстытӕм. Уыдон та, йӕ хицауад ӕнӕ уынгӕ нӕ уыдысты, уымӕн ӕмӕ йӕ архайд хурӕй бӕрӕгдӕр дардта алы хъуыддаджы дӕр. Йӕ хорз службӕйы тыххӕй та йын ӕмгъуыдӕй раздӕр 1985 азы лӕвӕрд ӕрцыд булкъоны цин.

Сабыр царды рӕстӕг ӕфсӕддоны цинтӕ ӕмгъуыдӕй раздӕр нӕ, фӕлӕ хатгай ӕмгъуыдмӕ дӕр арӕх ӕмӕ алкӕмӕн нӕ лӕвӕрдтой. Ӕртӕ мӕйы фӕстӕ Станиславӕн фӕндараст загътой ӕфсады танкты дивизийы, ӕмӕ та фӕстӕмӕ ӕрбаздӕхт Советон Цӕдисмӕ. Ныр та, Киевы ӕфсӕддон зылды Кривой Рогы цы танкты дивизи уыд, уый командирӕй. Ротӕйӕ, ботальонӕй, полкъӕй — алы ран дӕр ӕгъдауӕй, ӕфсӕддон цӕттӕдзинадӕй дӕр уыдысты бирӕ хуыздӕрхъуаг. Хъуыдис дзы дысвӕлдӕхтӕй бавналын, танкты дивизи, куыд ӕмбӕлы ахӕм ӕмвӕзадмӕ сисын. Фӕлӕ зынгзӕрдӕ афицер зынтыл сфӕлтӕрдта ӕмӕ дӕууӕ азы фӕстӕ Киевы ӕфсӕддон окруджы йӕ хорзы кой айхъуыст. Схорзӕхджын ӕй кодтой зылды Сырх тырысайӕ. Станислав йӕ сыгъдӕгзӕрдӕ архайдӕй йӕхи бауарзын кодта, ӕрмӕст афицертӕ ӕмӕ салдӕттӕн нӕ, фӕлӕ Кривой Роджы ӕппӕт цӕрджытӕн дӕр. Сӕвзӕрстой йӕ горӕты советмӕ депутатӕй, уыд партийы горкомы уӕнг.

Киевы ӕфсӕддон зылды командӕгӕнджытӕ Суанты Станиславы гӕххӕттытӕ бацӕттӕ кодтой, цӕмӕй йын радтой инӕлары цин. Фӕлӕ уӕды рӕстӕджы СЦКП-йы ЦК-йы уӕнгтӕ сӕхӕдӕг карджын кӕй уыдысты, уымӕ гӕсгӕ йын йе ‘нтыстытӕй не скодтой хатдзӕгтӕ, фӕлӕ загътой 37 азы ӕгӕр ӕрыгон кар у инӕларӕн ӕмӕ гӕххӕттытӕ нӕ бафыстой. Фидар удыхъӕд, сыгъдӕгзӕрдӕ ӕхсарджын булкъонӕн кӕд уыцы хабар ӕхсызгон нӕ уыд, уӕддӕр ӕй йӕ зӕрдӕмӕ стыр мастӕн нӕ райста, ӕмӕ дарддӕр зӕрдиагӕй ӕххӕст кодта йе ‘фсӕддон хӕс.

1987 азы фӕззӕджы ӕрвыст ӕрцыд Генералон штабы академимӕ ӕмӕ йӕ каст фӕуыны фӕстӕ 1989 азы райста инӕлары цин. Советон ӕфсады уый уыд (39 азы) ӕппӕты ӕрыгондӕр инӕлар. Инӕлар-майор Суанты Станиславы снысан кодтой Фӕскавказы ӕфсӕддон зылды 7-ӕм гвардейон ӕфсады командӕгӕнӕджы фыццаг хӕдивӕгӕй. Афӕдзы фӕстӕ 1990 азы йӕ раивтой Дзӕуджыхъӕуы А.И. Еременкойы номыл дыууӕ хатты Сырхтырысаджын иумӕйаг командон училищӕйы хицауӕй.

Ссӕдзӕм ӕнусы кӕрон… 90 азтӕ… Советон Цӕдисы фидар паддзахад ӕддӕг-мидӕг ауад. Цӕдисон паддзахӕдты арӕзтой митингтӕ, домдтой хӕдбардзинад. Нагорный Карабахы сомихӕгты ӕмӕ азербайджайнӕгты ‘хсӕн сирвӕзт хӕсты цӕхӕр. Тбилисы ӕмӕ Вильнюсы анхъӕвзтой экстремизмы уылӕнтӕ. Уыдонмӕ гӕсгӕ, сӕ сӕртӕ сдардтой Ирыстоны хуссайраг  ӕмӕ скӕсӕйнаг сыхӕгтӕ дӕр. Хӕстмӕ сидӕг экстремистон хъуыдытӕ кодтой тыхджынӕй-тыхджындӕр, ӕргомӕй-ӕргомдӕр фӕхӕццӕ сты царды алы къабӕзтӕм, суанг Советон ӕфсады ӕмӕ иннӕ тыхы структурӕтӕм дӕр. Уыцы змӕст рӕстӕг, 1992 азы, Суанты Станиславы сӕвзӕрстой Цӕгат Ирыстоны Сӕйраг Советы депутатӕй ӕмӕ ссис, уӕд ног сарӕзт, республикӕйы хихъахъхъӕнынады комитеты уӕнг.

1992 азы июлы уыд Цӕгат Ирыстоны Сӕйраг Советы ӕнӕрадон ӕмбырд. Уым Суаны-фырты сӕвзӕрстой республикӕйы ӕдасдзинады Советы сӕрдары хӕдивӕгӕй. Дагомыскы бадзырдмӕ гӕсгӕ Хуссар Ирыстон ӕмӕ Гуырдзыстоны ‘хсӕн хъуамӕ сарӕзтаиккой иумӕйаг ӕфсад, уый хъуамӕ баурӕдтаид тугкалӕн хӕст. Суаны-фыртӕн бахӕс кодтой сабырдзинад бахъахъхъӕныны ирон тыхтӕ сӕмбырд кӕнын ӕмӕ сӕ Хуссар Ирыстон ӕмӕ Гуырдзыстоны ӕхсӕнмӕ бакӕнын. Хӕрз цыбыр рӕстӕгмӕ бархионтӕй цы полкъ сарӕзтой, уый Станиславы разамындӕй 1992 азы 14 июлы уӕрӕсейаг ӕмӕ гуырдзиаг фидыдхӕссӕг тыхтимӕ бавнӕлдтой сӕ хӕстӕ ӕххӕст кӕнынмӕ. Ӕрфидар тӕссонд, фӕлӕ уӕддӕр сабырдзинад. Фӕстӕдӕр уыцы бонты тыххӕй Суаны-фырт зӕгъдзӕн:

«Мах архайдтам сабырдзинады сӕрвӕлтау Ирыстон ӕмӕ йӕ адӕмы бахъахъхъӕныныл ӕмӕ уый тыххӕй пайда кодтам ӕппӕт гӕнӕнтӕй дӕр. Уымӕн ӕмӕ нӕ бӕстӕйы сабырдзинадхӕссӕг тыхтӕй пайдагонд цыдис фыццаг хатт, нӕ нӕм уыд фӕлтӕрддзинад, алы къахдзӕф дӕр нын уыдис ногдзинад… Уыцы рӕстӕгмӕ нӕ республикӕйы сӕмбырд сты дӕсгай мин лыгъд адӕм Хуссар Ирыстон ӕмӕ Гуырдзыстоны мидӕг районтӕй. Хуссар Ирыстонӕн тӕссаг уыд дунейы политикон картӕйӕ фесӕфынӕй. Бадзырды архайджытӕ баныхас кодтой сабырдзинадхӕссӕг тыхтӕй спайда кӕныныл».

Баныхас кӕнын иу хъуыддаг уыд, йӕ сӕххӕст кӕнын та ноджы зындӕр ӕмӕ вазыгджындӕр хъуыддаг. Ӕмӕ йӕ Станислав сӕххӕст кодта, хуыздӕр куыд гӕнӕн уыд, афтӕ. 1992 азы октябр-ноябры разамынд лӕвӕрдта республикӕйы хихъахъхъӕнынады тыхтӕ — адӕмон хӕдӕфсад ӕмӕ республикон гвардийӕн. Станислав абон дӕр зӕрдӕрисгӕйӕ ӕрымысы, Ирыстоны Хуссары ӕмӕ Цӕгаты дӕр экстремисттӕй сӕ бӕстӕ бахъахъхъӕныны сӕрвӕлтау сӕхи нывондӕн чи ӕрхаста, уыдоны рухс нӕмттӕ. Ӕрвылаз дӕр ноябры ӕрцӕуы Мӕскуыйӕ ӕмӕ дидинджытӕ сӕвӕры, Дзӕуджыхъӕуы «Намысы Алле»-йы 1992 азы цы ӕвзонг фӕсивӕды баныгӕдтой, уыдоны ингӕнтыл.

1992-1994 азты Республикӕ Цӕгат Ирыстон-Аланийы Сӕйраг Советы Сӕрдары хӕдивӕг Суанты Станислав, фӕллад нӕ зонгӕйӕ, зӕрдиагӕй архайдта республикӕйы экономикон ӕмӕ социалон уавӕртӕ фӕхуыздӕр кӕныныл. 1995 азы барвӕндонӕй ацыд Уӕрӕсейы Гӕрзифтонг тыхтӕй. Фӕлӕ хъӕппӕрисджын инӕлар, йӕ ардбахӕрд Советон Цӕдисы ӕмӕ Уӕрӕсейы Федерацийы Гӕрзифтонг тыхты службӕ кӕнгӕйӕ иунӕг хатт дӕр чи нӕ фӕчъизи, фӕмӕнг кодта, суанг-иу йӕ фӕндаг карды комыл цӕуӕгау куы уыд, уӕддӕр бӕрнондзинад ӕрмӕст йӕхимӕ чи иста, йӕхи хъуыддӕгтӕй йӕ адӕмы хъуыддӕгтӕ бӕрзонддӕр чи ӕвӕрдта, афицеры кад ӕмӕ намыс сыгъдӕгӕй чи фӕхаста, уый фӕлтӕрддзинад, йӕ хӕдзонд, йӕ цӕттӕдзинад алы хъуыддагмӕ дӕр хорз зыдтой Уӕрӕсейы Федерацийы Гӕрзифтонг тыхты разамонджытӕ. Хуссар Ирыстоны цауты иумӕ архайдтой Сергей Шойгуимӕ ӕмӕ, Уӕрӕсейы Федерацийы ӕнӕнхъӕлӕджы уавӕрты министрад арӕзт куы ‘рцыд, уӕд 1996 азы УФ-йы Президенты бардзырдмӕ гӕсгӕ службӕ кӕнын райдыдта ӕнӕнхъӕлӕджы уавӕрты министрады граждайнаг хъаыхъхъӕнынады ӕфсӕдты департамент ӕмӕ ирвӕзынгӕнӕг къордты разамонӕджы фыццаг хӕдивӕгӕй, афӕдзы фӕстӕ та — йӕ разамонӕгӕй. 1999 азы Хӕдбар Паддзахӕдты Цӕдисы бӕстӕты сӕргълӕуджыты уынаффӕмӕ гӕсгӕ Суанты Станиславы сӕвӕрдтой ӕнӕнхъӕлӕджы уавӕртӕ аиуварс кӕныны хӕдбар Паддзахӕдты Цӕдисы тыхты дунеон корпусы разамонӕгӕй. Фӕлтӕрдджын инӕлар 2000 азы ссис Уӕрӕсейы Федерацийы ӕнӕнхъӕлӕджы уавӕрты министры хӕдивӕг. Йӕ хъӕппӕрисджын, ӕнӕзивӕг, бӕстон ӕмӕ бӕлвырд архайды тыххӕй Уӕрӕсейы Федерацийы Президент Борис Ельцины уынаффӕмӕ гӕсгӕ райста инӕлар-лейтенанты цин, 2001 азы та йын йӕ сыгъдӕгзӕрдӕ службӕ инӕлар-булкъоны цинӕй сбӕрӕг кодта Уӕрӕсейы федерацийы Президент Владимир Путин.

«Фыды фарн мӕрдтӕм нӕ цӕуы», — зӕгъы ирон ӕмбисонд, мӕрдтӕм нӕ цӕуы бинонты фарн дӕр. Суанты Станиславы фыд Никъала йӕхиуыл нӕ ауӕрдгӕйӕ фӕхъахъхъӕдта фыдыбӕстӕ. Цӕфтӕ ӕмӕ хъӕдгӕмттимӕ сыздӕхт йӕ райгуырӕн уӕзӕгмӕ. Цы тых, цы хъарутӕ ма йӕм баззад, уыдон дӕр сыгъдӕгзӕрдӕйӕ лӕвӕрдта фидӕны фӕлтӕрӕн, ахуыр сӕ кодта, царды рӕстзӕрыдӕ, сыгъдӕг удӕй цӕрыныл, худинаг сӕрмӕ нӕ хӕссыныл. Уӕдӕ йӕ мад Зинӕ дохтыр уӕвгӕйӕ, ӕхсӕв-бон нӕ хынцгӕйӕ, медицинон ӕххуыс кодта хъӕуы цӕрджытӕн. Уӕд тагъд ӕххуысы машинӕтӕ нӕ уыд, хъӕуы-иу чидӕриддӕр фӕтыхст, ӕмбисӕхсӕв уа, боныцъӕхтӕ уа, згъордтой ӕххуысмӕ Зинӕмӕ ӕмӕ-иу уый ӕнӕзивӕгӕй ӕдзухдӕр сӕ фарсмӕ ӕрбалӕууыд. Уыцы рӕстӕг, уӕлдайдӕр ӕхсӕвыгӕтты йӕ фарсмӕ цыд чысыл Станислав. Райгуырӕн бӕстӕ уарзын, адӕмӕн ӕххуыс кӕнын Станислав рахаста йӕ бинонтӕй, уыцы миниуджытӕ фидаргӕнгӕ цыд йӕ цардвӕндагыл, ӕмӕ йын уымӕн бантыст афицеры кад ӕмӕ намыс сыгъдӕгӕй кӕронмӕ фӕхӕссын. Бӕстӕйы зындӕр ӕмӕ уӕззаудӕр уавӕрты стырдӕр лӕггӕдты архайгӕйӕ йӕ ардбахӕрд никуы фехалын, сыгъдӕгӕй баззайын. Йӕ цардвӕндаджы ӕнтыстытӕ та афтӕ бӕрӕг дардтой, ӕмӕ сын стыр аргъ не скӕнгӕ нӕ фесты бӕстӕйы разамонджытӕ дӕр. Радтой йын Хъӕбатырдзинад ӕмӕ Сырх стъалыйы ордентӕ, орден «За службу Родине в Вооруженных Силах» СССР, Уӕрӕсейы флоты 300 азы, Мӕскуыйы 850 азы, ССР Цӕдисы Гӕрзифтонг тыхты 50,60,70 азты, хӕстон хӕлардзинад фидар кӕныны тыххӕй, ӕфсӕддон ӕхсары тыххӕй I,II къӕпхӕны ӕмӕ ӕнӕзӕрдӕхудт службӕйы тыххӕй I,II,III къӕпхӕны майдантӕ, 2007 азы Хуссар Ирыстоны паддзахадон хӕрзиуӕг — Хӕлардзинады орден. Уӕдӕ номыл даргӕ Макаровы дамбацайӕ дӕр алчи хорзӕхгонд нӕ цӕуы. Фӕлӕ Станислав ӕппӕты бӕрзонддӕр хорзӕхыл нымайы адӕмы, Ирыстоны уарзондзинад, кӕд ӕй алы азты ӕмхуызон не ‘нкъардта, уӕддӕр. Станислав ныртӕккӕ йӕ бинонтимӕ цӕры Мӕскуыйы, ис ын дыууӕ хъӕбулы, ӕртӕ та — хъӕбулы хъӕбултӕ. Йӕ кӕстӕрты дӕр ахуыр кӕны фӕллойыл, адӕмимӕ уарзонӕй цӕрыныл, ӕмӕ сӕ хуртӕй бафсӕдӕд, йӕ фарн та сын фӕндагамонӕг фӕуӕд.

Йӕ лӕгдзинад, йе ‘хсар, йе сгуыхтдзинӕдтӕ адӕм ӕмӕ бӕстӕйы раз нырма бӕлвырддӕр ӕмӕ бӕстондӕр ныхас ссардзысты сӕрмагондӕй йӕ номыл фыст уацтӕ ӕмӕ чингуыты. Мӕн та, мӕ ныхас фӕуын фӕнды поэт Къадзаты Станиславы ныхӕстӕй:

«Стъалыты хонынц ӕрвон куывдмӕ

Ацы алӕмӕты изӕртӕ.

Ракӕнӕм арфӕ нӕртон гуырдӕн, —

Йӕ адӕмы амондӕн чи цӕры».

КАСАТЫ Батрадз

ОСТАВЬТЕ ОТВЕТ

Please enter your comment!
Please enter your name here