Туризм — экономикӕйы рахӕцӕнтӕй иу

0
16

«Цард куыд ӕвдисы, афтӕмӕй туризм хъуамӕ суа нӕ республикӕйы экономикӕйы рӕзты ахсджиагдӕр хай. Нӕ комитет бирӕ хъуыддӕгтыл архайы, нӕ размӕ ӕвӕрд ис, туристтӕн, ӕрбацӕуӕг уазджытӕн сӕ фӕндаг кӕуылты цӕуы, уый фӕрсты алыхуызон лӕггӕдтӕгӕнӕг куыстуӕттӕ байгом кӕныны нысан. Ууыл архайӕм Экономикон рӕзты министрадимӕ, цӕттӕ кӕнӕм проекттӕ, уыдзысты 20 бӕрц. Сӕ сырӕзт бӕттӕм Алагиры, Дыгуры ӕмӕ Горӕтгӕрон районты хӕххон бынӕттимӕ, кӕмттимӕ. Иу ахӕм лӕггадгӕнӕн бынаты фӕзуат хъуамӕ уа 60 квадратон метры, ӕнӕмӕнг дзы хъуамӕ уа санитарон уат, кафе-хӕрӕндон, нӕ ӕрмдӕсныты конд зӕрдылдарӕн сувениртӕ, Интернетимӕ бастдзинад, ӕппӕт иннӕ удӕнцойдзинӕдтӕ ӕмӕ фадӕттӕ», — республикӕйы туризмы комитеты разамонӕг Къозаты Зауырбег знон фембӕлд дзыллон хабархӕссӕг фӕрӕзты минӕвӕрттимӕ ӕмӕ сӕ базонгӕ кодта сӕ куыстимӕ.

Йӕ ныхасмӕ гӕсгӕ, ахӕм фӕндаггон сервисӕн зӕхх дихгонд цӕудзӕн, фӕлӕ дзы ӕндӕр хуызӕн спайдагӕнӕн нӕ уыдзӕн. Ӕппӕт хъуыддӕгтӕ хъуамӕ ӕххӕстгонд ӕрцӕуой амалхъомы ӕхцайы фӕрцы. Ныртӕккӕ дӕр сӕм ӕрбацӕуынц куырдиӕттимӕ, ис, хъуыддаджы балӕууын кӕй фӕнды, ахӕмтӕ. Комитет бацӕттӕ кодта Цӕгат Ирыстоны ӕппӕт туристон авналӕнты тыххӕй информацион портал, кӕй бафӕнда хабӕрттӕ базонын, уый ӕнцонӕй спайда кӕндзӕн порталы гӕнӕнтӕй. Бӕрӕггонд дзы сты ӕппӕт маршруттӕ сӕ райдайӕнӕй сӕ кӕронмӕ, ифтонг сты къамтӕ ӕмӕ видеоӕрмӕджытӕй.

Къозайы-фырт куыд загъта, афтӕмӕй тынг ахсджиаг у туризмӕн хъӕугӕ специалисттӕ бацӕттӕ кӕнын. Фарон нӕ университеты уыцы фарстайыл кусын райдыдтой ӕмӕ бацӕттӕ кодтой 200 адӕймаджы, уыдонӕй 33 сты гидтӕ. Куыст цӕуы маршруттӕн паспорттӕ цӕттӕ кӕныныл, Аланийы саргъуыды 1100 азы кадӕн ма фӕзынд ног, чырыстон динимӕ баст маршрут. Уӕдӕ цӕмӕй «Мамысон» ӕнтыстджынӕй рауайа, уый охыл цӕттӕ кӕнынц сӕрмагонд экономикон бынатыл ӕй банымайыны тыххӕй документтӕ.

Ныридӕгӕн хъуыстгонд у ирхӕфсӕн «Алани-парк» саразыны проект дӕр. Иннӕ ахӕм бирӕ куыстытӕ бакӕнын хъӕуы Цъӕйы, фӕндӕгтӕ сты зилинаг, нӕй дзы сыгъдӕггӕнӕнтӕ. Комитет ма кусы регионалон программӕйыл дӕр, уый ӕххӕстгонд цӕудзӕн ӕрӕфы районы хӕхбӕсты. Йӕ сӕххӕст кӕнынӕн бахъӕудзӕн 3 миллиард сомӕй фылдӕр, сты федералон, республикон ӕмӕ хицӕн амалхъомты фӕрӕзтӕ.

Ахсджиагыл банымадтой, цы ӕрдзон дзӕбӕхгӕнӕндӕттӕ нӕм ис, уыдоны уавӕр сбӕрӕг кӕнын. Цӕгат Ирыстон рагӕйдӕр хъӕздыг уыд бальнеологон фӕрӕзтӕй, фӕлӕ сӕ фӕстаг азты рохуаты ныууагътой. Къозаты Зауырбег куыд бамбарын кодта, афтӕмӕй уал архайынц ӕхсӕз зындгонддӕр минералон донгуырӕнтыл, цӕттӕ кӕнынц бальнеологон концепци. Уый фӕстӕ йыл кусдзӕн ӕнӕниздзинад хъахъхъӕнынады министрад. Алы аз дӕр комитет бацӕттӕ кӕны ахсджиагдӕр цауты къӕлиндар, хъуамӕ дзы нымад цӕуой, туристтӕн ӕхсызгон ӕмӕ зӕрдылдаргӕ цы цаутӕ уыдзысты, уыдон. «Нырма йӕм уыйас бирӕ хъуыддӕгтӕ нӕ бахастам, фӕлӕ йӕ, ӕнӕмӕнг, хъӕздыгдӕр кӕндзыстӕм. Хъуамӕ-иу туристты ӕрбацыдмӕ бацӕттӕ кӕнӕм, зӕгъӕм, ирон чъириты фестивал, цӕмӕй йӕ алы ран дӕр зоной, тырной уыцы рӕстӕг ардӕм ссӕуынмӕ», — бафиппайдта комитеты разамонӕг.

Ныронг нӕ республикӕйы Туризмы бон парахатӕй бӕрӕггонд никуы цыди, фӕлӕ йыл ацы хатт комитет хъавы алыхуызон рӕсугъд мадзӕлттимӕ сӕмбӕлын. Ӕрмӕст Дзӕуджыхъӕуы нӕ цӕудзысты хъуыддӕгтӕ, фӕлӕ кӕмтты, рӕсугъддӕр бынӕтты. Уыдзӕн дзы бӕхтыл тезгъотӕ, национ хӕринӕгты равдыстытӕ, ӕркастытӕ, ерыстӕ… Къозаты Зауырбег куыд фӕбӕрӕг кодта, афтӕмӕй туризмы хъомыс ӕвдисы, цас адӕм нӕм ӕрбацӕуы, уый. Кӕд ацы аз уыдысты 213 мин адӕймаджы, уӕд бӕрӕггонд чи не ‘рцӕуы, ахӕм хицӕн туристтимӕ сты ноджы фылдӕр. Уӕдӕ фӕсарӕйнаг туристты нымӕцыл дӕр ӕфты.

Комитеты разамонӕджы ныхасмӕ гӕсгӕ, сӕ авналӕнтӕй нӕ хъаст кӕнынц, фӕлӕ хъуыддӕгтӕ зӕрдӕмӕдзӕугӕ уавӕрмӕ схӕццӕ кӕнынӕн хъӕуы бирӕ рӕстӕг. Дунейы размӕцыддӕр бӕстӕты туризм хицӕнӕй нӕ рӕзы, йемӕ ма баст сты тынг бирӕ къабӕзтӕ, экономикон рахӕцӕнтӕ. Хъуамӕ се змӕлд уа иуӕрдӕм, иумӕйаг нысаныл архайгӕйӕ дзы рабӕрӕг уыдзӕн размӕцыд. Цы бирӕ нысантӕ ӕвӕрынц сӕ размӕ, уыдонимӕ ис, гом арвы бын этнохъӕу саразын. Архайгӕ йыл кӕнынц, фӕлӕ нырма ӕппӕт фӕзилӕнтӕ бӕрӕггонд нӕма сты.

Уацхӕсджыты фарстытӕ баст уыдысты мидӕггаг туризмимӕ, туристон клубты архайдимӕ, экологон туризмы рӕзтимӕ, йе ‘нӕниздзинады уавӕртӕм гӕсгӕ сӕ авналӕнтӕ къуындӕг кӕмӕн сты, уыдонӕн туристон лӕггӕдтӕ кӕнынимӕ, туризм ӕмӕ бальнеологи баиу кӕнынимӕ, уӕлдӕфон бастдзинӕдтӕ ӕндӕр регионтимӕ байгом кӕнынимӕ ӕмӕ ӕндӕр ахсджиаг хъуыддӕгтимӕ.

Къозаты Зауырбеджы дзуаппытӕ уыдысты бӕстон, бӕрӕг у, уавӕртӕ зоны. Куыд бафиппайдта ныхасы кӕрон, афтӕмӕй нӕ республикӕйы алы цӕрӕг дӕр у бӕрнон ӕрбацӕуӕг уазӕджы раз, кӕд уый истӕмӕй фӕрӕдыди, уӕддӕр ӕм знӕт цӕстӕй кӕсын нӕ хъӕуы, гуымиры ныхас кӕнын. Иугӕр ӕй бафӕндыд Цӕгат Ирыстонмӕ ссӕуын, уӕд ын ӕнӕзонгӕ цы у, уый дӕр ис уӕзданӕй, фӕлмӕнӕй, худӕндзастӕй бамбарын кӕнӕн.

Дзыллон хабархӕссӕг фӕрӕзтӕ, бынтондӕр Интернеты тыгъдады кусджытӕ гӕппӕввонг вӕййынц ног цаумӕ, хабармӕ. Фӕлӕ фиппаинаг, уайдзӕф ныффыссыны агъоммӕ хъуамӕ ахъуыды кӕнӕм, цы расайдзӕн уыцы гуымиры ныхас. Ӕрбацӕуӕг уазӕг йӕхӕдӕг дӕр, ӕмӕ ма, кӕй зоны, уыдоны Ирыстонмӕ нал сразӕнгард кӕндзӕн. Ирон адӕм кӕддӕриддӕр уыдысты уазӕгуарзон, рӕдау, быхсон. Уыцы хорз ӕууӕлтӕ хъуамӕ ма фесафӕм, цавӕрфӕнды уавӕрты дӕр хъуамӕ нӕ бон уа уазӕгӕн-туристӕн зӕрдӕйы фӕндиаг ӕгъдау раттын.

Бутаты Эльзӕ

ОСТАВЬТЕ ОТВЕТ

Please enter your comment!
Please enter your name here