Фидӕны фӕлтӕртӕн

0
55

Цӕгат Ирыстоны стыр ӕргом здӕхт цӕуы ӕрдзы цыртдзӕвӕнтӕ бӕрӕг кӕнынмӕ ӕмӕ сӕ хъахъхъӕнынмӕ дӕр. УФ-йы закъон «Алфамблай ӕрдз хъахъхъӕныны тыххӕй» куыд домы, афтӕмӕй уыдон сты сӕрмагонд хъахъхъӕнинаг территориты хуызтӕй иу. Ныртӕккӕ республикӕйы ахӕм объекттӕ ис 216 фылдӕр ӕмӕ ма сыл ноджыдӕр бафтдзӕн.

Нӕ регионы зӕххытӕ раззагдӕр технологитӕм гӕсгӕ куыстгонд кӕй цӕуынц, уый домы, цӕмӕй ӕрдзы цыртдзӕвӕнтӕ республикӕйы цы чысыл фӕзуӕттӕ ахсынц, уыдон дӕр хъахъхъӕд цӕуой ӕмӕ рӕстӕгӕй-рӕстӕгмӕ фӕхъӕуы сӕ номхыгъдмӕ ногӕй ӕркӕсын, стӕй йӕ рауӕрӕхдӕр кӕнын. Уымӕ гӕсгӕ 2014 азӕй фӕстӕмӕ РЦИ-Аланийы ӕрдзон фӕрӕзтӕ ӕмӕ экологийы министрады специалисттӕ архайынц ӕрдзы цыртдзӕвӕнтӕ инвентаризаци кӕныныл, аргъгонд цӕуы сӕ уавӕрӕн дӕр, сӕ арӕнтӕ та бӕлвырдгонд ӕрцӕуынц.

— Абон ӕрдзы цыртдзӕвӕнтӕн ис бирӕ алыхуызон нысаниуӕг. Наукон ӕгъдауӕй сын аргъ кӕй нӕй, уымӕй уӕлдай уыдонӕн ис стыр ахуырадон-рухсадон ӕмӕ фӕлладуагъды нысаниуӕг. Фӕлӕ адӕймаджы галиу архайды бӕрзонд къӕпхӕн иудадзыг домы ӕрдзы цыртдзӕвӕнтӕ хъахъхъӕнын. Хъыгагӕн, цӕрджытӕ фылдӕр хатт ницы фӕзонынц сӕ фарсмӕ цы ӕрдзы цыртдзӕвӕнтӕ ис, уыдоны тыххӕй, стӕй сын цы аргъ ис, уый та сӕ фӕсонӕрхӕджы дӕр нӕ вӕййы. Уымӕ гӕсгӕ, фӕстаг фондз азы инвентаризаци цӕуы ӕрдзы цыртдзӕвӕнтӕн, цӕмӕй сӕм цӕрджытӕ ӕмӕ паддзахадон оргӕнтӕ дӕр се ‘ргом раздахой, — радзырдта РЦИ-Аланийы ӕрдзон фӕрӕзтӕ ӕмӕ экологийы министрады бӕрнон кусӕг ӕхболӕтты Лолитӕ.

Дарддӕр уый куыд радзырдта, афтӕмӕй ӕрдзы алы цыртдзӕвӕн дӕр хаст ӕрцӕуы кадастрӕйы хыгъдмӕ. Паспорттӕ цӕттӕ кӕнгӕйӕ та, пайдагонд цӕуы ӕрдзон цӕстдарӕнты бӕрӕггӕнӕнтӕй, стӕй Цӕгат Ирыстоны паддзахадон ӕрдзон фӕдзӕхст бынаты наукон кусджытӕ Константин Поповы, Юри Комаровы, Павел Вейнберг ӕмӕ иннӕты фӕллӕйттӕй.

Инвентаризаци райдайӕнӕй фӕстӕмӕ ӕрдзы цыртдзӕвӕнтӕ иртӕстгонд цӕуынц, специалисттӕ сбӕрӕг кӕнынц сӕ нырыккон уавӕр ӕмӕ нысаниуӕг. Цы бӕрӕггӕнӕнтӕ райсынц, уыдон та бахъӕуынц документтӕ цӕттӕ кӕнынӕн, цӕмӕй ацы объекттӕ ӕвӕрд ӕрцӕуой ӕмбӕлгӕ хъахъхъӕныны уагӕвӕрды, уыимӕ сын лӕвӕрд ӕрцӕуы паспорттӕ дӕр, ӕрдзы объекттӕ цы статусы сты, уымӕ гӕсгӕ.

Фондз азы дӕргъы экспедициты рӕстӕг экологтӕ Цӕгат Ирыстоны сбӕрӕг кодтой, ныронг зындгонд чи нӕ уыд, ахӕм ӕрдзон цыртдзӕвӕнтӕ. Сӕ бӕрӕггӕнӕнты бындуры ныр алцыдӕр зындгонд уыдзӕн, кӕм сты, уый тыххӕй. Уымӕй уӕлдай, цӕттӕгонд цӕуынц картӕ-схемӕтӕ, къамтӕ, алы объекты ӕрфыст ӕмӕ нысаниуӕг дӕр, стӕй хъӕугӕ мадзӕлттӕ дӕр амынд цӕудзысты сӕ бахъахъхъӕныны тыххӕй.

Ацы бӕрӕггӕнӕнтӕ пълангонд куыд цӕуы, афтӕмӕй парахатгонд ӕрцӕудзысты районты иумӕйагахуырадон скъолаты, уӕлдӕр ахуыргӕнӕндӕтты; горӕтты ӕмӕ районты администрациты, зӕххы комитетты, ӕрдзхъахъхъӕнынадон оргӕнты, библиотекӕтӕ ӕмӕ ӕхсӕнадон организациты.

Кӕронбӕттӕны нӕ зӕгъын фӕнды: проект у Цӕгат Ирыстоны ӕппӕт ӕрдзы цыртдзӕвӕнтӕ инвентаризаци кӕныны фыццаг къӕпхӕн. РЦИ-Аланийы ӕрдзон фӕрӕзтӕ ӕмӕ экологийы министр Мамиаты Чермены хъуыдымӕ гӕсгӕ, йӕ руаджы нӕ алфамблай ӕрдзы ӕмбисонды рӕсугъддзинад хъахъхъӕд ӕрцӕудзӕн фидӕны фӕлтӕртӕн.

Дзыныхты Аленӕ,

РЦИ-Аланийы ӕрдзон фӕрӕзтӕ ӕмӕ

экологийы министрады пресс-службӕ

ОСТАВЬТЕ ОТВЕТ

Please enter your comment!
Please enter your name here