Ирон лӕг ӕмӕ зындгонд дипломат

0
76

Адӕймаг  йӕ дзыллӕйӕн  хорзы бацӕуыныл  куы архайа, ӕхсӕнады ӕмӕ адӕмы раз ыл цы бӕрнон хӕс ӕвӕрд ис, уый куы зона, адӕмты ‘хсӕн хӕлардзинады ӕмӕ фидыды тӕгтӕ тауынмӕ куы тырна, уӕд ма уымӕй хуыздӕр цы уа. Ацы ныхӕстӕ хауынц  Ирыстоны намысджын фырттӕй иу, дипломат Къарджиаты Эльбрусмӕ. Уый у зондӕй дӕр, миддунейӕ дӕр рӕсугъд адӕймаг. Йӕ удыхъӕды баиу сты ирон фарны ӕмӕ ӕфсармы миниуджытӕ. Ӕмӕ сӕ цардмӕ хӕссы   намысджынӕй.

Эльбрус райгуырд 1944 азы 22 августы  Дзӕуджыхъӕуы. Ам каст фӕци  5-ӕм астӕуккаг скъола,   1966 азы  та — Хӕххон-металлургон институт. Уӕд рабӕрӕг, йӕ цард ӕппӕтӕй дӕр педагогон куыстимӕ кӕй сбӕтдзӕн, уый. Фӕстӕдӕр Эльбрус зӕгъдзӕн, йе ‘ппӕты зӕрдӕагайгӕдӕр  мысинӕгтӕ институты ахуыры азтимӕ баст кӕй сты, уый. Йӕ ахуыры ӕмӕ уӕгъд рӕстӕг йе ‘мгӕрттимӕ ӕрвитын ын хаста стыр цин. Йӕ фарсмӕ уыдысты, царды ӕмӕ ӕхсӕнады, адӕмимӕ хи дарыныл, ныхас кӕныныл кӕуыл ахуыр кодта, ахӕм хистӕртӕ.

1987 азы  ахуыр кодта  СЦКП-йы ЦК-йы цур ӕхсӕнадон наукӕты академийы. Дипломатон хӕстӕ ӕххӕст кодта УФ-йы Фӕсарӕйнаг хъуыддӕгты министрады. 2001 азы та йӕ снысан кодтой  ацы министрады федерациимӕ, парламентимӕ, ӕхсӕнадон организацитимӕ бастдзинады департаменты разамонӕгӕй. Ам кусгӕйӕ, Эльбрусӕн рабӕрӕг сты йе ‘рдзон зонд ӕмӕ адӕмимӕ хӕлар бастдзинӕдтӕ фидар кӕныны тых. Рабӕрӕг, йӕ бон кӕй у цыфӕнды вазыгджын быцӕутӕ  банывыл кӕнын дӕр.

2003 азы  уыд нӕ бӕстӕйы генералон консул туркаг   горӕт Трабзоны. Уый фӕстӕ та, Турчы нӕ бӕстӕйӕн цы минӕварад ис, уый   уынаффӕгӕнӕг. 2008 азы та йӕ снысан кодтой УФ-йы Фӕсарӕйнаг хъуыддӕгты министрады цыппӕрӕм департаменты сӕйраг уынаффӕгӕнӕгӕй.

Къарджиаты Эльбрус стыр хӕрзты бацыд  Хуссар Ирыстонӕн. Ам бирӕ азты уыд УФ-йы ӕххӕстбарджын минӕвар. Уыцы рӕстӕгмӕ йын бантыст йӕ  аналитикон, дардмӕуынаг зонды фӕрцы Хуссар Ирыстоны,  стӕй иннӕ бӕстӕты ‘хсӕн хӕлар ӕмгуыстады бадзырдтӕ саразын. Ӕмӕ куыд нӕ, йӕ рӕстӕджы Эльбрусы фыды хистӕр ӕфсымӕр, зындгонд ӕхсӕнадон архайӕг, этнограф Къарджиаты Бекызӕ бирӕ бакуыста, цӕмӕй  Хуссар Ирыстон райрӕза социалон-экономикон ӕгъдауӕй. Ныр та сын ноджы фылдӕр хӕрзты бацыд йӕ кӕстӕр Эльбрус. Хистӕры рӕсугъд  фарн кӕстӕртӕ дарддӕр  куы хӕссой, дывӕр хорзӕхтӕ йыл куы ‘фтауой, уӕд ма уымӕй  хуыздӕр цы уа. Ӕмӕ уыцы хорзӕх фӕци Эльбрусы дӕр!

Канд дипломатон хъуыддӕгты, ӕхсӕнадӕн ӕмӕ нӕ адӕмӕн бирӕ хӕрзты бацӕуын ын нӕ бантыст, фӕлӕ ма йӕ хъуыды барджынӕй загъта техникон наукӕйы дӕр. Ӕнстыстджынӕй бахъахъхъӕдта  техникон наукӕты кандидаты диссертаци,

— Къарджиаты Эльбрус у ӕцӕг ирон, уӕздан лӕг, ирон адӕймаджы ном сыгъдӕгӕй чи хӕссы, ахӕм адӕймаг. Турчы сӕйраг горӕт Анкарайы цыдысты дунеон чемпионаты ерыстӕ уӕгъдибар хъӕбысхӕстӕй. Уым ирон богӕлттӕ хӕцыдысты цалдӕрӕй.   Уыцы рӕстӕг дзы Эльбрус уыди генералон  консул. Ӕрбацыди нӕм ӕмӕ тыхсти алы ирон богалыл дӕр. Хъайсынты Георгийӕн Турчы  фесӕфти йӕ паспорт. Цӕмӕй йын уырдыгӕй Мӕскуымӕ атӕхӕн уыдаид, уый тыххӕй ницы амал ардта, фӕлӕ йын хӕрзгӕнӕг фӕци Эльбрус. Уый бацархайдта нӕ богалӕн  документ самал кӕныныл, — дзырдта нын газет «Рӕстдзинад»-ы сӕрмагонд уацхӕссӕг, РЦИ-Алинийы аивӕдты сгуыхт архайӕг Баскаты Уырызмӕг.

Ацы цау дзурӕг у Эльбрусы зӕрдӕйы уагыл, йӕ уӕздандзинадыл, тыхст адӕймагӕн баххуыс кӕныны миниуджытӕн йӕ уды стыр бынат кӕй ис, ууыл.

Эльбрус нӕ бӕстӕйы ӕмӕ дунейы хӕлардзинад фидар кӕныныл  тынг хорз кӕй сахадыдта, уый ирдӕй ӕвдисынц, алы рӕстӕджыты йын нӕ бӕстӕйы ӕмӕ фӕсарӕнты паддзахӕдтӕй цы хӕрзиуджытӕ лӕвӕрд ӕрцыд, уыдон.  Се ‘хсӕн ис «Хӕлардзинады», “Кады” ӕртӕ ордены, бирӕ майдантӕ ӕмӕ Кады грамотӕтӕ.

Зындгонд дипломат, ӕхсӕнадон архайӕг Къарджиаты Эльбрусӕн йӕ  царды ӕмӕ фӕллойы фӕндаг у мидисджын чиныгау хӕдхуыз ӕмӕ аив. Йӕ къухы  ма дзы бирӕ сӕргӕндтӕ ныффыссын  кӕй бафтдзӕн, уый дызӕрдыггаг нӕу!

Гасанты Валери

ОСТАВЬТЕ ОТВЕТ

Please enter your comment!
Please enter your name here