Кӕрдӕджыты ирон нӕмттӕ

0
21

Зайӕгойтӕн куыд культуронтӕн, афтӕ хъӕддаг зайӕгтӕн дӕр стыр нысаниуӕг уыдис ирон адӕмы царды. Бирӕтӕ дзы бӕззыдысты хӕрынӕн, пайда сӕ кодтой адӕмон медицинӕйы, арӕзтады, къустӕ, уидгуытӕ, цолпытӕ, тӕбӕгътӕ кӕнгӕйӕ, хӕдзарадон ӕндӕр хъуыддӕгты. Уымӕй уӕлдай, зайӕгойтӕ уыдысты фосдарынады холладжы бындур дӕр, ӕмӕ уый та уыдис ирӕтты царды сӕйраг фӕллой.

Ӕппӕт ацы архайд ӕнӕфӕзынгӕ нӕ фӕцис алыхуызон зайӕгойты ирон нӕмттыл. Фӕлӕ, бафиппайын ӕмбӕлы, зокъоты кӕнӕ къозоты нӕмттӕ махмӕ хӕрзчысыл кӕй сты, уый. Уымӕн ӕмӕ сын раздӕр чысыл ахадындзинад уыдис хохӕгты царды, уӕлдайдӕр хойраджы бындуры.

Ай-гъай, абон мах зонын фӕнды, нӕ хӕхбӕсты ӕмӕ быдырты цы бирӕ зайӕгойтӕ зайы, уыдоны ирон нӕмттӕ. Хъыгагӕн, канд абоны фӕлтӕрты минӕвӕрттӕ нӕ, фӕлӕ нӕ размӕ чи цард, уыцы хистӕртӕ дӕр сӕ ӕппӕтӕй нӕ бахъуыды кодтой. Уавӕр афтӕ у, ӕмӕ зайӕгойты ирон нӕмтты тыххӕй фыццаг бӕрӕггӕнӕнтӕ зынын райдыдтой ахуыргӕндты ӕмӕ фӕндаггӕтты фӕллӕйтты XVIII ӕнусӕй фӕстӕмӕ. Зӕгъӕм, ацы фарстайы фӕдыл фыццаг куыстытӕ Я.С. Медведев рауагъта 1883 азы «Деревья и кустарники Кавказа». Уый фӕстӕ 1884-1885 азты мыхуыры рацыд Гасситы Г.А. Ӕмӕ Тугъанты С.А. чиныг «Названия растений и животных на осетинских наречиях». Фӕстӕдӕр, дыууӕ чиныджы ӕрмӕджытӕй дӕр арӕхстджынӕй пайдагонд ӕрцыд литературон уацмысты ӕмӕ хицӕн ахуыргӕндты наукон фӕллӕйтты.

Ныр цы зайӕгойты номхыгъд мыхуыр кӕндзыстӕм, уымӕн та ӕрмӕг исын бахъуыд раздӕр рӕстӕджыты уагъд монографитӕй, дзырдуӕттӕ ӕмӕ бӕрӕгуӕттӕй. Зӕгъӕм, Брытъиайы-фырт, 1951; Бигъуылайы-фырт ӕмӕ ӕндӕртӕ, 1952,1970,1993; Романович, 1969; Абайы-фырт, 1970; Исайы-фырт, 1978; Тъехы-фырт, 1979; Олисайы-фырт, 1978; Олисайы-фырт, 1988; Козайы-фырт, 1989; Тотрайы-фырт, 1992; Дзабийы-фырт, 1995 ӕмӕ ӕндӕртӕ.

Бафиппайын хъӕуы: зайӕгойты нӕмттӕ ирон уырыссаг тӕлмацты ӕмбырд кӕныны куыст нӕма фӕцис, стӕй йын кӕрон дӕр нӕй. Арӕх наукон фӕллӕйтты иухуызон зайӕгойты нӕмттӕ амынд цӕуынц фӕйнӕхуызон, бирӕ хуызтӕн та тӕлмацтӕ дӕр нӕй, кӕнӕ та ботаникон номенклатурӕйы домӕнтӕн дзуапп нӕ дӕттынц.

Иуӕй-иу тӕлмацтӕ раст нӕ вӕййынц, бынӕттон зайӕгойты бӕсты амынд фӕцӕуынц, регионы чи не ‘мбӕлы, ахӕм хуызтӕ. Уый тыххӕй ӕмӕ, ирон ӕвзагӕй уырыссагмӕ тӕлмацтӕ лӕвӕрд цӕуынц, цы фыццаггуырӕнтӕ бацамыдтам, уыдонмӕ гӕсгӕ.

Фӕлӕ хатгай амынд аххосӕгтӕ хъуыды кӕнгӕйӕ, уыдонмӕ бахъӕуы растгӕнинӕгтӕ ӕмӕ баххӕстгӕнинӕгтӕ бахӕссын дӕр. Уымӕй уӕлдай номхыгъдмӕ хаст не ‘рцыдысты кӕнгӕ ногдзинӕдтӕ, бӕлвырддӕр та калькӕгонд дзырдтӕ уырыссагӕй. Ирон терминтӕ куы вӕййы, уӕд та номхыгъдмӕ хаст нӕ цӕуынц, ирон ӕвзаджы цы гуырдзиаг ӕмӕ уырыссаг ӕмсӕр дзырдтӕй пайда кӕнынц, уыдон.

Нӕ газеты ацы номырӕй райдайдзыстӕм зайӕгойты номхыгъд мыхуыр кӕнын, фӕлӕ дзы уыдоны ӕппӕт ирон нӕмттӕ нӕ уыдзысты, стӕй цӕй бындурыл арӕзт ӕрцыд, уыцы фыццаггуырӕнты дӕр бирӕ рӕдыдтӕ ис. Сӕ кӕцыдӕр хай сын хъӕууонхӕдзарадон наукӕты доктор Олисаты Валодя бӕргӕ аиуварс кодта, хъӕуы ма сыл ногӕй бакусын. Фидӕнмӕ та фарста афтӕ ӕвӕрд цӕуы, цӕмӕй нӕ ахуыргӕндтӕ бакусой, зайӕгойты ӕппӕт ирон нӕмттӕ амынд кӕм цӕуой, ахӕм иллюстрацигонд ирон-уырыссаг-латинаг ботаникон дзырдуат — бӕрӕгуат рауадзыныл. Уымӕн ӕмӕ, абоны хистӕртӕй дӕр бирӕтӕ кӕрдӕджыты, къутӕрты ӕмӕ бӕлӕсты ирон нӕмттӕ нӕ зонынц.

Александр КОМЖА,

Федералон паддзахадон бюджетон кусӕндон

«Цӕгат Ирыстоны паддзахадон ӕрдзон фӕдзӕхст бынат»-ы

наукон кусӕг, биологон наукӕты кандидат

 

Агазиллис, агазиллис широколистная или кавказская — диси

Аистник — кӕсагласгӕрдӕг

Алтей, алтей лекарственный — галымӕнтӕг, галсыф, гали сифӕ

Антиринум большой или львиный зев — домбайызӕмбын, домбайы ком (дидинӕг)

Бамбук — хурхъӕз, хъӕзбӕлас, хъазӕ бӕласӕ

Безвременник великолепный — куыдзы нуры, усуни

Безвременник осенний — уазалы малусӕг

Белена, белена черная — къусбын, къосбун

Бодяк, бодяк болевой — хуымы сындз, сындзгӕрдӕг

Болиголов, болиголов пятнистый — такъуындела, хакъуындела, такъундела

Борщевик — сӕнк, зӕнк, зӕнкӕ, билбатук (билбатухъ)

Собачий борщевик — куыдзы сӕнк

Борщевик мантегацци — хуырзӕнк

Борщевик сибирский — хъӕндӕлы

Уыдзӕн ма

ОСТАВЬТЕ ОТВЕТ

Please enter your comment!
Please enter your name here