Сидахъаты Зауырбег архайдзӕн дунейы чемпионаты

0
15

Спортуарзджытӕ куыд зонынц, афтӕмӕй ацы аз уӕгъдибар хъӕбысхӕстӕй дунейы чемпионат цӕудзӕн сентябры Казахстаны сӕйраг горӕт Нур-Султаны.

Афӕдзы дӕргъы цы ерыстӕ цыди, уыдоны бӕрӕггӕнӕнтӕм гӕсгӕ, дунеон чемпионатмӕ амӕй размӕ балцӕгтӕ райстой Байаты Давид (65 кг) ӕмӕ Найфонты Артур (86 кг). Бӕрӕггонд нӕма уыдысты, 57, 74, 87 ӕмӕ 125 кг онг уӕзты чи хъахъхъӕндзӕн Уӕрӕсейы кад, уыцы богӕлттӕ.

Ивгъуыд къуырийы кӕрон Сочийы 57, 74 ӕмӕ 97 кг онг уӕзты богӕлттӕн Уӕрӕсейы иугонд командӕйы тренерты совет сарӕзта фӕлварӕн фембӕлдтытӕ. 57 кг онг уӕзы фембӕлдысты Заур Угуев ӕмӕ Арыйаан Тютрин. Сӕ ныхмӕлӕуд ахицӕн Заур Угуевы пайдайӕн 10:0 хыгъдӕй. 74 кг онг уӕзы тынг хъазуатон ныхмӕлӕуды Сидахъаты Зауырбег 2:1 хыгъдӕй фӕуӕлахиз Магомед Курбаналиевыл.

97 кг онг уӕзы дунеон чемпионатмӕ балцӕгыл тохы фембӕлдысты Байцаты Владислав ӕмӕ Олимпаг хъӕзтыты уӕлахиздзау Абдулрашид Садулаев. Ацы ныхмӕлӕуд 10:0 хыгъдӕй ахицӕн Садулаевы пайдайӕн.

Афтӕмӕй Заур Угуев (57 кг), Сидахъаты Зауырбег (74 кг) ӕмӕ Абдулрашид Садулаев райстой дунеон чемпионаты Уӕрӕсейы кад хъахъхъӕнынӕн балцӕгтӕ.

Нырма кӕронмӕ не сбӕрӕг, 125 кг уӕзы Уӕрӕсейы номӕй чи хӕцдзӕн, уыцы богал. Тренертӕ равзаринаг кӕмӕй сты, уыдонӕй иу у Хуыгаты Алан.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here