«Алани» фӕуӕлахиз

0
22

Футболӕй Уӕрӕсейы Кубок рамбулыныл ерысты 1/32 хайы Дзӕуджыхъӕуы «Алани»-йы ныхмӕлӕууӕг уыди Волгограды «Ротор».

Дзӕуджыхъӕуы стадион «Спартак»-мӕ цы 15 мины бӕрц спортуарзӕджы ӕрбацыди, уыдон сӕ зӕрдиаг сидтӕй нӕ хъазджыты разӕнгард кодтой размӕ бырсынмӕ, ӕмӕ уыдон дӕр, сӕ хъарутыл нӕ ауӕрдгӕйӕ, тырныдтой уӕлахизмӕ. Хъазт рауад тынг зӕрдӕмӕдзӕугӕ ӕмӕ цымыдисаг. «Алани» бырста ӕмӕ бырста размӕ. Суанг ма нӕ дуаргӕс Ростислав Солдатенко дӕр тырныдта нӕ размӕбырсджыты разӕнгард кӕнынмӕ.

Цакъоты Зауыр, Хӕдарцаты Батрадз, Бутта Магомедов, Сергей Крамаренко сӕ иннӕ ӕмбӕлтты ӕххуысӕй уазджыты иварон фӕзы ӕмӕ йӕ бацӕуӕнты сарӕзтой къорд тӕссаг уавӕры, фӕлӕ дӕргъвӕтин рӕстӕг пурти «Ротор»-ы хызмӕ батӕхын нӕ бакуымдта. Арӕх куыд вӕййы футболы, афтӕ та ныр дӕр рауад. Фысымтӕ ӕгӕр куы алӕгӕрстой размӕ, уӕд уазджытӕ ӕвиппайды ныббырст ацарӕзтой, ӕмӕ сӕ хъазӕг Камиль Муллин иттӕг хорз спайда кодта йӕ уавӕрӕй. Йӕ цӕфы фӕстӕ «Ротор» 25-ӕм минутыл рацыд размӕ — 1:0.

Ацы уавӕрыл фысымтӕ разы нӕ уыдысты ӕмӕ та абырстой уазджыты дуармӕ бацӕуӕнтӕм. 28-ӕм минутыл, сӕ дуар фыдбылызӕй хъахъхъӕнгӕйӕ, уазджытӕ хъазты фӕтк фехӕлдтой, ӕмӕ Хӕдарцаты Батрадз 11-метрон цӕфӕй хыгъд сӕмхуызон кодта — 1:1.

Уый фӕстӕ дӕр ма дыууӕ командӕйӕн дӕр уыди фадӕттӕ хыгъд аивынӕн, фӕлӕ хъазты фыццаг хай 1:1-ӕй ахицӕн.

Хъазты дыккаг ӕмбис рауад ноджы цымыдисагдӕр. Ногӕй та фысымтӕ атындзыдтой размӕ. Цырд ныббырстыты архайдтой цалдӕргай футболисты. Сӕ иуы 47-ӕм минутыл нӕ хъазджытӕн бантыст пурти «Ротор»-ы хызы бакъуырын, фӕлӕ йӕ тӕрхонгӕнӕг нӕ банымадта.

Уый фӕстӕ «Ротор»  йӕ дуармӕ ӕрбацӕуӕнтӕ ноджы къӕрцхъусдӕрӕй хъахъхъӕнын райдыдта, ӕмӕ «Алани»-йы ныббырстытӕн кӕронбӕттӕны   раст цӕф ныккӕнын зынӕй-зындӕр кодта. Фӕлӕ, ӕвӕццӕгӕн, уыцы бон нӕ футболисттӕ сӕ зӕрдиаг архайдӕй уӕлахизы аккаг кӕй уыдысты, ууыл сразы спортивон амондхӕссӕг дӕр, ӕмӕ 67-ӕм минутыл Бутта Магомедов 30 метры дӕрддзӕгӕй цы гол бакъуырдта, уый рауад диссаджы рӕсугъд.»Алани» фӕуӕлахиз 2:1 хыгъдӕй ӕмӕ ныр Уӕрӕсейы 2020 азы Кубок рамбулыныл 1/16 хайы йӕхи фӕзы фембӕлдзӕн премьер-лигӕйы командӕтӕ: «Краснодар», «Локомотив», «ЦСКА» кӕнӕ «Зенит»-имӕ.

Рагацау афтӕ зӕгъӕн ис, ӕмӕ нӕ футболисттӕ сӕ иузӕрдион фарсхӕцджытӕн уымӕй скодтой хорз лӕвар. Стадионы адӕм нӕ футболисттӕн сарӕзтой тыхджын къухӕмдзӕгъд. Трибунӕтӕй хъуысыдысты сӕ цӕрӕнбонӕн сидтытӕ.

Уырны нӕ, нӕ лӕппутӕ сӕ хъазт дарддӕр дӕр хуыздӕрӕй-хуыздӕр кӕй кӕндзысты, уый. «Ротор»-имӕ фембӕлд уымӕй ныфс радта. Нӕ командӕ йӕхи фӕзыл йӕ иннӕ хъазт акӕндзӕн 25 августы Астраханы «Волгарь»-имӕ. Хъазт райдайдзӕн 16 сахатыл.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here