Царды уӕз, йӕ ӕнӕнцойдзинад

0
23

Адӕймаг ӕмӕ бӕх. Фӕллойгӕнӕг ӕмӕ хайуан. Азты дӕргъы иу цӕды галтау ластой царды уӕз. Иу уыдис сӕ зын ӕмӕ ӕнцойдзинад, къаты бон ӕмӕ фӕлладуагъд. Сӕ иу фӕцудыдта, уӕд-иу иннӕ йе ‘нцой балӕууыд. Дыууӕ ӕмвӕнд-ӕмзонд лӕгау уӕхски-уӕхск. ӕмбуар ластой сӕ уӕззау уаргъ.  Кӕд иумӕ, уӕд — ӕмдыхӕй, ӕмхӕст, ӕмцыд.

Ӕрмӕстдӕр афтӕ. Фӕлӕ фӕсаджил сӕ фӕндаг. Фӕдисы хъӕр азӕлыд ӕппӕт бӕстӕйыл.  Цыфыддӕр гермайнаг фашизм ӕрбабырста Райгуырӕн бӕстӕмӕ. Бахъуыд ӕхсар ӕмӕ лӕгдзинад ныхкъуырд ын раттынӕн. Нӕлгоймаг ӕмӕ бӕх — дыууӕ хӕдзардарӕджы хъуамӕ фӕхицӕн уой. Нӕлгоймаг цӕуы фӕдисы, тугкалӕн хӕстмӕ, Райгуырӕн бӕстӕ бахъахъхъӕнынмӕ. Бӕхы ӕвджид та зайынц бинонтӕ. Дыууӕ уаргъы хӕссын ӕй бахъӕудзӕн.

Ӕмӕ ӕрхӕццӕ кӕрӕдзийӕн хӕрзбон зӕгъыны рӕстӕг. Уыцы ахсджиаг рӕстӕджы сӕ уынӕм Хетӕгкаты Къостайы номыл премийы лауреат, ГССР-йы сгуыхт нывгӕнӕг Хъотайты Григорийы конд ныв «Хӕрзбон»-ы. Куыстдзагъд нӕлгоймаг ӕмӕ бӕх мадзурайӕ лӕууынц кӕрӕдзи фарсмӕ. Зын фӕндаг ӕмӕ зӕрдӕхсайӕн рӕстӕг ӕнхъӕлмӕ кӕсы лӕгмӕ, ӕмӕ уӕззау хъуыдыты аныгъуылд. ӕруӕз ыл кодтой ӕмӕ, царды куыд уыд, афтӕ та балӕууыд йӕ бӕхы ӕнцой. Уый уыд куысты, йӕ зынты ӕмӕ тых-тухӕнты йӕ ныфс, йӕ хорз ӕмбал, йе ‘мбӕлццон, ныр ын, кӕд хӕрзбон зӕгъы, уӕддӕр ын ноджы фӕахсджиагдӕр. Йӕ бинонты, йӕ хӕдзар дарын уымӕ кӕсы, йӕ уаргъ дӕр ууыл ӕрӕнцайдзӕн. Дыууӕ уаргъы та ӕнцон хӕссӕн не сты.

Нӕлгоймаг ӕмӕ бӕх кӕрӕдзийӕн ӕнӕсым ныхӕстӕй хӕрзбон нӕ дзурынц, фӕлӕ сӕ алчидӕр хъуыды кӕны, йӕхи ӕмӕ йе ‘мбалы раз цы стыр хӕс ис, ууыл. Нывгӕнӕг сын стыр арӕхстджынӕй ӕвдисы сӕ миддунейы сагъӕс ӕмӕ катай. Хъуыдыкӕнынадӕй, дзырдӕй ӕххӕст адӕймаг ӕмӕ ӕгомыг фос? Нӕ, дыууӕ ӕмсӕр уды, иу мӕт, иу хъынцъым, иу ӕнкъарӕнтӕ сын ӕхгӕнынц сӕ зӕрдӕты дуӕрттӕ. Уый зыны сӕ цӕстӕнгасыл, цӕсгӕмттыл, сӕ лӕудыл. Зӕрдӕты уыцы ахастдзинадӕн ма ноджы иу ӕвдисӕн — фӕсте сӕм дыууӕ цӕстӕй — дыууӕ фӕрссагӕй кӕсы сӕ хӕдзар. Хъӕрмуд ӕмӕ фӕллойуарзаг бинонты хӕдзар уыд. Фӕлӕ уымӕ дӕр бакалд хӕсты уазал уылӕн. ӕмӕ нырхӕндӕг йӕ хӕстоны мӕтӕй, йӕ бинонты рисӕй.

Ацы нывы ис ӕрмӕст ӕртӕ фӕлгонцы. ӕртӕ дӕр — алыхуызӕттӕ. Сӕ равзӕрдӕй, сӕ цардӕй, сӕ хъысмӕтӕй. Фӕлӕ сӕ курдиатджын нывгӕнӕг йӕ уацмысы афтӕ ӕрбангом кодта, ахӕм ӕнкъарӕнтимӕ сӕ ныв кӕны, ӕмӕ сын фӕхицӕнгӕнӕн нал ис. Зӕгъгӕ, дзы иу нӕй, уӕд уацмысы хъуыды кӕронмӕ нӕ райхӕлдаид, кӕмдӕр къахырӕй баззадаид. ӕмӕ уӕд афтӕ тынг нӕ агаид  адӕймаджы зӕрдӕ, царды уӕз дзы нӕ банкъардтаид ӕххӕстӕй.

Царды уӕз йӕхи уӕхсчытыл раджы ӕрӕнцад курдиатджын нывгӕнӕгӕн. Хӕсты ӕмӕ хӕсты фӕстӕйы фыд азтӕ арф фӕд ныууагътой йӕ царды. Хӕрз ӕрыгонӕй йӕ сахуыр кодтой зынтӕн фӕразын, нысанмӕ цӕуын, йӕхиуыл ӕвӕлайгӕйӕ кусын. Базыдта, курдиат ӕмӕ бӕллиц ӕнӕ фыдӕбонӕй кӕй ницы сты, уый. Уый йын фадат радта 1945 азы Цхинвалы нывкӕнынады училищӕ тынг хорз бӕрӕггӕнӕнтимӕ каст фӕуынӕн. Стыр ирон нывгӕнӕг Тугъанты Махарбеджы хъомылгӕнинаджы зӕрдӕргъӕвддзинад ӕмӕ курдиатыл сӕ цӕст ӕрӕвӕрдтой ахуыргӕнджытӕ ӕмӕ йӕ баурӕдтой училищӕйы ахуыргӕнӕгӕй.

Бирӕ нӕ бафӕстиат училищӕйы Хъотайы-фырт. Дарддӕр ахуыры фӕндаг ын ӕнцой нӕ лӕвӕрдта, йӕ тырнындзинадӕн кӕрон нӕ уыд, ӕмӕ афӕдзы фӕстӕ ссис Мӕскуыйы ӕрмдӕсныйы ӕмӕ декоративон аивады институты студент. Кӕм ма уыд уымӕй амондджындӕр! Мӕскуыйы, бӕстӕйы сӕйраг горӕты хуыздӕр уӕлдӕр скъолатӕй иуы ахуыр кӕн, дӕ ахуыргӕнджытӕ — зындгонд адӕймӕгтӕ. ӕрмӕст семӕ фембӕлынмӕ дӕр бӕлгӕ кӕмӕн кодтай, уыдон! Фӕлӕ хӕсты фӕстӕ зынвадат цард йӕ дӕрзӕг къухтӕ ӕруагъта цардбӕллон ирон лӕппуйыл. ӕмӕ дыккаг курсӕй йӕхи раивын кодта Тбилисы аивӕдты академимӕ нывкӕнынады факультетмӕ. Ардӕм райгуырӕн Ирыстон хӕстӕгдӕр у, ӕмӕ цӕрынӕн фӕрӕз агурын кӕд ӕнцондӕр уаид, зӕгъгӕ.

Ахуыр кӕнын райдыдта зындгонд нывгӕнӕг, профессор Мосе Тоидзейы ӕрмадзы. Фӕлӕ йын царды уӕз, бинонты зын уавӕртӕ фадат нӕ радтой академи каст фӕуынӕн. Фӕстӕмӕ ӕрбаздӕхт училищӕмӕ ахуыргӕнӕгӕй кусынмӕ. Ахуырдзаутӕн рӕдауӕй амыдта, Мӕскуыйы, Тбилисы ӕмӕ йӕхи училищӕйы цыдӕриддӕр хорзӕй базыдта, уыдон, йӕхи фӕлтӕрддзинад. Уыцы-иу рӕстӕг ӕвӕллайгӕйӕ куыста йӕ арӕхстдзинадыл. Ахуыр кодта дӕсны нывгӕнджыты ӕрмдзӕф, цард ӕмӕ фӕлвӕрдта йӕ тыхтӕ. Дарддӕр сахуыр кӕныны хъуыды йӕ уӕгъд нӕ уагъта, фӕлӕ йын ӕрмӕст цыппар азы фӕстӕ фӕци фадат институтмӕ бацӕуынӕн.

Царды фӕлтӕрд ӕмӕ аивады арӕхстджынӕй Хъотайы-фырт 1956 азы Ленинграды аивӕдты академийы ӕнтыстджынӕй бахъахъхъӕдта йӕ дипломон куыст «Наукӕ ӕмӕ фӕллой». Йӕ ахуыргӕнӕг Г.И.Рублевы разамындӕй йӕ бацӕттӕ кодта Ленинграды метрополитены станцӕйӕн. Дипломон куыст къамисы зӕрдӕмӕ афтӕ тынг фӕцыд ӕмӕ авторӕн  радтой Нывгӕнджыты цӕдисмӕ бацӕуыны тыххӕй рекомендаци.

Цӕттӕ нывгӕнӕгӕй ӕрыздӕхт Ирыстонмӕ Григори ӕмӕ уайтагъд аныгъуылд сфӕлдыстадон куысты. Пайда кодта ирон адӕмон аргъӕуттӕ ӕмӕ таурӕгъты, уӕлдайдӕр та Нарты кадджыты сюжеттӕй. Йе ‘ргом тынг здӕхта нӕ дуджы ӕмӕ историон стыр цаутӕ ӕмӕ хъӕбатырты сурӕттӕ ӕвдисынмӕ. Архайдта Фӕскавказы ӕрыгон нывгӕнджыты равдыстыты, Мӕскуыйы ӕппӕтцӕдисон ӕмӕ Гуырдзыстоны нывгӕнджыты равдыстыты. Йӕ уацмыстӕ уыдысты фӕсарӕйнаг равдыстыты дӕр. Уӕлдай фылдӕр адӕм ын федтой ныв «Чындзхӕсджытӕ» ӕмӕ йын Санахъойы-фыртимӕ сӕ конд уацмыс «Ног къӕсӕрыл». Кӕй ӕргом нӕ аздӕхта йӕхимӕ ныв «Ирон чызг» та! Номхӕссӕн Джокондӕйау нӕм уацмысӕй кӕсы аив, хъуыдыджын, кондджын ирон чызг. Йӕ былты ӕвӕрды, йӕ цӕстӕнгасы ӕмбӕхсы ӕбӕрӕг сусӕгдзинад. Адӕймаджы нӕ фӕнды, йӕ цӕст дзы атона, уый. Иуӕй йӕ йӕ рӕсугъддзинад сайы йӕхимӕ, иннӕмӕй та афтӕ ӕнхъӕлы, куы йӕм бакӕсон, уӕд ын раиртасдзынӕн, цы зӕгъынмӕ хъавы, уый.

Хъотайы-фырты сфӕлдыстад бирӕвӕрсыг у. Ис дзы монументалон ӕмӕ бирӕфӕлгонцджын композицитӕ, портреттӕ, ӕрдзы нывтӕ, натюрморттӕ, графикон уацмыстӕ, бирӕ кодта аив фӕлгонцады куыстытӕ. Йӕ алы уацмысы дӕр ирдӕй зыны рӕстӕджы комулӕфт ӕмӕ, адӕмы зӕрдӕтӕ чи агайы, дуджы ахӕм ахсджиаг фарстытӕ, царды змӕлд, йӕ цин ӕмӕ рис. Нывгӕнӕг йӕ нывты цӕры ӕрмӕст йӕ чысыл Ирыстоны нӕ, фӕлӕ ӕппӕт бӕстӕты. ӕдзухдӕр кодта агургӕ, ногдзинады фӕндагыл тырныдта рӕстдзинадмӕ.

Хъотайты нывгӕнӕг мадау уарзта йӕ фыдыуӕзӕг: йӕ ӕрдз, йӕ адӕм, йӕ истори йын уыдысты йе сфӕлдыстады сӕйраг. Уыдонимӕ йӕ уарзондзинад ӕвдисгӕйӕ, ныв кодта йӕ зӕрдӕйы уаг ӕппӕт бӕстӕйы, дунейы адӕмтӕм, историмӕ, сӕ цардмӕ, сӕ хъысмӕтмӕ. Йӕ уацмысты уынӕм Ирыстоны истори: Аланты паддзах ӕмӕ балхон Ос-Бӕгъатыры, Ирыстоны паддзах, Гуырдзыстоны ус-паддзах Тамары мады фыд Худаны ӕмӕ йӕ ус Бурдуханы аив ӕмӕ ӕнкъарӕнджын фӕлгонцтӕй, Ирыстоны зӕхкусджыты сыстады разамонджытӕ Бега ӕмӕ Томайты Мӕхӕмӕты, зындгонд революционертӕ Дриаты Антъон ӕмӕ Харебаты Исахъы портреттӕй  нӕм азты сӕрты райхъуысы нӕргӕ дугты хъӕлӕс, гуырын нӕм кӕнынц лӕгдзинады, адӕймагдзинады ӕнкъарӕнтӕ.

Хъотайы-фырт ныв кодта Ирыстон нӕ, фӕлӕ ӕппӕт бӕстӕ дӕр сӕрыстыр кӕмӕй у, уыцы ирӕтты фӕлгонцтӕ дӕр. Йӕ равдыстмӕ бацӕуӕг адӕм-иу дзӕвгар афӕстиат сты Абайты Васойы, Плиты Иссӕйы, Кучиты Юрийы, Цыбырты Людвиджы портретты раз, сӕ фарсмӕ ирон аивады, литературӕйы, наукӕйы, дохтырты, адӕмон хӕдзарады зындгонд кусджыты, 156 азы фӕцӕрӕг Хъороты Агоры зӕрдӕмӕхъаргӕ фӕлгонцтӕ.

Курдиатджын нывгӕнӕг ирон аивадмӕ стыр хай бахаста ног дуджы цӕлхъытӕ ӕвдисӕг нывтӕй. Йӕ уацмыстӕ «Козаты Разден В.И.Ленинмӕ», «Камерӕ №7», «Планетӕйы гражданин» аккаг бынат ӕрцахстой ирон нывкӕнынады. ӕвдисы дзы дунейы фӕллойгӕнджыты фӕтӕджы цӕрӕццаг хъуыдытӕ.

Стыр лӕджы, наукон кусӕджы, хуымӕтӕг фӕллойгӕнӕджы фӕлгонц кӕнӕ сюжетон егъау уацмыс — алы ран дӕр-иу курдиатджын нывгӕнӕг бавӕрдта царды уӕз, йе змӕлд, йӕ ӕнӕнцойдзинад, йӕ цин ӕмӕ йӕ зынтӕ, йӕ абон ӕмӕ фидӕн. Уыдон мах банкъарӕм фӕлгонцты мидзӕрдӕйы хъынцъым ӕмӕ ахастдзинӕдтӕй.

Григори уыд нывгӕнӕг-патриот! Йӕ патриотизм ӕвдыста ӕрмӕст йӕ уацмысты нӕ, фӕлӕ йӕ ӕрвылбоны ӕхсӕнадон куысты дӕр: Горсоветы депутат, адӕмон университеты ректор, аивадон советы сӕрдар уӕвгӕйӕ, иудадзыг хъомыл кодта нывкӕнынады национ кадртӕ. Дӕс азы уыд Цхинвалы Тугъанты Махарбеджы номыл училищӕйы директор. Бӕрнон ӕмӕ домаг разамонӕг, рӕдау ӕмӕ зӕрдӕхӕлар  хъомылгӕнӕгӕй йӕ зыдтой йе ‘мкусджытӕ. Хуымӕтӕджы-иу ацы училищӕ каст чи фӕци, уыдон сӕ ахуыр нӕ адарддӕр кодтой Мӕскуыйы, Ленинграды, Тбилисы, Киевы ӕмӕ бӕстӕйы ӕндӕр горӕтты аивӕдты уӕлдӕр скъолаты. Дыууӕйӕ та дзы систы Паддзахадон премийы лауреаттӕ.

Царды уӕз, йӕ ӕнӕнцойдзинад, йӕ цин, йӕ рис, йӕ истори ӕмӕ нӕргӕ цыт кӕмӕй аразгӕ уыд ӕмӕ у, уыдон уыдысты Хъотайты Григорийы сфӕлдыстады темӕтӕ. Йе стыр курдиаты фӕрцы сӕ равдыста ирдӕй, зӕрдӕмӕхъаргӕйӕ. Хуызджын ахорӕнтӕй пайда кодта амалджынӕй, ӕмӕ фӕлгонцы миддуне, фӕскъӕвдайы арвыл арвӕрдынау разыны уацмысы, фӕцагайы нын не ‘нкъарӕнтӕ, схӕлбурцъ сӕ кӕны, ӕмӕ ныл куы ӕрхӕндӕг ӕнкъард хъуыдытӕ бафтауы, куы та нӕ адӕймагӕй сӕрыстыр уӕвыны ӕнкъарӕнтӕ сӕ уӕлныхты сисынц. Зын ӕмӕ цины ӕхцондзинад нын барӕвдауы нӕ зӕрдӕтӕ, бауадзы сӕ нывы, скӕны йӕ ӕнкъарӕнджындӕр, бафтауы нӕ цӕрӕццаг хъуыдытыл.

Ахӕм уыд  курдиатджын нывгӕнӕг Хъотайты Григорийы сфӕлдыстадон хъару. Советон стыр паддзахады фехӕлды фӕстӕ гуырдзиаг экстремисттӕ Хуссар Ирыстоны цы фыдгӕндтӕ кодтой, уыдӕттӕм кӕсын нал ныффӕрӕзта йӕ ӕнкъарӕнджын зӕрдӕ, ӕмӕ афонӕй раздӕр ахицӕн йӕ цардӕй.

Цгъойты Хазби

ОСТАВЬТЕ ОТВЕТ

Please enter your comment!
Please enter your name here