Уӕрӕсейы тырысайы бон

0
19

Знон Дзӕуджыхъӕуы бӕрӕг кодтой Уӕрӕсейы Паддзахадон тырысайы бон. Уый кадджын уавӕры цыдис Сӕрибары фӕзы. Бирӕ адӕм, стырӕй, чысылӕй ӕвдисӕн уыдысты хъӕлдзӕг бӕрӕгбонӕн.

Сценӕйы кӕрӕй-кӕронмӕ айтындзыдтой ӕртӕхуызон тырыса. Нӕ бирӕнацион бӕстӕйы цӕрӕг ӕппӕт адӕмты ӕнӕхӕлгӕ иудзинад, хӕлардзинад ӕмӕ ӕфсымӕрдзинадмӕ нӕ разӕнгард кӕны нӕ тырыса.

Бӕрӕгбон сарӕзта  РЦИ-Аланийы Национ ахастдзинӕдты фарстаты фӕдыл министрад.

Сӕ арӕхстджын кафт ӕмӕ зардӕй адӕмы зӕрдӕтӕ барухс кодтой нӕ республикӕйы зындгонд ӕмӕ уарзон артисттӕ, ансамблтӕ «Сӕрмӕт» ӕмӕ «Хӕхты зӕлтӕ», хъазахъхъӕгты хор, Хъӕбӕлоты Руслан, Бекъойты Вано ӕмӕ иннӕтӕ. Адӕм тыхджын къухӕмдзӕгъд кодтой  Кӕсӕг-Балхъары республикӕйы минӕвӕрттӕн — фольклорон къорд     «Хатти»-йы архайджытӕн.

— Ацы бӕрӕгбон тынг кадджын у. Нӕ Тырыса, нӕ Герб ӕмӕ нӕ Гимн нӕ бӕстӕйӕн ӕрмӕст йӕ атрибутикӕ не сты, фӕлӕ  ӕвдисынц нӕ Райгуырӕн бӕстӕйы алы фӕлтӕрты ӕнгомдзинад. ӕрыгон бӕрӕгбон у, цӕуы йыл ӕрмӕстдӕр фондз ӕмӕ ссӕдз азы. Алы  адӕймагӕн дӕр  ӕхсызгон  вӕййы, спортивон, культурон ӕмӕ ӕндӕр ерысты рӕстӕг нӕ тырыса бӕрзонд куы сисынц, уӕд. Уыцы уӕлахизтӕм Ирыстоны цӕрджытӕ дӕр хӕссынц аккаг ӕвӕрӕн, — зӕгъы РЦИ-Аланийы национ ахастдзинӕдты фарстаты фӕдыл министр Цуциты Аслан.

Гугкаты Жаннӕ

Къам систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here