Зарӕг ын амонд ӕрхаста

0
24

Ӕрдз адӕймагӕн цы курдиат радты, уый йӕхӕдӕг хъуамӕ бахсида, цӕмӕй дзы йӕ дзыллӕтӕн цин ӕрхӕсса. Номдзыд ирон оперон зарӕггӕнӕг, Цӕгат Ирыстоны адӕмон ӕмӕ Уӕрӕсейы сгуыхт артисткӕ, Котолиты Марияйӕн йӕ курдиаты ӕхсидӕн уыдис ирон адӕмон зарӕг. Йӕ райгуырӕн хъӕу Ногиры колхозы быдырты-иу колхозонтӕ фӕскуыст куы зарыдысты, уӕд-иу сӕм Мария хъусынӕй не ‘фсӕст. Фӕстӕдӕр-иу йӕ хӕдзары иунӕгӕй куы аззад, уӕд-иу ныззарыд. Йӕ зӕрдӕмӕ хӕстӕгдӕр уыдысты Алыккаты Хазбийы, Козырты Таймуразы, Дриаты Антъоны зарджытӕ. Ирон театрмӕ дӕр йӕ мадимӕ арӕх цыди. Йӕ зӕрдӕмӕ тынгдӕр цыдысты, Туаты Дауыты пьесӕмӕ гӕсгӕ ӕвӕрд спектакл «Пӕсӕйы фӕндон»-ы цы зарджытӕ уыди, уыдон, уӕлдайдӕр, Ӕхсарбеджы зарджытӕ ӕмӕ сӕ зарыди.

Астӕуккаг скъола каст куы фӕци, уӕд бацыди Дзӕуджыхъӕуы музыкалон училищӕмӕ. Ам ын йӕ арф ӕмӕ бирӕвӕрсыг зонындзинӕдтӕй рӕдау хай кодта бирӕ зарӕггӕнӕг фӕлтӕрты схъомылгӕнӕг, зындгонд педагог Фрида Нусинова.

Мӕгуыр замантӕ уыд, хӕсты фӕстӕ азты, куыд кусӕг адӕм, афтӕ ахуырдзау фӕсивӕд дӕр бирӕ хъуагдзинӕдтӕ ӕййӕфтой. Мария дӕр хуыздӕр уавӕры нӕ уыди. Йӕ ныййарджытӕ сӕ къухтӕм дӕр ма ӕмхасӕнтӕ кодтой. Марияйӕн йӕ ахуыр ӕвзӕр нӕ цыди. Фӕлӕ йӕ йӕ тыхст уавӕр ӕгӕр домын куы райдыдта, уӕд сфӕнд кодта йӕ ахуыр ныууадзын. Йӕ хъуыды училищӕйы директор Цопанаты Хаджумарӕн куы загъта, уӕд уый дӕр фӕсагъӕсхуыз. Фӕлӕ чызджы йӕ мӕты ӕвджид нӕ ныууагъта. Стипендийӕ уӕлдай ма йын радта ӕхца дӕр, стӕй йын балхӕдта къахы ӕмӕ уӕлӕйы дарӕс. Чызг фӕныфсджындӕр.

Училищӕйы фӕстӕ йӕ дарддӕр ахуыр кӕнын кӕй хъӕуы, уый йын загъта Фрида Нусинова ӕмӕ йемӕ ацыд Мӕскуымӕ Чайковскийы номыл консерваторимӕ. Уым Марияйы хъӕлӕсмӕ куы байхъуыстой, уӕд ӕй ӕнӕдызӕрдыгӕй райстой ахуыр кӕнынмӕ. Йӕ хорзы кой Ирыстонмӕ дӕр хъуысын райдыдта, ӕмӕ йын нӕ республикӕйы хицауад ӕмӕ Культурӕйы министрад снысан кодтой Хетӕгкаты Къостайы номыл стипенди. Афтӕмӕй, ӕрыгон чызгӕн йӕ ахуыры азтӕ иу иннӕйы фӕдыл азгъордтой. Паддзахадон фӕлварӕны рӕстӕг Мария куыд зары, уымӕ байхъуыста консерваторийы ректор, номдзыд композитор Александр Свешников. Арфӕ йын ракодта ӕмӕ къамисы уӕнгтӕн загъта: «Цӕй амондджын у Ирыстон, ахӕм курдиаты хицау кӕй зӕххыл райгуырд».

1958 азы Мария ссыди Дзӕуджыхъӕумӕ. Кусын райдыдта Цӕгат Ирыстоны паддзахадон филармонийы ансамблы, архайдта радиойы концертон программӕты. Нӕ республикӕйы телеуынынад куы байгом, уӕддӕр арӕх уыди музыкалон редакцийы равдыстыты уазӕг.

70-ӕм азты Дзӕуджыхъӕуы музыкалон театр куы байгом и, уӕд Марияйы цинӕн кӕрон нал уыди. Йӕ къухы дзы бафтыди ирон, уырыссаг ӕмӕ дунейы номдзыд композиторты оперӕты ӕмӕ опереттӕты зӕрдӕмӕхъаргӕ сурӕттӕ саразын: Джузеппе Вердийы «Кармен»-ы — Кармен, Чайковскийы «Евгений Онегин»-ы — Нана, Гӕбӕраты Ильяйы «Олланӕ»-йы — Олланӕ, Плиты Христофоры «Къоста»-йы — Сылгоймаг ӕмӕ бирӕ ӕндӕртӕ…

Фӕлӕ уӕддӕр Марияйы сфӕлдыстадон фӕндаг тынгдӕр баст уыди Цӕгат Ирыстоны паддзахадон филармониимӕ. Симфонион оркестримӕ концерттӕ лӕвӕрдта Мӕскуыйы, Бетъырбухы, Ростовы ӕмӕ бирӕ ӕндӕр горӕтты. Бетъырбухы паддзахадон филармонийы сценӕйы куы зарыди, уӕд ӕй фехъуыста зындгонд мызыкӕиртасӕг, УФ-йы аивӕдты сгуыхт архайӕг Жанна Дозорцева. Ӕмӕ нӕ республикӕйы уӕды рӕстӕджы культурӕйы министр Гапбаты Иванӕн загъта: «А вы знаете, что у вас в Осетии своя Надежда Обухова — Мария Котолиева есть?»

Мария, йӕ риу хойгӕйӕ, «ӕз дӕн» -гӕнгӕ размӕ нӕ цыди, фӕлӕ йӕ адӕмы раз йӕ хӕс ӕххӕст кодта уӕздан ӕмӕ аивӕй. Оперӕтӕй уӕлдай ма йӕ репертуары уыдысты: Туликовы «Райгуырӕн бӕстӕ», Дзитойты Юрийы «Ирыстон», Гуырдзыбеты Георгийы «Ирон вальс», «Мады зарӕг», Гӕбӕраты Ильяйы «Джук тур» ӕмӕ бирӕ ӕндӕр зарджытӕ ӕмӕ романстӕ …

Номдзыд ирон зарӕггӕнӕджы ном хаст ӕрцыди Советон Цӕдисы культурӕйы энциклопедимӕ. Йӕ курдиаты сусӕгдзинӕдтӕ амыдта Культурӕйы ӕмӕ аивӕдты республикон колледжты ахуырдзаутӕн, ЦИПУ-йы аивӕдты факультеты студенттӕн, Музыкалон-педагогон училищӕйы фӕсивӕдӕн, театр «Амыран»-ы артисттӕн. Ацы аивадон артдзӕстыты Мария фӕкуыста йӕ царды фӕстаг бонтӕм. Йӕ фӕстаг сулӕфты онг дӕр йемӕ ӕмдзу кодта зарӕг, Ирыстонмӕ та дардта ӕцӕг хъӕбулы зӕрдӕ.

Гасанты Валери

ОСТАВЬТЕ ОТВЕТ

Please enter your comment!
Please enter your name here