Бӕрзонд аивады хъомыс

0
34

Хетӕгкаты Къостайы уацмыстӕ дисы ӕфтауынц ӕмӕ ӕнусты  дӕргъы уарзон уыдзысты ирон литературӕ ӕмӕ поэзиуарзджытӕн, хуымӕтӕг фӕллойгӕнӕг адӕм ӕмӕ рӕзгӕ фӕлтӕрӕн сӕ аивдзинад ӕмӕ тыхы фӕрцы.

Уӕдӕ цӕй диссаг у ӕнӕмӕлгӕ поэмӕ «Фатимӕ»! Йӕ трагикон мидис, йӕ диссаджы фӕлгонцтӕй, йӕ национ хӕдхуыз, ныхмӕвӕрд сурӕттӕй цал ӕмӕ цал зӕрдӕйы банкъуысын кодта!

Фӕлтӕртӕн ныууагъта дӕнцӕгӕн ӕцӕг уарзты сыгъдӕгдзинад, рӕстӕджы мылазон тыхты ӕвирхъаудзинад, уды рӕсугъддзинад ӕмӕ ӕгъдау, зондахаст ӕмӕ ӕфсарм, лӕгдзинад ӕмӕ ныфс.

Уацмысмӕ гӕсгӕ ист аивадон киноныв «Фатимӕ» у киноаивады бӕрзонд уӕлахиз.  Дзыллӕтӕ сӕ зӕрдӕтӕм арф айстой Фӕтимӕйы трагикон фӕлгонц. Йӕ уды фарн адӕймаджы зӕрдӕ агайы тыхджын ӕнкъарӕнтӕй, ахуыр нӕ кӕны табуйаг ӕмӕ бӕрзонд уарзты мидисыл, сылгоймаджы хӕрзуддзинадыл, бӕрнон, ӕнӕхин уӕвыныл. Фатимӕ у сӕрибармӕ тырнӕг, йӕ бартыл тохгӕнӕг, ӕфсармыл хӕст, хӕрзуд ӕмӕ амондмӕ бӕллӕг ӕрыгон сылгоймаг. Уыцы миниуджытӕй хайджын кӕны мах дӕр.

Ӕнтӕф бон уазал доны хъуырттау у киноныв «Фатимӕ» зӕрдӕйӕн. Уымӕ кӕсгӕйӕ, адӕймаг йӕ хъуыдыты арф аныгъуылы, зӕрдӕ ӕнцой нал фӕзоны, йӕ хъайтартимӕ тыхсы, фӕлӕ йӕм цыдӕр рухсы цъыртт ӕрбакӕлы, рыст ӕмӕ зындзинад асыгъдӕг кӕнынц уд, уарзондзинад уӕлахизӕй, бӕрзондӕй ракӕсы, ӕмӕ лӕг зӕрдӕбынӕй арф ныуулӕфы.

Аивадон киноныв «Фатимӕ»-йӕн цард чи радта, уыцы режиссертимӕ, артисттӕ ӕмӕ оператортимӕ йӕ 40 азы юбилейы фӕдыл РЦИ-Аланийы Культурӕйы министрад 1996 азы 26 октябры Металлургты галуаны сарӕзта фембӕлд. Киноныв исджытимӕ фембӕлдмӕ ӕрбацыд бирӕ адӕм. Уыцы рӕстӕг журналисттӕм фӕзынд диктофонтӕ.  Газетӕй мын хӕслӕвӕрд уыд Фатимӕйы ролы ахъазӕг Тамарӕ Коковайӕ интервью райсын. Йӕ хъӕлӕс  ныффыссын мӕхи дӕр тынг фӕндыд.

Уӕды культурӕйы министр Уататы Бибо Ирон театрӕй цалдӕр артистимӕ ныхас кодта хицӕн уаты. Сӕ иу уыд Тӕбӕхсӕуты Балойы чызг Зӕирӕ. Ӕнхъӕлмӕ кастысты, зал адӕмӕй кӕд байдзаг уыдзӕн, уымӕ. Уататы Бибо Тамарӕ Коковаимӕ  ныхас кодта, мӕн  ауыдта  ӕмӕ мӕм дзуры:

— Бызыккон! Ӕввахсдӕр ӕрбалӕуу… Уырдыгӕй ницы  ныффысдзынӕ.

Ӕз фӕныфсджындӕр дӕн, ӕввахсдӕр бакъахдзӕф кодтон  Тамарӕ Коковамӕ ӕмӕ йӕм цалдӕр фарсты радтон.  Цӕй амондджын уыдтӕн уыцы рӕстӕг, йемӕ мын фембӕлыны ӕмӕ аныхас кӕныны фадат  кӕй фӕци, уый тыххӕй. Фарстон ӕй: куыд истой киноныв. Чи йӕ ӕрхуыдта, цал азы йыл цыд, куыд ӕгъдауӕй йын бантыст ахӕм трагикон, хӕдхуыз фӕлгонц саразын, цавӕр зындзинӕдтыл сӕмбӕлд, кӕцон у, куыд ацыд йӕ дарддӕры цард ӕмӕ ныртӕккӕ кӕм цӕры, уыдӕттӕй. Алы фарстӕн дӕр мын лӕвӕрдта бӕстон ӕмӕ бӕлвырд дзуапп. Фӕндыдис мӕ йӕ цуры фылдӕр алӕууын. Афтӕ мӕм каст, цыма Къостайӕн тугхӕстӕг бавӕййы ӕмӕ ныр дӕр Ирыстонмӕ йӕ минӕвар у. Фӕлӕ йӕ уалынмӕ фӕхуыдтой сценӕмӕ стыр къухӕмдзӕгъдимӕ.

Уыцы фембӕлды йын йӕ хъуырыл Уататы Бибо ӕркодта зӕрин бос ӕмӕ йын балӕвар кодта йӕхи хуызӕн рӕсугъд уарди — дидинджыты баст. Залы цы бирӕ адӕм бадт, уыдон сыстадысты ӕмӕ бирӕ рӕстӕг ӕмдзӕгъд кодтой сӕ уарзон артисткӕйӕн, Къостайы ӕнӕмӕлгӕ уацмысы сӕйраг роль Фатимӕйы фӕлгонц иттӕг хорз чи сарӕзта, уыцы кӕсгон чызг  Тамарӕ  Коковайӕн. Уый адӕмӕн дзырдта йӕ царды тыххӕй. Йе сфӕлдыстадон фӕндаг куыд райрӕзт,  Фатимӕйы ролы куыд ахъазыд, уый тыххӕй йӕм лӕвӕрдтой бирӕ фарстытӕ. Актрисӕ сын бӕстон дзуаппытӕ лӕвӕрдта. Дзырдта сын, йӕ ныййарджытӕ дӕр ӕмӕ йӕхӕдӕг дӕр Налцыккӕй кӕй сты, фӕлӕ ныртӕккӕ Мӕскуыйы кӕй цӕры, уый.

Уым ма   раныхас кодтой  Гулия Чохонелидзе (Ибрагим), кинонывы режиссер  Сикъо Долидзейы чызг Кетеван.  Адӕм сӕм ахӕм  лӕмбынӕг хъуыстой, ӕмӕ диссаг! Бындз куы атахтаид, уӕд ын адӕймаг йӕ базырты уынӕр фехъуыстаид!

Тамарӕ «Фатимӕ»-йы кинонывы ахъазыд, институты ма куы ахуыр кодта, уӕд. Цалдӕр мӕйы  дзы фӕцух кодта, ӕмӕ йӕ нал бауагътой фӕстӕмӕ ахуырмӕ. Уыцы рӕстӕг Мӕскуыйы кинотеатр «Ударник»-ы равдыстой киноныв «Фатимӕ». Хуынд ӕм ӕрцыдысты ГИТИС-ы ахуыргӕнджытӕ дӕр, ӕмӕ дыккаг бон театралон институты Тамарӕйы  кой куы айхъуыст, куыд стыр курдиаты хицау, афтӕ, уӕд ӕй фӕстӕмӕ бауагътой ахуырмӕ, Фатимӕйы ролы тыххӕй та йын радтой ӕппӕтцӕдисон фестивалы приз.

Гъе, ахӕм стыр ӕнтыст ӕмӕ тых ис Къостайы сфӕлдыстадӕн. Уый адӕмыл тых ӕфтауы, цардыл та — фарн. Уымӕн нӕхӕдӕг стӕм ӕвдисӕн. Хетӕгкаты Къостайы уацмыстӕй суадоны донау сӕ  дойны уадзынц ирон адӕм ӕмӕ ма суанг иннӕ адӕмтӕ дӕр. Къостайы ныстуантӕ-фӕдзӕхстытӕ баззадысты махӕн зонд ӕмӕ цардӕгъдауӕн. Адӕмы уарзт та сӕм у ӕмӕ уыдзӕн ӕгӕрон. ӕххӕст сӕ куы кӕнӕм, уӕд нӕ царды фӕндаг мигъы цӕуӕгау нӕ уыдзӕн, фӕлӕ хуры тынтыл хурмӕ цӕуӕгау.

Бызыккаты Земфирӕ

ОСТАВЬТЕ ОТВЕТ

Please enter your comment!
Please enter your name here