Хорз фӕндӕгтимӕ баст сты рӕзты нысантӕ

0
44

«Афтӕ зӕгъӕн ис, ӕмӕ фарон цыдӕриддӕр нӕ размӕ хӕстӕ ӕвӕрд уыдис, уыдон сӕххӕст кодтам. Бюджет нын цы фӕрӕзтӕ радих кодта, уыдон нысантыл сӕмбӕлдысты. Хӕрдзтӕ ӕрмӕст республикон фӕндӕгтимӕ баст нӕ уыдысты, фӕлӕ муниципалон ахадындзинадимӕ фӕндӕгтимӕ дӕр. Нӕ архайд фӕбӕрӕг ис, республикӕйы хъӕутӕ ӕмӕ горӕтты цӕрджытӕ бафиппайдтой, цалцӕггонд ӕмӕ ногарӕзт фӕндӕгты ӕмӕ хидты аивдзинад, хӕрзхъӕддзинад. Федералон программӕты архайыны охыл бацӕттӕ кодтам хӕрдзты-проектон документаци ӕмӕ бавнӕлдтам 12 национ проекты ӕххӕст кӕнынмӕ. Ӕрмӕст Дзӕуджыхъӕуы ныртӕккӕ 40 уынджы цӕуынц арӕзтадон-цалцӕггӕнӕн куыстытӕ», — знон дзыллон хабархӕссӕг фӕрӕзты кусджытимӕ фембӕлды рӕстӕг  республикӕйы фӕндӕгты хӕдзарады комитеты сӕрдар Солиты Тариэль бӕстон ӕрныхас кодта сӕ бирӕвӕрсыг архайдыл.

Солийы-фырт куыд бамбарын кодта, афтӕмӕй сӕ сӕйрагдӕр хӕс у фӕндӕгты хӕрзхъӕддзинад фӕхуыздӕр кӕнын. Уый домы стыр куыст, сӕ бӕрнондзинад ӕмбарынц ӕмӕ афтӕмӕй балӕууыдысты бирӕ вазыгджын хъуыддӕгтыл. «Нӕ бон бацис кредитон хӕстӕй фервӕзын, уый фӕрцы куыстӕххӕстгӕнӕг организациты бауырныдта, сӕ фӕллойӕн афойнадыл мызд кӕй райсдзысты, уый. Ныртӕккӕ фӕндӕгтӕ, хидтӕ чи аразы, цалцӕг сӕ чи кӕны, уыцы куыстуӕттимӕ къуылымпыдзинӕдтӕ не ‘ййафӕм. Хӕсджын кӕй нӕ вӕййӕм сӕ разы, уый сын аивта сӕ ахаст куыстмӕ. Раздӕр фӕндӕгты арӕзтадмӕ чи не ‘внӕлдта, уыдон дӕр ацы къабазмӕ рахызтысты. Куыстыты хӕрзхъӕддзинадмӕ тынг лӕмбынӕг кӕй кӕсӕм, уый зындгонд у, куыдфӕндыйы ахаст чи ӕвдисы, ахӕм куыстӕххӕстгӕнӕг организациты тендертӕм нал уадзӕм», — загъта комитеты сӕрдар.

Бӕрнон адӕймаг куыд радзырдта, афтӕмӕй, хорз фӕндӕгтӕ цы ран ис, уым экономикӕйӕн ӕнӕ рӕзгӕ нӕй. Ӕнӕхъуаджы хӕрдзтӕ дзы фӕкъаддӕр вӕййынц, фӕндаггон бастдзинад фадат радты базарадон ахастдзинӕдтӕн, туризмӕн. Уыдӕттӕ иумӕйагӕй фӕбӕрӕг вӕййынц экономикӕйы рӕзтыл. «Фӕндӕгтӕм зилыны хъуыддаг у дӕргъвӕтин, куыд уынӕм, афтӕмӕй транспорты нымӕц фылдӕрӕй-фылдӕр кӕны. Фӕндӕгтыл стырдӕр уӕз ӕрӕнцайы, хӕлынц, фӕзыны дзы дзыхъхъытӕ. Ӕппынӕдзух сын бӕрӕг кӕнӕм сӕ уавӕртӕ ӕмӕ сӕ цалцӕг кӕнӕм.  Сусӕггаг нӕу, фылдӕр уӕз сӕхимӕ исынц республикон нысаниуӕгимӕ фӕндӕгтӕ, уымӕ гӕсгӕ уал уыдонӕй райдыдтам», — бафиппайдта Солиты Тариэль.

Комитеты сӕрдар куыд радзырдта, афтӕмӕй цӕрджыты тынг тыхсын кӕнынц, хъӕутӕ ӕмӕ горӕтты астӕуты  цы федералон фӕндӕгтӕ цӕуынц, уыдон. Фӕндӕгты хӕдзарады ведомствӕ ацы фарстмӕ йӕ хъус рагӕй дары, ӕмбӕлгӕ документтӕ бацӕттӕ кӕны. Уыдоны бындурыл райсынц хъӕутӕ ӕмӕ горӕтты иувӕрсты цӕуӕг фӕндӕгтӕ саразынӕн ӕхца. Ахӕм фарст республикӕйы разамынды раз ӕвӕрынц Михайловскы, Мичурины хъӕуты, ӕрхонкӕйы станицӕйы цӕрджытӕ. Ныридӕгӕн уал Уӕрӕсейы Автомобилон фӕндӕгты управленийӕ райстой 200 милуан сомы, сбӕрӕг кӕндзысты куыстытӕ ӕххӕстгӕнӕг организаци ӕмӕ бавналдзысты Мичурины хъӕуы иувӕрсты цӕуӕг фӕндаг аразынмӕ. Уыцы хъуыддӕгтимӕ бирӕ фӕзилӕнтӕ баст сты. Зӕгъӕм, комитеты бӕрны ис 158 хиды, уыдонӕй ӕрмӕстдӕр 10 сты нывыл уавӕры. Иннӕтӕ арӕзт ӕрцыдысты 60-ӕм азты, хъӕуы сӕм базилын, кӕмдӕр ногтӕ саразын.

Ныртӕккӕ Фӕндӕгты хӕдзарады комитеты размӕ цы стыр хъуыддӕгтӕ лӕууы, уыдоныл ӕнӕрынцойӕ архайынц, хӕрзхъӕддзинад нӕ рохгӕнгӕйӕ. Солиты Тариэль куыд загъта, афтӕмӕй фӕндӕгтӕ сты алыхуызон нысаниуӕджы, фӕлӕ хъуамӕ дзуапп дӕттой ӕдасдзинады домӕнтӕн. Хорз цалцӕггонд фӕндагыл ма хъуамӕ уа ӕмбӕлгӕ тӕлмытӕ, амонӕнтӕ, йӕ фӕйнӕ- фӕрсты — нысантӕ. Республикӕйы фараст муниципалон сконды фӕндӕгтӕн дзуапп дӕттынц фараст куыстӕххӕстгӕнӕг организацийы. Уыдон сӕм зилынц, дзуапп дӕттынц сӕ сыгъдӕгдзинадӕн, ӕдасдзинадӕн. «Сусӕг дӕр ӕй ничиуал кӕны, афтӕмӕй адӕм давынц, фӕндӕгты фӕрсты цы нысантӕ сагъд ис, уыдон. Ӕвӕццӕгӕн сӕ уыцы хӕтӕлтӕ бырутӕ кӕнынмӕ бахъӕуынц, фӕлӕ афтӕ ничи ахъуыды кӕны, мӕнӕ ацы гакъон-макъон фӕндагыл чидӕр талынджы цӕудзӕн, амонӕн нысан дзы нӕ уыдзӕн, ӕмӕ уый расайдзӕн фыдбылыз. Иуцасдӕр рӕстӕджы размӕ ахӕм ӕнамонд хабар ӕрцыд Куырттаты комы, амонӕн нысан чидӕр адавта, фӕзилӕны машинӕ былӕй ахауд, шофыры дыууӕ боны фӕцагуырдтой. Ахӕм митӕ чи кӕны, уый хъуамӕ арф ахъуыды кӕна. Иннӕ бӕллӕх та, канализацион люкты сӕртӕ кӕй давынц, уый у. Алы бон дӕр дзы уыйбӕрц адавынц, ӕмӕ нын не ‘нтысы уайтагъд сӕ ногӕй сӕхгӕнын», — загъта комитеты разамонӕг.

Хицӕн ныхас бацахста Мӕздӕджы районы фӕндӕгтӕ аразыны, цалцӕг сӕ кӕныны фарст. Ацы аз уыцы нысанӕн дихгонд ӕрцыд 200 милуан сомы. Солийы-фырт куыд бафиппайдта, афтӕмӕй Мӕздӕгмӕ комкоммӕ фӕндаг саразын абарӕн ис Ручъы тъунелы байгомимӕ. Горӕты мидӕг дӕр ныртӕккӕ 40 фӕндаджы цалцӕггонд цӕуынц. Уӕдӕ Мӕздӕг Кӕсӕг-Балхъары республикӕ ӕмӕ Стъараполы крайы хъӕутӕ ӕмӕ горӕттимӕ цы фӕндӕгтӕ бӕттынц, уыдонмӕ дӕр  бавнӕлдтой цалцӕг кӕнынмӕ, аразынмӕ. Афтӕ зӕгъӕн ис, ӕмӕ комитеты сӕрдар республикӕйы хъӕуты  ӕмӕ горӕтты фӕндӕгты уавӕр зоны иттӕг хорз, ныртӕккӕ дзы куыстытӕ кӕмыты цӕуы, цал километры дзы баивдзысты, цал хиды, бахизӕны, уыдӕттӕ нымадта ӕнӕкъуылымпыйӕ.

Федералон ӕмӕ республикон бюджеттӕй Дзӕуджыхъӕуы фӕндӕгтӕн дихгонд ӕрцыд 515 милуан сомы. «Цӕмӕй нӕ сӕйраг горӕты фӕндӕгтӕ ӕмхуызон лӕгъз, фадатджын, ӕдас суой, уымӕн бахъӕудзӕн 10 азы бӕрц. Ныр та алы аз дӕр цалцӕг кӕндзыстӕм фӕндӕгтӕ. Ӕрмӕст Дзӕуджыхъӕуы нӕ, фӕлӕ районты дӕр арӕх афтӕ рауайы, ӕмӕ нӕ зӕрды вӕййы фӕндаг кӕрӕй-кӕронмӕ рацаразын. Бӕстон куы ‘ркӕсӕм, уӕд равзарӕм, сӕ донуадзӕн хӕтӕлтӕ ивинаг кӕй сты, уый. Уымӕ гӕсгӕ ранӕй-рӕтты куыстытӕ бауромӕм, цӕмӕй уал доны инфраструктурӕ банывыл кӕной, уый тыххӕй», — загъта Солиты Тариэль.

Пресс-конференцийы архайдтой районты газетты минӕвӕрттӕ дӕр, уыдон сӕ фарстытӕ раттыны агъоммӕ дзырдтой, сӕ хъӕуты, сӕ горӕтты фӕндӕгтыл хорзӕрдӕм цы ивддзинӕдтӕ ӕрцыд, уый тыххӕй. Бузныг загътой, комитеты кусджытӕ ӕмӕ куыстытӕ ӕххӕстгӕнӕг организацитӕн.

Фӕндӕгты хӕдзарады ведомствӕйы разамонӕг куыд бацамыдта, афтӕмӕй нӕ республикӕ хъӕздыг у фӕндӕгтӕ аразынӕн ӕмӕ цалцӕг кӕнынӕн хъӕугӕ арӕзтадон ӕрмӕджытӕй, хомагӕй. «Махмӕ цы хуыр ис, уымӕн ӕмбал нӕй, агурынц ӕй ӕндӕр регионтӕй дӕр. Цы змис нӕм ис, уый ма бахъӕуы ноджыдӕр ӕрыссын, цӕмӕй ахӕм куыстытӕн сбӕзза, уый тыххӕй. Электрон тых, газ ӕмӕ битумӕй уӕлдай никӕцӕй ницы ласӕм, алцыдӕр нӕхимӕ ис. Фӕзынд нӕм ахӕм нырыккон асфальтуадзӕн заводтӕ, ӕмӕ сахатмӕ дӕттынц 120 тоннӕйы. Канд  нӕхи фаг нӕу, ӕндӕр рӕттӕм дӕр ӕй уӕй кӕнынц. Нырыккон домӕнтӕ хынцгӕйӕ, пайда кӕнынц арӕзтадон ӕрмӕгыссӕн агрегаттӕй. Афтӕ зӕгъӕн ис, ӕмӕ нӕ арӕзтадон ӕрмӕг у хӕрзхъӕд, уый бӕрӕг дары фӕндӕгты уавӕрӕй дӕр», — фӕбӕрӕг кодта Солийы-фырт.

Куыд ма бацамыдта, афтӕмӕй, Мӕздӕгмӕ комкоммӕ фӕндаг саразын кӕд вазыгджын хӕс у, уӕддӕр сӕ ныхас нӕ фӕсайдзысты ӕмӕ йӕ сараздзысты 2020 азы 1 декабрмӕ. Куыстыты хӕрзхъӕддзинадмӕ ӕхсӕвӕй-бонӕй сӕ цӕст дарынц 16 специалисты, уыдон кӕсынц арӕзтадон ӕрмӕджыты скондмӕ дӕр. Солиты Тариэль бӕстон дзуаппытӕ радта ӕппӕт фарстытӕн дӕр, фӕбӕрӕг кодта, ацы ӕмӕ иннӕ аз цы хъуыддӕгтыл кусдзысты, уыдӕттӕ. Куыд радзырдта, афтӕмӕй ацы аз Фӕндӕгты хӕдзарадыл сӕххӕст уыдзӕн 80 азы, уый ӕвдисы йӕ архайды ахадындзинад. Цы стыр хъуыддӕгты тыххӕй фӕзынд ацы структурӕ, уыдон абон дӕр сты ахсджиаг ӕмӕ хъӕугӕ.

Пресс-конференци амыдта РЦИ-Аланийы Сӕргълӕууӕджы ӕмӕ Хицауады пресс-службӕйы разамонӕг Сӕбанты Фатимӕ.

Бутаты Эльзӕ

ОСТАВЬТЕ ОТВЕТ

Please enter your comment!
Please enter your name here