Цӕголты Георгийы докладмӕ «Ирон ӕмдзӕвгӕты арӕзты тыххӕй»

0
32

Фыццаг мыхуырон ныхас ирон ӕмдзӕвгӕйы арӕзты тыххӕй загъта Цӕголты Георги. Уый доклад скодта ирон историон-филологон ӕхсӕнады, стӕй йӕ ныммыхуыр кодта «Ирон бӕстӕзонӕн институты хъусынгӕнинӕгтӕ», зӕгъгӕ, уым. Цӕголты Георги йӕ удӕй бацыд, фӕлӕ дзӕгъӕлы йӕхи хъары, ирон ӕвзаджы тонон стихарӕзт нӕй, зӕгъгӕ, ууыл. Йӕ хъуыдымӕ гӕсгӕ, ирон ӕвзаджы цыбыр хъӕлӕсонтыл цавд нӕ хауы, цавд сыл куы хауа, уӕддӕр дӕргъвӕтин не свӕййынц, дӕргъвӕтин хъӕлӕсонтӕн та се ‘рдзы кондмӕ гӕсгӕ ӕмхуызон уӕвын сӕ бон нӕу.

Уырыссаг ӕвзаджы цавд ӕдзухдӕр хауы дӕргъвӕтин хъӕлӕсоныл, ӕмӕ, ӕвӕццӕгӕн, Цӕголты Георгийы уый рӕдийын кӕны. Уырыссаг ӕмӕ ирон ӕвзӕгтӕ кӕрӕдзиуыл кӕй бары, уымӕн афтӕ у. Ӕмӕ уӕд Цӕголы-фырт дыууӕ хатты рӕдийы: фыццаджыдӕр, хицӕн цауӕн лӕвӕрд ӕрцӕуы иумӕйаг нысан, дыккаджы та йын цавд ӕмӕ даргъад  свӕййынц иу ӕмбарынад. Иу дӕр ӕмӕ иннӕ дӕр логикӕйы закъонты ныхмӕ у. Кӕд уырыссаг ӕвзаджы цавд ӕнӕфӕхицӕнгӕнгӕ у хъӕлӕсонты дӕргъвӕтиндзинадимӕ ӕмӕ йӕ иу кӕны цыбыр хъӕлӕсонтимӕ, уӕд уый ууыл дзурӕг нӕу, ӕмӕ иннӕ ӕвзӕгты дӕр афтӕ у. Ирон ӕвзаг уыцы хъуыддаджы уырыссаг ӕвзагимӕ ныхмӕвӕрд у — ам цыбыр хъӕлӕсонтӕн, дӕргъвӕтин не суӕвгӕйӕ, сӕ бон у, ӕмӕ сыл цавд хауа. Ӕмдзӕвгӕйы бӕрцы — дӕргъвӕтин хъӕлӕсоны миниуӕг ӕххӕстгӕнгӕйӕ, йе ‘мхуызӕттӕм, ӕнӕцавдон цыбыр хъӕлӕсонтӕм гӕсгӕ; дӕргъвӕтин хъӕлӕсонтӕ та, цыбыр хъӕлӕсонты ӕмхуызон не суӕвгӕйӕ, сӕ бон у цыбыр хъӕлӕсонты хуызӕн уӕвын, канд цавдон дӕргъвӕтин хъӕлӕсонтӕм гӕсгӕ нӕ, фӕлӕ цавдон цыбыр хъӕлӕсонтӕм гӕсгӕ дӕр.

Ам ис, Цӕголы-фыртӕн йӕ бон ахизын кӕм нӕ баци, уыцы къуырцдзӕвӕн. Дӕлдӕр уый равдисдзыстӕм, фӕлӕ цы фарстыл дзурӕм, уый цӕмӕй растдӕр сбӕлвырд кӕнӕм, уый тыххӕй сбӕрӕг кӕнӕм  дӕргъад, цыбырад ӕмӕ цавды ӕмахастдзинад. Дӕргъад ӕмӕ цыбырад дыууӕ алыхуызон миниуӕджы сты ӕмӕ иу рӕстӕджы иу предметы нӕ иу кӕнынц. Дӕргъад ӕмӕ цыбырад сты рӕстӕг ӕмӕ тыгъдады, цавдмӕ нӕ кӕсгӕйӕ. Цавд сын нӕ комы йӕ дӕлбар уӕвын. Афтӕмӕй Цӕголты Георгимӕ дӕргъад, цыбырад ӕмӕ цавды ӕмахастдзинады тыххӕй цы хъуыды ис, уый ӕнӕбындур у. Фӕлтӕрддзинад у куырыхон тӕрхонгӕнӕг. Ӕркӕсӕм-ма, цы нын зӕгъы уый та.

Комы уад дзыназы…

Ацы ӕмдзӕвгӕ у хорейӕ фыст, ӕмӕ ницӕмӕй хицӕн кӕны уырыссаг хорейӕ, уымӕн ӕмӕ цавдонтӕ сты дӕргъвӕтин хъӕлӕсонтӕ, ӕнӕцавдонтӕ та — цыбыр хъӕлӕсонтӕ.

Мӕй нывӕнды тын къӕдзӕхтыл…

Ацы ран сӕмбырд сты ӕрмӕст цыбыр уӕнгтӕ. Бафӕлварӕм иу минут Цӕголы-фыртимӕ сразы уӕвыныл, ома, цыбыр хъӕлӕсонтыл цавд нӕ фӕхауы, зӕгъгӕ, чи хъуыды кӕны. Уӕд, цы хъуыдыйад ӕвзарӕм, уым иу хъӕлӕсон дӕр нӕй, ӕмӕ йӕ хъуамӕ ӕнӕ цавдӕй кӕсӕм. Уымӕн та уӕвӕн нӕй. Кӕд хатт, исты ирон ныхас зӕгъгӕйӕ, махӕн зын вӕййы кӕцыдӕр уӕнгыл цавд сӕвӕрын, уӕд афтӕ  ӕнӕхъӕн хъуыдыйадӕй зӕгъӕн нӕй.

Кӕд, иннӕ дзырдтимӕ баст нӕ уӕвгӕйӕ, дзырдӕн йӕхиуыл цавд нӕ хауы, уӕддӕр хъуыдыйады уӕнг куы свӕййы, уӕд тырны цавдмӕ. Афтӕ ацы хъуыдыйадӕн дӕр, ныхасы закъонтӕ нымайгӕйӕ, — хъӕлӕс фӕбӕрзонддӕр ӕмӕ фӕныллӕгдӕр кӕнын, хъуамӕ уа йӕхи цавды бынӕттӕ. Куы йӕ фӕдихтӕ кӕнӕм, уӕд дзы рауайдзӕн хорейӕ арӕзт ӕмдзӕвгӕ:

Мӕй ны / вӕнды / тын къӕ / дзӕхтыл…

Ацы ран дӕргъвӕтинты хӕс, ӕнӕцавдон цыбыртӕм гӕсгӕ, ӕххӕст кӕнынц цавдон цыбыртӕ. Тыхӕй сӕ цавды бынмӕ ницы кӕны. Хорейы бартӕ къахыргонд нӕ цӕуынц, ритм  йӕ бынаты ис. Уый фенӕн ис, ӕрмӕст дӕргъвӕтинтӕ куы сӕмбырд вӕййынц, уӕддӕр:

Нaл у / aбoн / уазaл, / / нaл…

Иунӕг цыбыр хъӕлӕсон дӕр нӕй ацы ӕмдзӕвгӕйы, фӕлӕ йӕ уый хорей уӕвынӕн ницы хъыгдары. Уым цыбыр хъӕлӕсонты хӕстӕ, цавдон дӕргъвӕтинтӕм гӕсгӕ, ӕххӕст кӕнынц ӕнӕцавдон дӕргъвӕтин хъӕлӕсонтӕ. Зӕгъын хъӕуы уый, афтӕ нӕ аивынц ӕмӕ ӕрдзон цыбыртимӕ ӕмдых уой. Фӕлӕ уыцы фӕзынд ӕцӕгӕлон нӕу уырыссаг ӕвзагӕн дӕр:

Был нa / кaзaн / злой пa / лaч…

Ацы ран дыккаг бӕрцы ӕнӕцавдон хъӕлӕсон «а» хъуысы ирон «ӕ»-йы хуызӕн цыбыр. Афтӕ зӕгъӕн нӕй стихы ӕртыккаг бӕрцы ахӕм хъӕлӕсоны тыххӕй дӕр, уымӕн дӕр ис ӕнӕцавдоны нысаниуӕг. Ӕцӕгӕйдӕр, «пӕлач» кӕсӕн нӕй «палач»-ы бӕсты. Афтӕ йӕ куы кӕсиккам, уӕд нӕ зылын кӕниккой, уырыссаг дзырдтӕ зыгъуыммӕ кӕнынц, зӕгъгӕ. Уырыссаг хъӕлӕсон ирон хъӕлӕсоны хуызӕн  вӕййы,  ирон хъӕлӕсон ӕнӕцавдон куы уа, уӕд.

Ныр та ӕркӕсӕм, ӕмдзӕвгӕйы бӕрцтӕ хӕццӕ куы вӕййынц, уымӕ:

Дӕ мaд / aу бa / уaрзтaй / нӕ бӕс / тӕ…

Ацы ямбӕй фыст рӕнхъ у ӕмхӕсты хуыз, цы ӕртӕ ӕмдзӕвгӕйы хуызыл дзырдтам, уыдонӕн.

Ацы ямбӕй фыст ӕмдзӕвгӕ фыццаг ӕртӕйӕн у ӕмхӕсты хуыз — цавдон дӕргъвӕтин ӕмӕ цавдон цыбыр (фыццаг ӕмдзӕвгӕйы бӕрц), дӕргъвӕтинтӕ куы ӕрӕмбырд вӕййынц (дыккаг ӕмӕ ӕртыккаг бӕрц). Кӕд уыдонӕй алкӕцы дӕр хицӕнӕй тонон ӕмдзӕвгӕйы закъонты ныхмӕ нӕу, уӕд тониконы ныхмӕ нӕ уыдзӕн ай дӕр, кӕцы сын рабӕрӕг кӕны сӕ хӕццӕ — иугонд хуыз. Ӕмӕ ма иу дӕнцӕг — ӕмдзӕвгӕйы бӕрцы цавдон уӕнг, ӕнӕцавдон дӕргъвӕтинмӕ гӕсгӕ ӕххӕст кӕны цыбыр хъӕлӕсон:

Дaрд у мӕ / фӕндaг, зӕ / гъын дын хӕрз / бон…

Ацы дактилӕй фыст ӕмдзӕвгӕйы дыккаг бӕрцы астӕуккаг ӕнӕцавдон хъӕлӕсоны размӕ лӕууы цавдон цыбыр уӕнг. Афтӕ гӕнӕн нӕй Цӕголы-фырты хъуыдымӕ гӕсгӕ, уый та цӕуы ирон ӕвзаджы иуӕй-иу миниуджытӕй: ӕмдзӕвгӕйы бӕрцы хъӕлӕсонтӕ куы фембӕлынц — цавдон цыбыр ӕмӕ ӕнӕцавдон дӕргъвӕтин — алкӕцыдӕр дзы тырны йӕ хӕдбардзинад бахъахъхъӕнынмӕ. Фӕлӕ фарст ӕвӕрын хъӕуы ӕндӕр хуызы: «Уый тоникон ӕмдзӕвгӕмӕ исты бар дары?» Тоникон стихарӕзты бындур у, уӕнгтыл цавд куы фӕцӕуы, уӕд уый ӕмдзӕвгӕйы бӕрцы цавдоны хӕс цыбыр хъӕлӕсон куы ‘ххӕст кӕна, уӕд тоникон ӕмдзӕвгӕйы бартӕ нӕ къахыр кӕнынц — ирон ӕвзаджы уӕнгтыл цавд хъӕлӕсонты дӕргъад ӕмӕ цыбырмӕ нӕ кӕсгӕйӕ. Фӕлӕ цыбыр ӕмӕ дӕргъвӕтин хъӕлӕсонты фембӕлгӕйӕ, цавд ӕдзухдӕр дӕргъвӕтин хъӕлӕсоныл куы фӕуайы, уӕд ӕмдзӕвгӕ уымӕй рамбулы — фӕрогдӕр вӕййы. Ныр та ма адӕмон сфӕлдыстадмӕ ӕркӕсӕм:

«Къуӕтти, / къуӕтти / къуӕзӕ / нӕг, (—  )

Ухстй / фийбӕл / дӕ зӕ / нӕг». (—  )

«Айс ӕй, / aнaз / ӕй».

Фыццаг дыууӕ ӕмдзӕвгӕйы сӕвзӕрдысты Чырыстонхъӕуы фӕсивӕды ‘хсӕн, фехъуыстой сӕ иу гуылӕвзаг лӕппуйӕ, ӕртыккаг — ирон фынджы зарӕгӕй. Цы уынӕм мах? Адӕмон сфӕлдыстадӕй ист сты хорейӕ арӕзт ӕмдзӕвгӕтӕ. Фыццаг дыууӕ ӕмдзӕвгӕйы фембӕлдысты ӕрмӕст цыбыр хъӕлӕсонтӕ, ӕртыккаджы — хӕццӕйӕ. Ӕмӕ уый хуымӕтӕджы нӕу. Ирон адӕмон сфӕлдыстад тырны, сӕйрагдӕр йӕ зарджыты, тоникон ӕмдзӕвгӕмӕ. Ӕмӕ Къоста, йӕ бӕрзонд аивадон сфӕлдыстад тоникон ӕмдзӕвгӕмӕ здахгӕйӕ, раст уыд. Уыцы хъуыддаджы фӕзмы Пушкин ӕмӕ Лермонтовы, зӕгъгӕ, йӕ Цӕголты Георги кӕй зылын кӕны, уымӕй тынг рӕдийы.

Уадзимистӕ, Дзӕуӕгъигъӕу, 2005

ОСТАВЬТЕ ОТВЕТ

Please enter your comment!
Please enter your name here