Ӕхсӕрдзӕнты хъазт

0
24

Сӕрды мӕйты ӕмӕ рагуалдзӕджы нӕ хӕххон цӕугӕдӕттӕ вӕййынц уӕлдай фыдуагдӕр. Ӕмӕ уый ӕнӕзонгӕ нӕу махӕй алкӕмӕн дӕр. Хуры судзгӕ тынтӕм цъититӕ дон фестынц, ӕмӕ суадӕттӕ урс сахатӕй ныййарц вӕййынц дурджын фӕндӕгтыл. Ахӕм ныфсхаст сты, ӕмӕ, цыфӕнды сӕрсӕфӕн къардиу куы разыны сӕ рӕзмӕ, уӕддӕр сӕхи фехсынц уыцы бӕрзондӕй, ӕмӕ нӕм рауайы доны алӕмӕты фӕзынд — ӕхсӕрдзӕн.

Рагӕй дӕр адӕм дис кӕнынц ӕрдзон ӕхсӕрдзӕнты рӕсугъддзинадыл. Махмӕ фыццаг хатт чи вӕййы, уыцы уазджыты ӕхсӕрдзӕнты хъазт  ӕнахуыр хъуыдытыл бафтауы. Ӕцӕгдӕр, нӕ хӕхбӕстӕ у, ӕхсӕрдзӕнтӕ бирӕ кӕм ис, ахӕм ран. Ӕппӕты стырдӕртӕ вӕййынц цъититӕм ӕввахс.

Зӕгъӕм, Адайгомы цӕугӕдон Адайгомы доны галиу къабазы ис ӕрнӕджыгомы ӕхсӕрдзӕн. Уый тӕссаг къӕдзӕхӕй йӕхи раппары 150 метры бӕрзӕндӕй ӕмӕ ӕртӕ хатты йӕхи ныццӕвы айнӕг дуртыл. Цӕгат Ирыстоны нӕ, фӕлӕ ӕндӕр рӕтты дӕр зындгонд сты Мидӕгрӕбыны алӕмӕты ӕхсӕрдзӕнтӕ. Хонынц ма сӕ ӕхсӕрдзӕнты дӕлвӕз дӕр, ӕмӕ ис Джызӕлдоны райдайӕнты Мидӕгрӕбындоны рахиз къабазы. Бӕрзонд айнӕг къӕдзӕхӕй кӕй хауынц, уымӕ гӕсгӕ адӕймагмӕ афтӕ фӕкӕсы, цыма ӕнӕсцухӕй арвы цъӕхӕй ӕнхъӕвзынц. Фыцгӕ, урсфынккалгӕ сахатӕ дарддӕр хауынц коммӕ, ӕмӕ дзы рауайы цалдӕр ӕхсӕрдзӕны.

Цӕугӕдон Мидӕгрӕбындонӕй скӕсӕнӕрдӕм та ис Зӕйгӕлӕны цъити. Ардыгӕй райдайы джимарайаг ӕхсӕрдзӕнты ӕппӕты стырдӕр — хауы 230 метры бӕрзӕндӕй. Хӕресы ӕхсӕрдзӕн та ссардзыстут Дыгургомы, Къуссуйы хъӕуы ӕдде Хӕресыдоны — Галдоридоны ӕппӕты стырдӕр галиу къабазы. Ахӕм хъӕр кӕны, доны лыстӕг ӕртӕхтӕ уӕлдӕфы афтӕ ныппырх вӕййынц, ӕмӕ адӕймаг фенхъӕлы, цыма доны сахатӕ уӕларвӕй хауынц.

Диссаджы рӕсугъд сты Таймазы ӕхсӕрдзӕнтӕ дӕр. Уыдон та фенӕн ис «Ростсельмаш»-ы базӕйӕ дыууӕ километры фалдӕр хуссарӕрдӕм. Цӕст сӕм кӕсынӕй нал фефсӕды, ӕмӕ адӕймагмӕ ӕнӕферохгӕнгӕ ӕнкъарӕнтӕ сӕвзӕры. Кӕрӕдзийӕ 150-200 метры дарддӕр цъититӕ ӕнхъӕвзынц цыппар ӕхсӕрдзӕны. Туристтӕ ӕмӕ, Дыгургомы фыццаг хатт чи вӕййы, уыдон сӕм фӕцӕуынц уынӕг. Ныгуылӕйнаг ӕхсӕрдзӕнмӕ ӕввахс та ис ӕвзалытуаг суары гуырӕн.

Ӕрдз ирд ахорӕнтӕ нӕ бавгъау кодта ӕрӕфы рӕстӕгмӕйы ӕхсӕрдзӕнтӕн дӕр. Уыдон урс ӕндӕхтӕй фӕхауынц ацы цӕугӕдонмӕ, ӕмӕ райдзаст бон, ӕвзист ӕндӕхтау, тыбар-тыбур фӕкӕнынц хуры тынтӕм. Ахӕм нывӕфтыд вӕййынц Суададжы доны ӕмӕ Цъӕхцадыкомы доны ӕхсӕрдзӕнтӕ дӕр. Цы дон дзы хауы, уый ӕвӕджиауы хорз у нуазынӕн. Пайда дзы кӕнынц горӕт Алагиры ӕмӕ йӕ алыварс хъӕуты цӕрджытӕ.

Уӕдӕ Ходы комы ӕмӕ Цъӕйы комы ӕхсӕрдзӕнтӕ дӕр адӕймаджы дисы ӕфтауынц сӕ диссаджы ӕрдзон хицӕндзинадӕй. Иуныхасӕй, ӕхсӕрдзӕнтӕ канд хӕхбӕсты ӕрдзон рӕсугъддзинад не сты, фӕлӕ ма йӕ абухгӕ тугдадзинтӕ дӕр. Фӕнды нӕ, цӕмӕй кӕддӕриддӕр парахатӕй ӕнхъӕвзой айнӕг къӕдзӕхты сӕрӕй.

Дзыныхты Аленӕ,

РЦИ-Аланийы ӕрдзон ӕвӕрӕнтӕ ӕмӕ экологийы министрады пресс-службӕ

ОСТАВЬТЕ ОТВЕТ

Please enter your comment!
Please enter your name here