Фӕсивӕдон политикӕйы ахсджиаг фарстытӕ

0
12

РЦИ-Аланийы сӕрмагонд информацион проект «ӕргом хицауад»-ы фӕлгӕты знон дзыллон хабархӕссӕг фӕрӕзты минӕвӕрттимӕ фембӕлд Цӕгат Ирыстоны Фӕсивӕды хъуыддӕгты фӕдыл комитеты сӕрдар Джусойты Руслан. Уый бӕстон радзырдта ведомствӕйы архайды тыххӕй.

— Нӕ куысты сӕйраг нысаныл нымайӕм, цӕмӕй ӕппӕт фӕсивӕд дӕр архайой  республикӕйы царды, ӕхсӕнадон змӕлды. Зӕгъӕн ис, ӕмӕ нӕ размӕ цы хӕстӕ ӕвӕрд уыдис, уыдон сӕххӕст кодтам. Фӕлӕ ма  нын бакусинаг дӕр ис. 2019 аз бӕркадджын рауад, фыццаджыдӕр, уымӕн, ӕмӕ нӕ фӕсивӕды минӕвӕрттӕ разӕнгардӕй архайдтой бирӕ конкурсты, фестивалты. Зӕгъӕм, «Студентты уалдзӕг» ӕрбамбырд кодта 1,5 мин чызджы ӕмӕ лӕппуйы. Уӕлахиздзауты къорд Ирыстоны номӕй архайдта ӕппӕтуӕрӕсеон фестивалы Пермы, уый фӕстӕ та нӕ минӕвӕрттӕ сӕхи иттӕг хорз равдыстой дунеон фестивалы, 23 бӕстӕйы ‘хсӕн курдиатджын фӕсивӕд Ирыстоны кад бӕрзонд систой. Цӕгат Кавказы федералон зылды фӕсивӕд разӕнгардӕй  бирӕ азты архайынц форум «Машук»-ы. Ацы юбилейон азы йӕ архайджыты нымӕц ноджы фылдӕр уыд. Не ‘мзӕххонтӕ цы проекттӕ бацӕттӕ кодтой, уыдон рауадысты цымыдисаг, экспертон къамисы уӕнгтӕ бирӕтӕн стыр аргъ скодтой. Ивгъуыд азимӕ абаргӕйӕ, ныр ноджы ӕнтыстджындӕр рауадысты сӕ проекттӕ, грантты хуызы 33 милуан сомы сластой республикӕмӕ нӕ фӕсивӕд.  Стыр бӕрнондзинад домы нӕ куыст, уый ӕмбарӕм ӕмӕ афтӕмӕй бавналӕм алы вазыгджын хъуыддагмӕ дӕр. Ӕнгом ӕмгуыстад нын ис ӕппӕт министрадтимӕ, ӕхсӕнадон организацитимӕ,  районты разамонджытимӕ, — загъта Джусойты Руслан.

Журналистты фарстытӕн дзуапп дӕтгӕйӕ, комитеты сӕрдар бамбарын кодта районты ныртӕккӕ кӕй кусынц «Фӕсивӕды социализацийы центртӕ». Зын уавӕры бахауӕг ӕрыгон адӕймагӕн йӕ фарсмӕ балӕууынц, кусы дзы психолог дӕр. Ӕнӕмӕнгӕй, ноджы парахатдӕр кӕнын хъӕуы ӕфсӕддон-патриотон хъомылад. Ацы хъуыддаджы раппӕлинаг куыст кӕнынц лагертӕ «Балц», «Патриот» ӕмӕ «Хӕххон». Сӕрды мӕйты дзы 500 лӕппуйы бӕрц райстой зонындзинӕдтӕ, стӕй сӕ фӕллад суагътой. Фылдӕр хатт, фыдуаг митӕ чи фӕкӕны, уыдон лагерты фӕстӕ раст фӕндагыл ӕрлӕууынц. Ацы хъуыддаджы немӕ иузӕрдион сты мидхъуыддӕгты оргӕнтӕ ӕмӕ  58-ӕм ӕфсады разамынд, — загъта Руслан. Хицӕн ныхас пресс-конференцийы уыдис фӕсивӕдӕн куысты бынӕттӕ раттыны тыххӕй, цӕмӕй нӕ курдиатджын чызджытӕ ӕмӕ лӕппутӕ, дӕсныйад райсгӕйӕ нӕхи республикӕйӕ ӕндӕр рӕттӕм куыстагур ма цӕуой.

Джусойты Русланы ныхасмӕ гӕсгӕ, республикӕйы Хицауад йе ‘ргом аздӕхта ацы фарстмӕ. Зӕгъӕм, Хъӕууон хӕдзарады ӕмӕ хойраджы министрад ныфс ӕвӕры паддзахадон программӕты архайгӕйӕ фондз мин куысты бынаты кӕй бацӕттӕ кӕндзӕн, уымӕй. Ныридӕгӕн уарынц хъӕрмуӕттӕ, инкубатортӕ, ис ӕндӕр гӕнӕнтӕ дӕр. Зӕгъӕм, «Земский доктор» ӕмӕ «Земский учитель», алывӕрсыг ӕххуыс цӕуы чысыл амалхъомадӕн.

Пресс-конференцийы архайдтой районы газетты уацхӕсджытӕ дӕр, уыдон сӕ фарстытӕ бастой сӕ хъӕуты ӕмӕ горӕтты фӕсивӕдимӕ.

— Раздӕры хуызӕн хъӕуты цӕуылнӕ уал ис, фӕсивӕдимӕ чи куса, ахӕм специалисттӕ?

Ацы фарстӕн дзуапп дӕтгӕйӕ, комитеты сӕрдар фӕнысан кодта, уыцы хъуыддаг аразгӕ кӕй у алы районы сӕргълӕууӕгӕй дӕр.  Алы хъӕуы дӕр ис уӕздан, фӕзминаг  лӕппутӕ, иннӕты ‘хсӕн кад кӕмӕн ис, кӕуыл баууӕндой, йӕ алыварс фӕсивӕд чи ӕрбамбырд кӕндзӕн. Сӕ хорз, се ‘взӕр дӕр сын уыдон зонынц.

—  Фӕсивӕдон комитеты дуӕрттӕ гом сты алкӕмӕн дӕр. Ӕрмӕст иумӕйаг хъарутӕй уыдзыстӕм уӕлахиз. Хорз уаид, бирӕуӕладзыгон хӕдзӕртты цӕрӕг фӕсивӕд кӕрӕдзийы куы зониккой, сӕ алфамбылай  сыгъдӕг дарыны хъуыддаджы куы архаиккой, уӕд. Комитеты уӕнгтӕ дарддӕр дӕр цӕудзысты ӕмӕ ӕмбӕлдзысты районты  фӕсивӕдимӕ. Нӕ хъарутӕ, нӕ зонындзинӕдтӕ нӕ бавгъау кӕндзыстӕм, цӕмӕй ӕмдзу кӕнӕм нӕ фӕсивӕдимӕ, — загъта Джусойы-фырт.

Фӕсивӕдон комитеты сӕрдар бӕстон дзуаппытӕ радта ӕппӕт фарстытӕн дӕр, фӕбӕрӕг кодта, ацы ӕмӕ иннӕ аз цы хъуыддӕгтыл кусдзысты, уыдӕттӕ. Иууылдӕр сты ахсджиаг ӕмӕ хъӕугӕ.

Пресс-конференци амыдта РЦИ-Аланийы Сӕргълӕууӕджы ӕмӕ Хицауады пресс-службӕйы разамонӕг Сабанты Фатимӕ.

Гугкаты Жаннӕ

ОСТАВЬТЕ ОТВЕТ

Please enter your comment!
Please enter your name here