Тулдз — Цӕгат Ирыстоны

0
11

Нӕ республикӕйы зӕххыты тулдзы садзгӕ хъӕд ахсы 8400 гектары. Уӕлдай фылдӕр  сты Мӕздӕджы районы. Ам Терчы цӕугӕдоны атагъаты тулдз зайы 2500 гектары фӕзуаты. Уӕдӕ Дзӕуджыхъӕуы хъӕды хайад дӕр ӕнӕ тулдз нӕу. Хӕхты фӕхстӕ ӕмӕ къӕдзӕхты тӕссӕртты ахсы 2100 гектары. Раздӕр тулдз нӕ задис Кировы, Алагиры, Дыгуры, Ӕрӕфы районты хъӕдты, фӕлӕ ныр уым дӕр ис садзгӕ хъӕды дзӕвгар тъӕпӕнтӕ.

Республикӕйы ӕрдзон фӕрӕзтӕ ӕмӕ экологийы министрады хъӕды хайӕдты кусджытӕ ахӕм хорз цӕстӕнгас хуымӕтӕджы нӕ аздӕхтой тулдзмӕ. Фыццаджыдӕр, ӕвӕджиауы хорз у быдыртӕ тыхджын дымгӕтӕй бахъахъхъӕнынӕн. Уӕдӕ туаггуыр бирӕ кӕй уадзы йӕ сыфтӕртӕй, уый тыххӕй йын ӕмбал нӕй алыварс ӕрдз ӕнӕниздӕр кӕныны хъуыддаджы. Тулдз бӕлӕстӕн ис стыр эстетикон нысаниуӕг, ӕмӕ сӕ арӕх пайда кӕнынц, парктӕ ӕмӕ аллейтӕ куы фӕаразынц, уӕд.

Ӕцӕгдӕр, тулдз у лӕгдзинады стыр тых ӕмӕ фидардзинады цардӕгас ӕвдисӕн. Рагӕй дӕр ӕй нымадтой хъӕбатыр нӕлгоймаджы кӕнӕ та ӕфсӕддоны бӕласыл. Уыдон-иу кувынмӕ ӕрбацыдысты йӕ бынмӕ, ӕмӕ-иу сын бӕлас фӕхай кодта йӕ ӕвидигӕ хъаруйӕ.

Ахуыргонд биологтӕ тулдз ахастой тӕрсы бинонтӕм. Йӕ бӕрзӕнд вӕййы 30-40 метры, хатгай 55 метрмӕ дӕр фӕхӕццӕ кӕны. Уӕдӕ йӕ зӕнджы диаметр дӕр чысыл нӕу — 1,5 метры. Цӕргӕ та кӕны фондзыссӕдз азы, фӕлӕ иуӕй-иу тулдз  бӕлӕсты цӕрӕнбон вӕййы 1000 азы ӕмӕ уымӕй ноджы фылдӕр. Зӕгъӕм, литоваг парк Стелмужийы ис 2000 азы чи цӕры, ахӕм тулдз бӕлас.

Цӕмӕй ацы бирӕазыккон бӕлас нӕ республикӕйы арӕхдӕр уа, ууыл архайынц, хъӕд хаццоны лӕвӕрд кӕмӕ ис, уыдон. Зӕгъӕм, Джызӕлы, Уӕллаг Санибайы, Майрӕмададжы, Дзуарыхъӕу ӕмӕ республикӕйы ӕндӕр хъӕутӕм ӕввахс хъӕды кусджытӕ.

Уавӕр афтӕ у, ӕмӕ тулдз Цӕгат Ирыстоны Сырх чиныгмӕ хаст кӕй нӕу, уый тыххӕй иннӕ бӕлӕстӕй хуыздӕр хъахъхъӕд нӕ цӕуы. Уӕддӕр ӕм, хъӕды куыстытӕ кӕнгӕйӕ, ӕвналӕн нӕй. Ацы хъуыддаджы пайдагонд цӕуы тӕрсӕй, сусхъӕдӕй, фӕрвӕй, ӕндӕр бӕлӕстӕй ӕмӕ уый дӕр, хъӕдмӕ санитарон ӕгъдауӕй куы фӕзилынц, уӕд. Махмӕ дӕр, иннӕ рӕтты куыд у, афтӕ ис, бирӕ азтӕ кӕуыл цӕуы, ахӕм тулдз бӕлӕстӕ. Фӕлӕ куыд ӕрдзон цыртдзӕвӕнтӕ, афтӕ ӕппӕтӕй хыгъд нӕма ӕрцыдысты.

Тулдз у ӕрдзы фидауц. Нӕ хъӕутӕм ӕввахс хъӕдбынтӕм куы ацӕуай сӕрдыгон, уӕд адӕймаджы зӕрдӕ барухс вӕййы тулдзы садзгӕ хъӕдӕй. Фӕллад куы уат, уӕд ма чысыл байхъусут тулдзы сыфтӕрты сусӕг ныхасмӕ, кӕддӕра ног хъарутӕ нӕ бацӕуид уе уӕнгты. Уӕдӕ тулдз цъылынӕй дӕхимӕ хорз куы фӕкӕсай абанайы, уӕд та ӕнӕниздзинады хос у. Фӕлӕ ӕрмӕст уыдӕттӕ ӕгъгъӕд не сты тулдзӕй раппӕлынӕн. Йӕ сыфтӕртӕ дӕр хӕдзары ӕфсинты бахъӕуынц. Халсарты цӕхджынтыл сӕ куы нывӕрай, уӕд сӕ фырхӕрзадӕй ахӕрӕнтӕ нӕ вӕййы, сӕ хӕрздӕф та зӕрдӕйыл фембӕлы.

Цӕгӕраты Темыр, хъӕды хӕдзарады инженер

ОСТАВЬТЕ ОТВЕТ

Please enter your comment!
Please enter your name here